10
1 Ne nekwal ibo wentine! Ne nemaye Islel teni bobolo fumbiania Gode nganha biania God kobo ne meletani Isleli hengmino temo dotlanale ge ohabibe.
2 Ne i kukubo yatemebi kesoa baanamabibe. I Gode okoko sbalma bianiba okok kebib otane i Gode bobol tem funino mo tekein kebibba kesoa i Gode okoko moloto mo okok kemin blimobe.
3 Niminbabe, i Gode kukubo nanea nakaia unangai baabenea Ibo naka molot unang molotobo ge oyebeo i mo tekein keim blimobe. I funaniba Nimaye okok ayamo okok kebianoba Gode kin dimo nibo naka molot unang molot anomo ge funaniba i okoko sbalma okok blib otane i e kin dimo mo molot aim blimobe. Sino Gode baanea Ibo ne bainobo geib mole ne kin dimo naka molot unang molot anomabiobo genebuo i ele weng baanebio iwato mo naim blimobe. I ili bobol tem funin ota nabinibbiobe.
4 Nakaia unangai funaniba Nibo hekmel weng olo kla wafunob mole Gode kin dimo nibo naka molot unang molotobo ge fumbinibbu otane olo bainbabe, dimobe. Bobol tem funin olo Klaiste atdimo kaane kesoa blimanobiobe. E inanebio kesoa nakaia unangai Yesuse bainobo geib mole Gode kin dimo i naka molot unang molot anomabiobe.
Gode nakaia unangai hengmino temo blibi dotlanamabebe.
5 Nakaia unangai Gode hekmel wengo wafuniba Gode kin dimo naka molot unang molot anamin kukubo wengo Mosese Gode buk temo dolanea baanea
Nakaia unangai hekmel wengo alukum kla wafu blibi afen smike doboniba amit nomabiobo genebiobe.
6-7 Ina otane nakaia unangai Klaiste bainobo gabibi Gode baabenea Ibo ne kin dimo naka molot unang molotobo gabebe. Inamin kesoa ibo sinanggwano Mosese wengo Gode buk temo dolanea baanea
Waneta utneta abilim ut unamabene? Eka waneta daakneta ham gloutem daak unamabene? genebuo
o bobolo mo funimibe! Weng olo mitmakamo inaminobe. Nakai utniba Klaiste abilim ut bio debeb daak teniba dabalim ele tenamino blimobe. Niminbabe, Klaiste dabalim ele biebe. Eka nakai moniba ham gloutem unaniba Klaiste debeb ut tenamin osa blimobe. Niminbabe, Klaiste sino imin hananebiobe.
8 Ina otane Mosese weng olo baanea Gode dowan wengo meb ibsu ye buo ib sital dim osa ib bobol tem osa ye bibebiobo genebiobe. Yesuse bainobo galin weng olo ni ibo omkayebuobe.
9 Ibo Yesuse niniino omkeimaniba baaniba Yesuse Sum kesoa e nakaia unanga nisa eka inamin namin osa alukum kima biebo ge baana bianiba eka ib bobol tem osa funaniba Bainobo, Yesuse kaane otane Gode imin dofaanea hananebiobo geib mole Gode ibo hengmino temo blibo dotlanamabebe.
10 Niminbabe, nib bobol temo bainobo gabobo Gode nibo baabenea Ibo ne kin dimo hengmino blimobo gabebe. Eka nibo nib bainobo galino omkeimabob mole Gode nibo hengmino temo biobo dotlanamabebe.
11 Gode buk tem wengo enangge baanoa
Nakaia unangai e bainobo genimibi e bain ele weng baanebio inanamabe kesoa i bobol ilumo mo omfubenomobabo genobiobe.
12 Yuda nisa eka Yudaba ibsa nibo afet afetbabe, makobobe. Niminbabe, nib Sume elekiemobe. Nakaia unangai wanita e nganha bianiba Sum kobo ni daabenale gabibi e i wengo kla wentenea yang kebianea daayebebe.
13 Niminbabe, Gode buk temo baanoa
Nakaia unangai Sume nganha bianiba Kobo ni daabeneba dlone gabibi e i alukum daabenea i hengmino temo blibo dotlanamabebo genobiobe.
14 Nakaia unangai Yesuse mo bainobo geim blim keib mole i e mo nganhamomabibbabe. Eka i e wengo mo wentim blim keib mole e mo bainobo genomabibbabe. Eka naka mak unang maki e weng sango mo omkayemin blim keib mole i e weng sango mo wentomabibbabe.
15 Eka Gode nakai Yesuse wengo omkeimamomabibi mo dlanea unim blim keib mole i mo monibta Yesuse wengo omkeimamomabibbabe. Gode buk temo enangge baanoa
Nakai Gode dowan wengo omeb tlaibi kukub olo dot ayamobo genobiobe.
Isleli Yesuse moton wengo mo bainobo geim blimobe.
16 Ina otane Yuda nakai mo alukumata Yesuse dowan weng olo bainobo geim blimobe, elekiem olokiem ita wente binibbiobe. Sinanggwano Aisaiae kukub olo funanea Gode buk temo dolanea baanea
Sum kobo sino ni keb wengo nakaia unangai omkayebobo nakaia unangai elekiem olokiemi wenteniba bainobo geibbiobo genebiobe.
17 Inamin kesoa nakaia unangai moniba Klaiste wengo omkeimamibo nakaia unangai maki wente bianiba bainobo galomabiobe.
18 Ina otane ne wengo baanamabi ole Yudai Klaiste dowan weng olo mo wente binibbioba bleka? Yeye i wente binibbu otane i mo bainobo geim blimobe. Gode buk temo weng mako enangge baanoa Gode weng omkeimalin nakai Gode wengo omkayebibo alukum bib mak bib mako onon tlanoa nakaia unangai alukum Gode wengo wentebib otane i mo bainobo geim blimobo genobiobe.
19 Eka ne imin baanamabibe, ibo mo funanibta Isleli mo tekein kenibta Ni Gode dowan wengo mo wentim blim kenomobo e omeisenea Yudaba ita omyamabebo geim blimobo genimibe! Yeye, i tekein kebinibbiobe. Sino Mosese Gode buk temo dolanea baanea
God neta nakaia unangai Yudabai kukub ayamo nabenamabi kesoa Yuda nakaia unanga ibo ne kukub ayamo Yudabai nabenimio yateniba bobol wayebua dolnomabiobe. Eka ne nakaia unangai tekein kemin blimi dlonia kukub ayamo omyamabi kesoa Yuda nakaia unanga ibo atliyebua i dolnomabiobo ge baanebo ge baanea dolanebiobe.
20 Eka Gode weng omkeimalin nakae Aisaiae Gode wengo omkeimanea dolanebuo e Yudai tolo mo tosianaim blimobe. E Yudabai Yesuse bainobo genomabibi weng sango dolanea baanea Gode enangge baanea
Nakaia unangai ne mo hembinibbiobai memalo ne bainobo gabiobe. Eka ne tenia nakaia unangai naka mak unang maki mo baabenibta Gode kukubo fatnamine? geim blim isu ye tlania keim aia nateniba ne kukubo kla tekein keibobo ge baana bianea
21 eka e Isleli weng sang osa baanea
Ne amitie Isleli nganyebi otane i ne wengo omdibine bianiba weng misiam onebiobo ge baanebo ge baanea dolanebiobe.