10
1 Tialima, Solgo te sę bidi polasa tagala palai, tama Samuelgo te oliv wel botol dwasianu me deli selama, tama te wel habu te Sol toboluba geliyu, te aga king pedalumainu nigiliyu, sa muani. Tama Samuelgo agaba te gesabidi nono neyu, te e tiwai po wai, “Genuai Bidigo te nage aga we bidi, te Israel dabego king bidi nigilali dao. Tama nago augwali tonalu, tama augwali tau siyu, te boi bidi dabego augwali dolomainu me egobeo. Tama megi eno te nageba nosali pedelabo sę po nagebolo wainogo ebao. Tama nago te sę dabe pedalubo subaso da, te nago koneao, Genuai Bidigo te nage sa muyu, te aga we bidi dabe tonalumainu nigilali dao. Te e tama tiwai sę dabe dao.
2 Te nago ena taga peyu pabo sogo, te nage te Benjamingo bulu tǫ te Selsa buluba sabolaibao. Tama nago te ola be masigi te Resel muani masigi pąde, te bidi si te nago augwali si gesabidi deli sisinaibao. Tama augwali sigo nagebolo te tiwai po waibao, ‘Te nago gegali donki dabe, te augwaligo gegelama, sulama, tama nago ayago te donki dabede te homu godolo menisąwai. Megi agai te nagede homu kone palu, tama hanalubo sę te tiwai ebao, eno mena tama tilama, te eno ogwa gegegowe?’ Te bidi sigo nagebolo te po waibao,” Samuelgo Solbolo te po wali.
3 “Tialima, nago te bidi augwali si tagalama pobadi, tama te habu selali ni te Tabor buluba sabolama, tama nago tede bidi sela te gesabidi sueibao. Augwali te Godiba ofa ilainu, te Betel buluba pabo sueibao. Te bidi sela te bidi me deligo te gesi ogwa bidi meme sela te sela asobo, te gasa bidi mego te bret sela sesali, tama sela wali bidigo te meme tigi walide augwaligo te wain wę tabiali, te abilasa asobo sueibao.
4 Tama te sela bidigo nagebolo siade da weyu, tama te bret si nage mawaibao. Tialima, nago te bret sao,” wali.
5 “Tama nosali nage te Godigo bulu du te taun Gibea te Filistia dabego ami bidi dabe bidalubo madi teba pao. Tama nage te taun pąba pabo sogo, te nago profet hani me deli augwa te bulu dude te alta tagalama, tama aiyaba dulubadi, te gesabidi deliba ununaibao. Tama augwaligo te tobage gita me, tamborin dabe me, ona elebo me, te tiwai eyu, tama te profetgo kolesaga ebo gilama, te Godigo po pususu paibao.
6 Tialima, te Genuai Bidigo Mobo te bomo elama, nageba pedalu, tama nage te profet dabe dali deliba muna selama, tama nago augwaligo te ebo kolesaga tobage tiwai yaibao. Tama nage gasagi yai bidi mu pedelaibao.
7 Te sę dabe nageba pedalubo sogo da, teda nago koneaibao, te God nage dali bidu, te Godigo nageba mani sę ebo te nage tau saibao. Tama nosali, nago homugo te mena sę te we bidi tau sabo wiegi yai sę da homu ebaso da, teda nago te sę yagameo.
8 Tama nage polasa pao, te bulu Gilgalba pelama, tama te bulude ena tonalu, te a naga olama me si sogo bidai madi, tama ena asu, nage dali muna sagasaibao. Tama eno te siaba tigidali ulubo ofa meba elama, te God dali deli haliga ebo ofa me yaibao. Tama eno nagebolo te nago mena sę yabo po me te waibao,” Samuelgo Solbolo te po wai.
9 Solgo te po odama, tama aga begelama, te Samuel tagalubo sogo, teda Godigo gesi homu kolesaga agaba mawai. Tama te sogode naga te sę tigidali te Solbolo ola mayu pedelali, Godigo aga te king pedalumainu nigilai, te Samuelgo agabolo wali po tiwai gilama yalio.
10 Te Sol aga sę bidi dali te Gibea buluba sabalubo sogo, te profet hani me deligo aga dali deliba gesabidi munasa, tama te Godigo Mobo agaba bomo elama pedelali. Tama aga te augwali dali deliba muna selama, tęąbi weyu, tama te profet dabego ebo tiwai te sasa mano bilai.
11 Tama te polobadu aga koneani, te mena we bidi augwaligo agai te profet bidi dabe dali te tiwai kolesaga ebo sulama, tama augwa hasi hanalu, te tiwai wali, “Magi sę te Kisgo ogwa Solba pedalubowe? Aga me te profet pedelainu ebowe?”
12 Tama te bulude bidi me deligo te po wei ponoyu, te po wai, “Te gasa profet dabe magi yai dawe? Eno homugo te augwa aya dabe te profet bidi bidisąwani homu ebao,” wali. Te Solba pedalubo sęde, te Israel dabego wabo po page me deli elalubao. Te bidi me deligo mena sę me deli yainu ebo sulama, tama augwaligo homugo agai te sę ebo usu egobe homu elama, tialima augwaligo te po wabo, “Magi elama, Sol te profet pedelainu ebo, agawe?”
13 Tialima, Solgo te profetgo ebo kolesaga tiwai elama, aga te bulu dude elalubo alta elalubo madi pai.
14 Nosali Solgo te aga aya sabi bidi te deliba gesabidi unulubaso, tama aga aya sabi bidigo te agabolo me, te aga sę bidiba me hanalu, te tiwai po wali, “Dage si mena pai asobawe?” Tama Solgo te po agabolo wai, “Da si te donki dabe gegegi pai. Tiali goli, da sigo gege gegi pali meni yani, tama tibaso, da si pelama, te Samuel sugi pai.”
15 Tialima, te aya sabi bidigo te po wali, “Agai mena po dage si dali waliwe?”
16 Tama Solgo te tiwai po wai, “Agai da sibolo te tiwai po wali, te bidi mebago te donki dabe gegela sualio, wai.” Tiali goli, Solgo te aga aya sabi bidibolo te Samuelgo aga te king pedelaibao wali po te aga aya sabi bidibolo wabeo.
Sol te king pedelali
17 Nosali Samuelgo te tigidali Israel dabe te Mispa buluba te Genuai Bidi geduba sisinagasomainu i wai dao.
18 Augwali sisina silibo si, tama agai augwaliba te tiwai po wali, “God, te da Israel dabego Genuai Bidigo, te po wai, agai dage te Isipde selama, tama dage odasa asai. Agai dage te Isip dabego nogode, me te gasa hani dabego dageba dwai sę mu ilibaso, tama agai dage ma dobola selama, te odasa soai dao.
19 Godigo dage ma dobola sali, te dwai sę ebo me sęgę te dageba pedalubaso sali. Tiali goli, megi dagego aga tudiba togoliyu, tama dagego te po obao, te Godigo dage tonalubo te dagego hagela ebo homu yai. Dagego homugo te eno dagebolo te king bidi me deli momainu yali. Tialima, megi da, te dage pelama, te duga hani sibi dali te Genuai Bidigo geduba dolalugi piąo,” wali.
20 Tialima, Samuelgo te tigidali hani deli delibolo te pąba asao po olama, tama agai te Genuai Bidigo homugo te gegelama hanilibo kolesaga elama, tama Genuai Bidigo te Benjamingo hani sa muyu, nigilali.
21 Tama Samuelgo te Benjamingo hani solo bage asao olama, tama God Genuai Bidigo te Matrigo hani nigilali. Tama Samuelgo te Matrigo hani sibi bidi asao po olama, tama Genuai Bidigo digi te Sol sa munama nigali, te Kisgo ogwa. Tama augwaligo aga gegebo sę yali, tiali goli, augwaligo aga me subeo.
22 Tama tibaso, augwaligo te Genuai Bidiba hanalu, te tama wali, “Te bidi asaliwe, ma meniwe?” Tama Genuai Bidigo po wei ponoyu, te tiwai po wali, “Sol te duga walu doado bage tomode te geme dualalubao,” wai.
23 Augwa te po odama, tama augwa udulama, tama Sol sela asai. Tama aga te we bidi dali dolaluali sogo, augwaligo aga suali, te dili bobage ugwanu gudai bidi, tama gasa bidi dabe te pęwadage elama, tama aga tiwai usu me ebeo.
24 Tialima, Samuelgo te we bidibolo te po wai, “Te Genuai Bidigo sa muyu nigilali bidi suao. Te tobage bidi tiwai me deli te da tomode me menio.”
Tama tigidali bagego po dagą genuai olama, i weyu, te tiwai wai, “Aga te dago king bidi dao. Aga te kibu be hauwa te king bidimainao!” wali.
25 Tama Samuelgo te kingo yabo sę dabe po te bage dabebolo te po hania hanilama wali. Tama nosali agai te po te buku me delide asęnama, tama Genuai Bidigo beba munama elaluali. Tama agai te tigidali we bidi te augwa buluba ma tagala palali.
26 Tama Sol aga bulu Gibeaba ma pali. Tiali goli, Godigo te bomai bidi meba homu hodolama, tama augwali te Sol dali pelawali.
27 Tiali goli, te hagoma ebo bidi mebago te po wai, “Magi elama tama, te bidigo da tau saibawe?” Tama augwaligo te Sol hagela homu mu elama, tama augwaligo te wiegi yai nai me deli agaba me ma mabeo. Tiali goli, Solgo te po me deli augwaliba me wabeo.