3
Tesalonaika bib seli Folwali beteno daaye binibbiobe.
1 Nekwal ibo ni weng mako baabenomabbuo inaminobe. Ibo Gode oha bianiba Kobo Folwali daabeneba i keb wengo naka mak unang maki omkayebiba naka homon unang homoni wenteniba baaniba Weng olo ayam molotobo geniba makob ni sino baabenobbio inaine ge ohamine gabuobe.
2 Naka homon unang homoni Gode wengo mo bainobo geim blim kesoa ibo Gode baabaniba Kobo Folwali daabeneba i hengmin nakaia unangai kukub misiamo omkayebibo watabenale ge ohamine!
3 Sume kukub ole motono olota namin kesoa e bain inanea dosbal manea kimanamabebe. E inanea kimanemeo Gululame ibo mo dlabmaneta kukub misiamo nanimibbabe.
4 Ni nib Sume bobol tem funino omya ni ib kukubo nabibo yatem motomanoba baabenoba Ibo kukubo yota namine genobbuo ibo sma wafu blib kesoa ni funanoba Sinanomosa i amitie wafunomabiobo gabuobe.
5 Ni Sume oha bianoba Kobo Tesalonaika bib seli daabeneba i kobo kla gobke bianiba i bobol tem funino sbal maniba makob sino i Klaiste enin sumo omkahabiba e bobol tem funino sbal mabinebio inaniba sbal maine ge ohabuobe.
Nakai alukum okok kebianibte!
6 Nib Sume Yesus Klaiste wengo ni omye kesoa ibo baabenomabbiobe. Bainobo galin naka mak unang maki baaniba Ni okok kemino denomabbiobo geib mole ibo mo bekebe biaibe! Sino ni wengo i aleye binobbuo i mo wafueim blim bianibta namomabiobe.
7-8 Sino ni ibo bekebe bianoba kukub ayamo wafu binobbuo ibo tekein kebib kesoa ibsa kukubo yota namine! Ni kwin tlamo boman tlamo ni amitie okok kebianoba monio boka bianoba imeno walo unam binobbiobe. Ne besao mo bianobta ibta imena youma monia oyine ge oyemin blimobe. Ni nimaye okok bianoba monio bokaboba ibo imena youmao oyaibo webianoba bokam binobbio inaniba ibsa okok bianiba monio boka bianiba imena youmao webianibte!
9 Gode wengo baanoa Nakai ne wengo omkayemib mole nakai i wengo wentebib nakai imena monia o misim okayemine genobio otane ni ibo bekebe bianoba Gode wengo omkayebob dimo ni ibo mo baabenobta ibo imena ama moniao misim okayemine ge baabeim blimobe. Ni funanoba Ibo ni kukubo nabobo yatemniba ibsa inamine genobta ni ina binobbiobe.
10 Sino ni ibo bekebe binobbio dimo baabenoba Nakae waneta teng abua okoko deibonea bisiabane mole ib imeno mo dokahamibe ge baabenobbiobe.
11 Ni wentebobo naka maki baabeniba Ib isak temo naka maki okoko teng yebua deiboniba besa bianiba eka okok amo naka maki okok kebib biamo i moniba isu ye bianiba i okoko wakaye bianiba weng homon obiam bliobo gesiba wentob kesota baabenomabbiobe.
12 Nib Sume Yesus Klaiste emaye weng olo omye kesoa ni naka eli baabenomabbuo i imaye okok kebianiba unino ilimi dlou unaline gabuobe.
13 Bainobo galin naka unang ibo okoko tengo mo yemone! Sbal maniba ib okoko ayam okok kebianibte!
14 Ni weng olo baabenomabbuo nakae waneta weng olo mo wentim blim kene mole e ibo mo bekebenea eka ibsak esuo mebo mo nanimibe! Ib sinwalo baatlaniba afetu basibta yatemneta ne kukubo misiam biota natneibobo ge funanea aalo waisanota kukub misiamo deiboneko!
15 Ina otane ibo e mo makaalanimibe! Ib bobol temo fumbianiba naka ele ni nek kesoa ni kukub ayam osa bobol tem funin ayam osa alebanomo ge fumbianibte!
Mubiang wengobe.
16 Nib Sume nibo bobol ayam omkaye binabe nakae ibo amitie bobol ayam omkaye bianea daayemeko! Kukub ayam osa misiam osa ib dimo tam tlemo e ibo alukum bobol ayam omkaye bianea bekebe neko!
17 Ne wengo sin ewile om daakelai olole ne besa weng obita naka mak eta dolam daake dane otane klayam blibte genamin weng olole nemaye nene kweilo tubunita dolanamabibe. Ne weng olo dolanamabio inaminobe. Ne weng olo dolaia ibo dolamin olo tekein keniba futan olo bain Fol eta dolanebiobe geine genita dolabibe.
18 Sume Yesus Klaiste ibo alukum daabeneko! Ne wengo bayotabe. Ne Fol neta futan olo dola omfubenamabibe.