3
Godigo wiegi yai sę mu dade yali, tama dago dwagi yai kolesaga yao po wali
1 Taitus, nago te nago tonalubo Godigo po wali pabo we bidi augwalibolo e po widu geao: augwali te gavman tuni bidi dabe dali genuai bidi dali dologode bidiyu, tama augwaligo po odolama te po wali pao. Tama tiyu tama augwaligo tigidali dwagi yai kolesaga yabo sę sisi eyu bidao, te po ola mao.
2 Augwaligo bidi mede dwai po olamuo. Te menio. Augwali homu nagame elama, tama abagi homu eyu bidao. Tama sesemane sogo augwaligo tigidali we bidi dali te imilai homu eyu, tama augwali tau sao. Te po augwali ola mao.
3 Magi baso meni. Polobadu da me, nage me da tigidali Godigo po odisąbadi tama da te homu kolesaga meni yai bidi tiwai bidai dao. Tama dago me po sela sąwai dao, tama tibo po odolama, tama dago pabo tųde geda muyu tama bilai dao. Tama bidibadi tama dena tigigo ebo haniani dwai kolesaga dali te tigi pusu ilibo sę me, te tobage sę ebogo da kalabus mu yai dao. Dago te bidi hasi dali dwai homu ebo kolesagade biliyu, tama dago augwaligo nai dabe pesą eyu yai dao. Tama bidi meba augwaligo da dali boi bidi eyu, tama dena hasi tomode me boi bidi naga elalua pai dao.
4 Tiali goli, God aga da, te da ma dobola sabo bidi dao. Tama agai da dali yabo tau sabo kolesaga dali, aga da godolo ebo kolesaga me, te si hania pedalali sogo,
5 te sogo agai da ma dobola sai. Agai dago doloba pai kolesaga ebaso, tama agai da ma sabeo. Dago te doloba pai kolesaga ebeo. Aga digi da we bidi hobede mu ebaso tama da ma sai dao. Tama aga digi da ąįgo paluama, tama da gesi noma wai ma pedalai dao. Tama tiyu tama agai Mobo Bidigo da gesi noma bidibo ula mawai dao.
6 Te Jisas Krais da, dena ma dobola sabo bidi, te agai sęde Godigo aga Mobo Bidi dabolo mu mawai dao, te bidi mego ąį hauwa gea palobo tiwai eyu tama Godigo aga Mobo Bidi dabolo mani.
7 Agai homugo da aga gedude doloba pai we bidi pedaliyu, tama te da tonalubo bidada pabo ula dago mu somainogo eyu agai dabolo aga Mobo Bidi mawai dao.
8 Te po mu dao.
Tama eno homugo nago te po bomo elama ola mao, te Godibolo augwa homu tigidali mani we bidi augwaligo te ola mabo po dali homugo bugagia kone palama, tama augwaligo bomo elama te dwagi yai sę eyu bidimainao. Dwagi yai sę te dwagi yai page elalubao, tama te dwagi yai sę ebogo te tigidali gasa we bidi dabe me tau sabo dao.
9 Tiali goli te Godigo we bidi meba augwaligo te peni meni yai olo naide hanalua peyu te po wabo dao. Augwaligo te polobadu wąį dabego nogide po weyu, tama augwa hasi wado po wabo dao. Tama te bomo yai pode konila ebo dao. Te tobage po wabo dabe nago gedelao. Dago koneani, te pogo da tau sogobeo, tama dwagi yai nai walobo menio.
10 Niwai bidi agai te Godigo we bidi hani bugulubo po wabo bidi da, nago te bidibolo deli sogo me si sogo me te sę tagalao po wao. Tama agai nago po odisąbaso da, teda nago te bidi aga tudiba muao.
11 Nago koneani, tama tiwai bidi aga homu te gagea pai dao, tama agai ebo dwai sęgo aga te dwai bidi dao hania ola mabo dao.
Po silagasu wabo po
12 Nosali eno Artemas me Tikikus te eno nage bidibo digi tagala palobaso da, te nage polo ena bidibo digi Nikopolis te hanuba asao. Magi baso meni, ena te Nikopolis bulude te dwai kedau sogo ena te bulude bidaibao, eno te homu dąų wali.
13 Nago te bomai po page koneai bidi nogi Senas dali, te gasa bidi me Apolos augwali si nago tau sao. Augwali si te gasaba painogo ebo si, tama nago augwalibolo te gasaba pabo tau sabo nai bugagia mao, tama augwali si bilibo nai tųde menia sogobeo.
14 Tama dago we bidi, te Krit tǫde bidibo Godigo po wali pabo we bidi, augwaligo te gasa we bidi tau sabo dwagi yai sę ebo kolesaga koneao. Augwali tama tiyu da, teda augwaligo te nai meni yai we bidi tau sabo sę ebo usu yaibao. Augwali te nai walisiąbo ni tiwai bidilamuo.
15 Te ena dali bidibo we bidi tigidali augwaligo nage dali siade dao, bugagia bidao, te po nagebolo ola tolobao, e pasgo. Tama te nage dali bidibo bage, augwali da dali deli homu eyu tama God dali konealubo po dąų wali, te we bidibolo nago dago te siade dao, bugagia bidao wali po wao.
Eno homugo Godigo da olo tau sabo kolesaga dage tigidali dali bidao. Te tama dao.