16
Yesuse imin hanasebe.
(Matyu 28:1-8; Luk 24:1-12; Yon 20:1-10)
Singkalin amo blimano sonoma Malia Magdala bib ulak osa eka Malia afeto Yemse biem osa eka Salomi osa i wel aayo tang kunin ayamo waloniba Yesuse undimo alibanomo geniba Sande boman tebua moniba Yesuse gloutem unom geniba bebianiba obianiba Waneta tome amite datlabenamabene? ge omomniba moniba temiba tome amite dobdou unibbue daisa dabaiba tanea ken tam unebua amito keim bio kesoa watemniba watniba biin wat unaniba temiba naka tembal make youm namae tekebe dubusanea Yesuse kweile kweitale tofa bine dae toumbia atemniba dlou unaniba tosiansiba baabenea Ibo mo tosianimibe! Ne tekein kebibe, ibo Yesuse Nasalet bib sake atdimo dabasaniba silo biki anaibbu eta hen tebib otane e olo mo biebabe. E hananea unebe. Ibo teniba e dofa unibbuo biin alango watemine gesea i taniba biino watemsiba baabenea Ibo moniba Fita esa eka e okok aleyemin nakai mak isa baabeniba Yesuse makob sino baabenebio inanea sin monea Galili betan ye unamabebo, ibo monibta Galili betan ota atemine ge baabeine gesea unang eli wenteniba kla tosiananiba moniba naka maki baabenamino kimik gesiobe.
Malia Magdala bib ulako Yesuse atemsobe.
(Matyu 28:9-10; Yon 20:11-18)
[Yesuse Sande boman teboa imin hananea mikiktemo monea Malia Magdala bib ulak osu ye motemea atemsobe. Sino o hob misiami 7 bekebo bliba fotebebone biotabe. 10 Malia Magdala bib ulako inanoa Yesuse atemnoa monoa nakaia unangai sino Yesuse bekeba haabinibbue isu ye motemoa 11 i bobolo misiamu bebua mangglom blibo baabenoa Ne Yesuse imin hana tlea atem tlibo ge baabenoa wentib otane i o wengo mo bainobo gebueim blim deibosiobe.
Yesuse okok aleyemin nakai asuei Yesuse atemsiobe.
(Luk 24:13-35)
12 Sinanoa Yesuse okok aleyemin nakai asu keniba Yelusalem bibo deiboniba bebiba Yesuse tlea atemsib otane e kibio afetobe. 13 I inaniba Yesuse atemniba imin moniba e okok aleyemin nakai maki baabesib otane i naka asunai wengo mo wentubenibta bainobo geim blimobe.
Yesuse e okok aleyemin nakai 11 i atemsiobe.
(Matyu 28:16-20; Luk 24:36-49; Yon 20:19-23)
14 Sinanoa e okok aleyemin nakai 11 i ye bianiba imeno wembiba Yesuse tetemea i mo bainobo galin blim kesoa sbal weng baabenea Ib bainobo galino blimobo, naka maki obianiba Yesuse hananea ni atemobobo gabib otane ibo mo bainobo gabibbabe.
15 Ibo moniba nakaia unangai bib mak bib mak olo blibi alukum ne wengo omkayemine! 16 Nakaia unangai wanita ne wengo wenteniba bainobo geniba aaye fuelaib mole Gode daabenea dleb utnea abilim ut danea amit nomabiobe. Otane nakaia unangai ne mo bainobo geim blim keib mole i hengminsa kesoa Gode kot kebenea dlanea moniba aseinin bib unomabiobe. 17 Naka eli bainobo geib mole Gode titilo i ge dlanoa i inamin namin okoko sumo klabianiba eka ne niniino taitneniba nakaia unangai hob misiami bekebe biaibo fotebena yebianiba eka weng afeto i mo tekein kebibbao obianomabiobe. 18 I inab misiami yantamanimib osa eka aa misiamo nakai dowoniba kaanabib aayo dowonaib osa i mo kaanimibbabe. I kweilono nakaia unangai ginin gami melebenimibo i ayam anomabiobo ge baabesebe.
Gode Yesuse debeb ula abilim onsebe.
(Luk 24:50-53; Abosel 1:9-11)
19 Sume Yesuse wengo oyebeo blimanoa Gode debeb utnea abilim ut danea e kweile kweitale kikib ye tounea 20 e okok aleyemin nakai deibaniba moniba Gode dowan wengo bib mak bib mako omkayem haabliba Sume i okoko daaye bianea i wengo omsbal sambea i okok sumo klabiba naka mak unang maki wenteniba bainobo geibbiobe.]