15
Mosese ge Miliyami wali Wona
1 Yaka Mosese alonau Isileli wona ya hi wonaan Yehoba elana:
Na wona Yehoba elana, kaiwena Itipita i pakokovel hoti,
hosi ge ali tomatahikan i aliyohiliek hogaa.
2 Yehoba iya o libu gasigasisena, iya i pwamwalau.
Iya no Yabowaine, inoke na tobalan, iya nam wana Yabowaine, inoke na lowasawasa-an.
3 Yehoba iya toasiyala; iya alana Yehoba, iyoho ya i gangan.
4 Kin wana tolohaveyan ge wana waga momomol i aliyohiliek hogaa;
wana toematana waiwaisal hi ununa Hoga Keketina.
5 Hoga i yabomwil; i ola pat hi lobek limwana.
6 Yehoba, nimwam awom ana gasisi i bwata; Yehoba, nimwam awom topihigelgel i tagalekaleka-agil.
7 Alam i wasawasa hot, kaiwena bolo hi awatautau elam u apapanak-agil;
wam huga i tau i ola ginaha ge hi kalas haba hi ola musamusa.
8 Wam yana eliyana hoga u huven papahe; hoga i hin i milil sapu i ola baba; hoga limwalimwanina i milil i gasisi.
9 Topihigelgel hi hanaha hi ba, “Ta tatauliulil-agil, inoke ta kukuhikagil,
ge wali gogomwau ta ahe ta guyauan, he toto nuwala gegewena ta bugulan.
Haveyan kilepana ta momol tagilan abanaa, inoke Isileli ta apapanak-agil.”
10 Yaa Yehoba, wam yana elana hoga u huven yaka i yabomwil, hi lobek hi ola patbon hoga lolovakunina elana.
11 Yehoba, henala eba ni ola owa yabowaine ona gamwaliyaa? Nige etega.
Henala eba ni ola owa, kaiwena u bwabwalena hot? Nige etega.
Am lovakun i bwata ge gamagalau nihi tobalagiwa, kaiwena owa toginol yawiyawi.
12 Nimwam awom u paelu, yaka bilibili am topihigelgel i tinonil.
13 Iyaka u pwamwalima, inoke alona wam nunuwana nasi nu houwa-agima;
wam gasisi elana nu nulima naha tuka panuwa bwabwalena toto aloma owa ta minaa.
14 Labi ona wasa nihi hago, yaka lovakun kaiwena nihi ginu; ati bwanabwana Pilistiya ni yowanil.
15 Labi Idom ana tonowakau nihi lovakun nabi, Mowabi ana tohouwa nihi ginu.
Kenani gamagaliliyau tuwaliya ni sasawowol;
16 lovakun ge ati bwanabwana amnanina nihi kalaopopwi.
Yehoba, wam gasisi elana, yaka nihi mibabakuhu nihi ola pat,
ana siga ama wam gamagalau bolo u pwamwalima naha nopalegel.
17 Inoke abwe nu ahema ge nu en telema wam oya elana.
Yehoba, panuwa o iyaka u hile wam abamina, labi bwabwalena toto Babala totom u ginol.
18 Yehoba, owa nu tologugui sauga gegewena nige ni momowasi.
19 He Isileli hoga hi nosolaan hi nawaa datu pwatanaa, yaa sauga Itipita wali waga momomol ginebi wali hosi ge ali tomatahikan hi ulutuk hogaa, yaka Yehoba hoga i pabini pasikal ge i yabomwil.
20 Inoke Eloni nuna Miliyami, iya palopita, wana tambalin i ahe, yaka evenakau gegewel i houwaagil ginebi wali tambalin hi sagasaga.
21 Miliyami i wona i ola:
Ku wona Yehoba elana, kaiwena Itipita i pakokovel hoti,
hosi ge ali tomatahikan i aliyohiliek hogaa.
Isileli Hi Nawanawa Hi Na Oya Sainai
(15:22–18:27)
Wewel bolo Mala ge Ilima
22 Yaka Mosese Isileli i nulil Hoga Keketina hi tataluwai hi noek Sula Ulaina elana, labi kekekevana. Lan eton hi nawanawa uleya, yaa nige wewel etega hi pwapwawa.
23 Sauga hi vin panuwa Mala, he wewelina amnana i nak, yaka nige bosowailiya nihi im. (Heiya te kaiwena alana hi tun Mala.)
24 Yaka gamagalau Mosese hi lovehawol-an, ge hi nel hi ba, “Hauna ta im e?”
25 Yaka Mosese i awanun nabinabi Yehoba elana, inoke Yehoba ebwakil etega i pankite ge i ahe i alilowana wewela, yaka wewel amnana i waisi.
He panuwa o elana Yehoba Isileli ali logugui i pek ge i labosel.
26 I ba, “Ebo nau Yehoba wami Yabowaine anau nuku hago bubun, wami ginol ni sapu matawa ge no logugui gegewena nuku henapuan, inoke gila ololana ya pek Itipita elal nige etega na pepewa. Nau Yehoba ami topwapwamolu.”
27 Yaka abwe hi na Ilima. He wewel bwanapitpit elulutega eluwa (12) ge deit puna sebenti (70) heliya iyoho to, inoke hi holaviya wewel bebenaa.