3
Fole Yudaba naka afeti Gode dowan wengo omkayem haabinebiobe.
1 Fol ne Yudaba ibo Yesuse wengo omkaye biania baabenia Ibsa Yesuse bainobo geniba Gode meletan aine ge oyebio dafa ota naka mak unang maki ne ge nemeb teniba klabutam ele daibbio kesoa ne Gode baabania Kobo Yudabai daabenale ge ohabibe.
2 Ne funania Sino Gode ne baatnenea Kobo moneba Yudaba naka afet isu unaneba baabeneba Gode ibo daabenebiobo ge baabenale ge baatnenebio weng olo ibo sin wentibbiobo gabibe.
3 Sinanggwano Gode weng olo ayok binabo otane memalo Gode weng olo ne aletnene kesoa ne ibo weng olo gwab baabenamabibe.
4 Ne futan olo ibo kinimibo Yesus Klaiste weng ayok olo ne aletnenebuo ibsa tekein kenomabiobe.
5 Sinanggwano Gode e weng ayok olo nakaia unangai dabalim olo binibbuei mo alebeim blimobe. Otane memalo e Hobe Yesuse okok dlasanin naka nisa eka Gode weng omkeimalin naka isa ni alebenebio kesoa ni Gode weng ayok olo tekein kebuobe.
6 Weng ayok olo inaminobe. Sino Gode Yuda nakaia unanga ita daaye binebiobe. Otane memalo Yuda nisa Yudaba ibsa nibo alukum Yesus Klaiste dowan weng ayamo wentenoba bainobo genob mole Yesus Klaiste nibo hengmino temo biobo dotlanamabebe. E inanamabe kesoa Yuda ni bainobo gabob nisa eka Yudaba naka afet ibo bainobo gabib ibsa nibo alukum Gode meletanobe. Sinanggwano Gode Yudai baabenea Ne inamin namin ayamo ibo omyamabibo genebuo Yudaba naka afet ibo Yesus Klaiste bainobo gabib ibsa omyamabebe.
7 Gode ne nemfakanea daatnenea baatnenea Kobo moneba Yudabai ne wengo omkayemale ge baatnenea e titilo omnebio kesoa ne e weng olo ibo omkaye binabibe.
8 Ne Gode okok dlasanin nakai maki i tabab tem daak bli otane Gode ele bobol tem funin ye nemfakanea baatnenea Kobo Yudabai Yesus Klaiste wengo omkaye bianeba baabeneba E sinanomo inamin namin ayamo dokayemabebo ge baabenale ge baatnenebiobe.
9 Gode inamin namino alukum klanebue baatnenea Kobo moneba ne weng olo sino ayok binobuo nakaia unangai alukum omkaye bianeba baabeneba Sinanggwano e weng olo ayok binabo otane memalo keimanobo ge baabenale ge baatnenebiobe.
10 Gode inanebuo e funanea Nakaia unangai homoni ne weng olo wenteniba bainobo geniba ne meme aiba abisel isa eka i komokwal isa yateniba funaniba Nakaia unanga eli Gode wengo bainobo geniba e meletan aib kesoa Gode tekein kemino dot sumobo geine ge funaneta inanebiobe.
11 Sinanggwano Gode funanea Ne sinanomo Yesus Klaiste dabaia daaknea Yuda isa eka Yudaba isa i hengmino temo blibo dotlaneko ge funanebio kesoa e inanea nib Sume Yesus Klaiste dabanea daakenea nib hengmino temo biobo dotlanebiobe.
12 Nibo nib Sume Yesus Klaiste bainobo genoba e tena biob kesoa nibo monoba God esu unanoba nib wengo e baabanamino mo tosiambobbabe.
13 Inamin kesoa ne ibo daayebio dafa ota naka mak unang maki enino omkanebib kesoa ibo kukub olo tolo mo tosiananibta ib bainobo galino mo deibonimibe! Ne okok ele okok kebi olo ibo daabeno kesoa ibo ib bainobo galino sbalma wafu bianiba seinine!
Efesas bib seli Gode gobenin kukubo kla tekein keine!
14 Nib Aye Gode ne baatnenea Kobo moneba nakaia unangai Yudabai ne wengo omkayemale ge baatnenebio kesoa memalo ne dlong dlong golbua daak tounia e niniino dobtouleb blibe.
15 Ne Yesuse nakaia unangai bainobo gabibi abilim uto blib isa eka dabalim olo blib isa i Aye Gode niniino dobtouleb blibe.
16 Gode titilo dot sumobe. Ne e baabania Keb Hobe dabaneba monea Efesas bib seli bainobo galin nakaia unangai keb titilo omkaye bianea i bainobo galino omsbal mabeneko ge baabaiobe.
17 Ne funania Ibo Yesus Klaiste bainobo geiba e tlaknea ib bobol tem daak bibeneko ge funania Gode beten kehabibe. Ne funania Ibo Yesus Klaiste bainobo geniba naka mak unang maki gobenimibo ib bainobo galino sbal maniba makob aso kimkimo dabal temo tananoa nekek genoa aso damo sbal manoa mawe binabo inanomabiobo ge funania Gode beten kehabibe.
18-19 Yesus Klaiste nibo kla gobe bie kesoa e gobenin kukub olo sumobe. O binano onon tlanoa ge dlakanobio kesoa ne Gode baabania Kobo bainobo galin nakaia unangai Efesas bib sel isa eka bainobo galin nakaia unangai bib mak bib mako blib isa alukum daabeneba i bainobo galino omsbal mabeneba i Yesus Klaiste kla gobe bie kukubo tekein keine! E gobenin kukubo sum kesoa nakaia unangai o klao mo tekein kenomabibbabo, kobo daabeneba i e gobenin kukubo kla tekein keine! I e gobenin kukubo kla tekein kenimibo i Klaiste kukub osa eka keb kukubo afet osa i alukum kla tekein keniba makob keb ulab aniba naka molot unang molot anomabiobo ge ohabibe.
20 Gode nibo daayebeo e daayemin kukub olo dot sumobe. E inamin namino daayebeo nib bobol temo funanoba E inamin namino olo daayemeko ge fumbob osa eka nibo oha bianoba Kobo ni inamin namin olo daabenale ge ohabob osa e daaye bianea eka nibo inamin namino mo fumbobba osa eka inamin namino nibo mo ohabobba osa e daayebebe. E titil olo nibo omkayebeo o nib bobol temo bibe bio kesoa o nibo daayemabobe.
21 Yesus Klaiste nibo daabenebio kesoa e bainobo gabob nibo Gode niniino memalosa sinanomosa amitie dobtouleb nomo! Bainobe.