2
Yesuse wengo bainobo galini Efesas bib seli baabesebe.
Yesuse imin baatnenea Kobo weng mako bainobo galini Efesas bibo blibi kima bie nakae weng olo dola omfubaneba enangge baabaneba Awitnino 7 o ne kweile kweitale wafunia eka ayal golo 7 o tem wat haabianita weng olo baabkenamabibe.
Ne ib kukub nabibo yatem tekein keiobe. Ibo okok sumo klabibo mo deibueim blim kesoa ne yatemibe. Ibo inamin namino ib dimo tlebo sbalma blibo ne tekein kebibe. Eka ne tekein kebio ibo naka misiami mo gobe blibbabe. I baabeniba Nisa Yesuse okok dlasanin nakabo gabib otane i Yesuse okok dlasanin nakababe. Eka ibo i wengo kla moton sambianiba i kukub nabibo mitmakamo tekein kebiam nabiobe. I dim omin nakabe. Naka maki yatemiba ibo ne kukubo wafu blib kesoa i kukub misiamo omkayebib otane ibo sbal maniba ne mo deitneim blimobe. Otane ne weng mako baabenamabio ib okoko olokiem ota misiamobe. Sino ibo mema bainobo genib dimo ib bobol temo omneniba gotne blib otane memalo ibo ne klao mo gotne blibbabe. Sino ibo kukub ayamo nabib otane memalo deibonib kesoa sino nabinibbuo imin funaniba ib bobol temo deskinaniba ne omneniba makob mikiktemo nabinibbio inaine! Eka mo inaim blim kenib mole ne tenia ibsu tlania ayal ele obeisenamabibe. Ina otane kukub ayam olo ib dimo sma ye bibebua ibo Nikolase meletani kukub misiamo ibo mo gobueim blim kesoa ib kukub olo ayamobe. Nesa i kukub misiam olo mo gobo blibabe.
Nakaia unangai wanita Gode Hobe wengo bainobo galin nakaia unangai baabene olo wentib mole kla funa omabbaine! Nakai wanita kukub misiamo Yeye geniba ombiaib mole ne Ae ge baabeia asiame nakai dowonaibo i afen smike amit nine dobyenamin asiame dowonomabiobe. As ele Gode damib biebe. Ne wengo bayotabo ge baa dolanale ge baatnene kesoa ne futan olo dolania Efesas bib sel ibo omfubenamabibe.
Yesuse wengo bainobo galini Smena bib seli baabesebe.
Yesuse imin baatnenea Kobo weng mako bainobo galini Smena bibo blibi kima bie nakae weng olo dola omfubaneba enangge baabaneba Ne sinanggwano binabibe eka sinanomosa biamabibe. Sino ne kaai otane imin hanaibua memalo afen bianita weng olo baabenamabibe.
Bobol tem abil osa enin osa ib dimo tlebo ne tekein kebibe. Eka ibo monia inamin naminao blim otane Gode abilimo inamin namin ayamo afen smik osa bobol tem funin ayam osa omkayebeo homonobe. Naka maki ibo weng dobo weng oyebibo ne tekein kebibe. Naka eli baaniba Ni Yuda naka kesoa ni Gode meletanobo gabib otane i Gode meletanbabe. I Gululame meletanobe. 10 Namo namo ibo enin sumo watemomabib otane ibo mo tosianimibe! Wentine! Gululame ibo naatemang genea ib isak temo klabuto gengkamabebe. Eka amo 10 o blimanamabo dimo ibo enin kino watemomabib otane ibo bainobo galino sbalma wafunib mole ne afen smike amit nine dobyamabibe.
11 Nakaia unangai wanita Gode Hobe wengo bainobo galin nakaia unangai baabene olo wentib mole kla funa omabbaine! Nakai wanita kukub misiamo Yeye geniba ombianibbua kaanib mole i imino mo kaanomabibbabe. Ne wengo bayotabo ge baa dolanale ge baatnene kesoa ne futan olo dolania Smena bib sel ibo omfubenamabibe.
Yesuse wengo bainobo galini Fegamam bib seli baabesebe.
12 Yesuse imin baatnenea Kobo weng mako bainobo galin nakai Fegamam bibo blibi kima bie nakae weng olo dola omfubaneba enangge baabaneba Ne skem dang teke kene minime yanga eka minime yanga nanebue afu bli naka neta weng olo baabkenamabibe.
13 Ne ib bibo tekein kebibe. Gululame ib bib olo komok ambia ibo bib olo seli kukub misiamo watemib otane ibo sbal maniba ne niniino nemtouleb bianiba bainobo gabianiba ib bainobo galin olo mo deibueim blimobe. Sino ne inamin namino nabio wengo omkeimalin nakae niniino Antifase ib tem nabianiba e ne okoko sbalma wafu bia o dafao bib olo seli anaiba kaanebio dimo ibo yatemib otane ne niniino mo omwatneim blimobe. 14 Otane ne weng mako baabenamabio ib okoko olokiemo misiamobe. Naka maki ib isak tem ye blibi nakae niniino Belame kukub misiamo sbalma wafu bliobe. Belame kukubo inaminobe. E sinanggwano e dim omin kukubo naka make niniino Belake alebanea baabanea Kobo kukub olo Isleli alebenale gesea e inanea hengmin mako alebenea i kulani god dim omini heitdabeniba dowoniba eka taman kukubo wafuna binibbio inabiobe. 15 Eka naka maki ib isak temo blibi Nikolase meletani kukub misiamo sbalma wafu blib kesoa 16 ibo i baabeniba Ib hengmino deiboniba ib bobol temo deskinaine ge baabeine! Eka i mo inaim blim kenib mole namo namo dimo ne wengo baabenimio makob bainat tobo binain kenia naka eli yananamabibe.
17 Nakaia unangai wanita Gode Hobe wengo bainobo galin nakaia unangai baabene olo wentib mole kla funa omabbaine! Nakai wanita kukub misiamo Yeye geniba ombiaib mole ne abilim imeno memalo ayok buo oyena biania eka tom namao oyenanamabibe. Tom olo oyamabi nakai mema niniino tom olo dim wat dolanita oyamabibe. Tom olo oyamabi nakai imaye i niniin olo tekein kenomabiobe. Naka maki niniin olo mo tekein kenimibbabe. Ne wengo bayotabo ge baa dolanale ge baatnene kesoa ne futan olo dolania Fegamam bib sel ibo omfubenamabibe.
Yesuse wengo bainobo galini Taiataila bib seli baabesebe.
18 Yesuse imin baatnenea Kobo weng mako bainobo galin nakai Taiataila bibo blibi kima bie nakae weng olo dola omfubaneba enangge baabaneba Ne Gode miinobe. Ne kino makob atol eimbo inaminobe. Eka ne skilono makob tom blaso as beselibo tem wat olatousiba kibanoa bining genabo inaibio neta weng olo baabkenamabibe.
19 Ne ib okoko nabibo tekein kebibe. Ib bobol temo naka maki omyeniba ne bainobo galino sbal maniba naka maki daayebibo ne tekein kebibe. Ibo inamin namino ib dimo tam tlebo sbalma blib osa ne tekein kebibe. Ib okoko sino nam tlibbuo ayam otane mema nabibo sino gaisonobe. 20 Ne ib kukubo olokiemo mo gobo blibabe. Unang mako ibsu ye bio yo sinanggwano unango niniino Yesebelo kukubo nabinobuo, osa wafu bianoa baanoa Ne Gode weng omkeimalin unangobo gabianoa dim obo otane ibo mo tolobo geim blimobe. Eka unang olo ne okok nakai taman deib haanin kukub ota aleye bianoa eka kulani god dim omini heitdaye bianiba unalin kukubo aleye biam biobe. 21 Ne funania O bobol temo deskinoko genia deibo biambi temita o mo bainobo genota taman deib haanin kukubo mo deibueim blim keno kesoa 22 wentine! Ne o enin sum osa ginin sum osa omulamabibe. Eka nakai o taman deib omeb haablib nakai i hengmino mo deiboniba i bobol temo mo deskina omnim blim keib mole isa enin sum osa eka bobol tem abil osa omyena biania 23 eka o meletan isa yanaia kaaniba bainobo galin nakai tekein kenomabiobe. Ne nakai bobol tem funino kla tekein kebi kesoa motomania ib isak temo nakai elekiem olokiem i kukubo nabibo molo yang kenamabibe.
24 Otane Taiataila bib sel mak ibo kukub misiam olo mo nabibbabe. Ibo o weng olo aleyebo mo wafunim blim bianiba eka Gululame weng ayok osa mo tekein kebibba kesoa ne kukubo afeto mo omyamibabe. Weng olo baabenimio 25 ibo ib bainobo galino sbalma wafu blibta ne imin tlano! 26 Nakai wanita kukub misiamo Yeye geniba ombianiba ne kukubo wafu biam biniba kaanib mole ne titilo omyia nakaia unangai dabalim olo blibi kimaniba 27 makob ne Aye titilo omnebua nakaia unangai kima bli inaniba isa titilo omoniba Gode meletanbai kima bianiba kukub sbalo omkaye bianiba yebiba kulilamomabiobe. 28 I inamiba ne boman tebuo awitnin osa omyamabibe.
29 Nakaia unangai wanita Gode Hobe wengo bainobo galin nakaia unangai baabene olo wentib mole kla funa omabbaine! Ne wengo bayotabo ge baa dolanale ge baatnene kesoa ne futan olo dolania Taiataila bib sel ibo omfubenamabibe.