5
Ibo Klaiste kukub ayamo kla wafueine!
1 Ibo Gode meme kesoa e ibo kla gobe biebe. E inayebe kesoa ibo e kukubo nabe ota ibsa wafueine!
2 Klaiste nibo kla gobene kesoa e atdimo kaanea nibo daabenebiobe. Sinanggwano Yuda ni faninwali kulani yenaniba funiba Gode dlaliba e tango kunubanoa baabenea Ib kukub olo ayamobo ge oye binebua Yesus esa inanea atdimo kaanea nib hengmino walubenea Gode baabanea Keb kukub olo ayamobo ge baabanebiobe. Klaiste nibo kla gobenebio inaniba ibsa naka mak unang maki kla gobeine!
3 Ibo tamano hengamin kukub osa eka bobol temo misiam omkalin kukub osa eka bobol wayemin kukub osa mo namibe! Ibo Gode meme kesoa ibo kukub olo alukum deibueine!
4 Ibo kukub misiamo namin weng osa eka weng misiam omin osa eka atliyemin weng osa mo omibe! Kukub olo ibo mo daabenamaboba kesoa ibo deiboniba Gode oha bianiba Kobo ayam kesoa keb kukub nabeb osa ayamobo ge oha bianiba e niniino dobtouleb nine!
5 Ne weng ele baabenimi olo kla wentine! Nakaia unangai tamano henga bianiba eka i bobol temo kukub misiamo namin bobolo fumbianiba eka naka mak unang maki inamin namino bobolo waye biam bio ile Klaiste Gode i dum i kimanin bibo mo unomabibbabe. Nakaia unangai naka mak unang maki inamin namino bobolo wayemo mole i makob god dim omini niniino dotouleb nomabib inaminobe.
6 Naka maki ibo dim baabeniba baaniba Nakaia unangai kukub olo wafu binimibi Gode i kukub olo mo yang keneta yenanamabebabo ge baabenimibo ibo i weng olo mo wentubenibta bainobo genimibe! I dim oyebiobe. Nakaia unangai Gode e wengo omdibiha bianiba kukub misiam olo nabinimibi e i alo tliaubanoa i kukub misiam olo yang kenea enino omyamabebe.
7 Inanamabe kesoa ibo nakaia unangai kukub olo nabib isuo mebo mo nimibe!
8 Sino ibo kukub ayamo mo tekein keim blim binibbio dimo ibo makob mililam bio tem tab bianiba ib kukub misiamo nabinibbuo makob naka eli kukub misiamo nabib inaniba ibsa ina binibbiobe. Otane memalo ibo Sume meme aniba kukub ayamo tekein kebianiba ibo makob ayal dim blib kesoa ibo kukub misiamo deiboniba kukub ayam ota wafueine!
9 Nakaia unangai kukub ayamo tekein kebib ile kukub ayam osa eka kukub molot osa wafu bianiba i wengo baino olota obiobe.
10 Ibo funaniba Inamin kukub ota Gode gobo biebe geniba ibsa kukubo yota wafueine!
11 Nakaia unangai Gode kukub ayamo mo tekein kebibbai i kukub misiamo wafu blib kesoa ibo isuo mebo mo nimibe! Otane ibo ib kukub ayamo i alebeiba i wateniba funaniba Ni kukub olo nabobo misiamobo ge funaine!
12 I kukub misiamo ayok nabibo nibo baabenamabi otane ne aal waitneno kesoa ne ibo mo baabenamabibabe.
13 Nakaia unangai kukub misiamo ayok nabibi bainobo gabob nib kukub ayamo nabobo i watemaibo funaniba Nibo kukub olo nabobo hengminobo ge funanimibo kukub misiam olo deiboniba kukub ayam ota wafunomabiobe.
14 Gode i kukub misiam olo omkeimabene kesoa i kukub olo imino mo ayok anomobabe. Gode buk tem wengo baanoa
Naka kobo ambiebo hananale! Eka kaanebbio naka kobo imin hananale! Kobo hananeb mole Klaiste e kukub ayamo kobo alebkenamabebo genobiobe.
15 Ibo kukub misiamo mo namibe! Ibo bobol ayam fumbianiba kukub ayamo namine! Nakai bobol tem funin blim bianiba kukub misiamo nabibi kukubo ibo mo namibe!
16 Memalo nakaia unangai kukub misiamo homono wafueib kesoa ibo Gode okok ayamo amitie namine!
17 Ibo Gode kukubo mo tobtlinimibe! Ibo Gode okoko gobo bianea namine gabeo kla tekein kebianiba namine!
18 Eka ibo aay misiamo mo dowoniba ib gabamon temo mimafubenoa weng namin namin nimibe! Ibo inaniba weng namin namin nib mole kukub olo ibo watwat dabenamabobe. Ina otane ib bobol tem wato Gode Hobe dababbaine!
19 Ib bobol tem wato Gode Hobe dababba biaibo ibo ib nekwali tena blib mole Gode niniino dobtouleb bianiba Gode weng buko niniino Samo tem wato anso dolaibbuo ngambianiba eka Gode niniino dobtouleb bianiba seinin anso ngambianiba Sume niniino dobtouleb nine!
20 Gode inamin namino ibo doyebuo bobolo amitie fumbianiba nib Sume Yesus Klaiste niniino dimo nib Aye Gode baabaniba Keb kukubo nabebo ayamobo ge baabaine!
Nakaia unangai kukub ayamo namino wengobe.
21 Ibo Yesus Klaiste kla goba bianiba E ayamobo ge ohabib kesoa ibo ib sinwalo maki wengo kla wentubesese bianibtane!
22 Unang ibo ib imakwali wengo kla wenteye bianiba makob ibo Sume wengo wentebib inaniba kla wenteyemine!
23 Yesus Klaiste bainobo galin nakaia unangai makob e damobe. E atdimo kaanea i hengmino temo blibo dotlanebio kesoa memalo e i kima bie inaniba imakwali alelwali kla kimaine!
24 Inamin kesoa alelwal ibo ib imakwali wengo kla wente bianiba makob bainobo galin naka unang nibo Yesus Klaiste wengo kla wentebob inaine!
25 Imakwal ibo ib alelwali kla gobe bianiba makob Klaiste bainobo gabibi gobenea emaye atdimo kaanea daabenebio inaine!
26 Yesus Klaiste atdimo kaanea e bainobo gabob nibo daabenea nibo hengmino temo biobo dotlanebio kesoa nibo e wengo wentenoba aayo fuelanoba kukub misiamo deibonoba e nibo dleb monea Gode dlalebio kesoa nibo emiobe.
27 E inanea atdimo kaanea nib hengmino walubenebio kesoa bainobo galin nakaia unanga nibo hengmino mo hengamobe! Deibonoba kukub ayam ota amitie naboba e imin tenea yatenea funanea I ayamobo geneko!
28 Klaiste bainobo galin nakaia unangai kima bie inaniba imakwal ibo ib alelwali kla kimaniba makob ilib damo kima blib inaine! Nakai i alelwali gobeib mole i ili damo gobo bliobe.
29-30 Nibo tekein kebuobe, naka make e damo atosino halit deibonea inamin namin misiamo tenoa e dimo tenamino blimobe. E imeno wembianea e damo kla kima bianea makob Klaiste bainobo galin nakaia unangai kima bie inabebe. Bainobo galin nakaia unanga nibo makob Klaiste dam kesoa e nibo kla kima bie inaniba imakwal ibo ib alelwali kla kimaine!
31 Gode buk temo enangge baanoa
Gode baanea Nakae e alelo ome mole e ay esa e biem osa deibenea alelo ikamo makob aine genebiobo ge baanobiobe.
32 Weng olo mitmakamo sumobe. Ne funania Weng olo Klaist esa eka e bainobo gabib isa ita baabenobiobo ge fumbibe.
33 Otane o nakaia unanga ibo elekiem olokiem baabenobiobe. Imakwal ibo ib alelwali kla gobeniba kimaniba makob ilib damo kima blib inaine! Eka alelwal ibsa ib imakwali wengo kla wente bianiba oye bianiba i naka ayamobo ge oyemine!