Leta Etonina Diyon I Leli
Baaba Houwan
Diyon leta ya i leli ge i patuna tau etega alana Gaiyas elana. Diyon Gaiyas i tobalan kaiwena wana pagan te topapaatena nawanawa ni ahel ni matahikagil wana limiya ana siga nihi nok al nihi na panuwa etega al elana. Abwe Diyon Gaiyas i ba pagasisi bahi ni giginol ni oola tau etega alana Diyotilipes. He Diyotilipes iya ekelesiya ana tohouwa etega labi o elana, yaa iya i pihigelgel topapaatena nawanawa elal. Yaka abwe Diyon tau etega al Demitiliyas ana awa wawaisi i baunan Gaiyas elana. Ana awa i ola Demitiliyas iya topapaatena nawanawa etega ge Diyon nuwana ni pamasal Gaiyas elana inoke Gaiyas ni labe. Tabam Demitiliyas leta ya i noahe.
1
Nau ekelesiya ana tohouwa leta ya ya leli ge ya patuna i nowa Gaiyas eliyam, owa no heliyam nunuwanina ya nunuwana-agiwa hoti.
No heliyam nunuwanina, ya awanun te nu molu bubun ge bugul gegewena ni waisi eliyam, ni ola yayaluwam elana bugul gegewena i waisi. Ya yaliyaya nabi, kaiwena talilau enuna hi nem no wasa hi pem owa baaba tutunahotina u toulil, hi ba, “Baaba tutunahotina ana kamwasa elana i nanawaa.” He sauga ebo wasa ya hago natuwau baaba tutunahotina ana kamwasa elana hi nanawaa, inoke ya yaliyaya nabi, yaliyaya o no yaliyaya gegewena i bwata lake.
Keliso wana Totuwalali Ta Label
No heliyam nunuwanina, tuwalali waiwaisana te u awaawaginol, kaiwena talilau bolo topapaatena nawanawa u lalabel, bwagana ebo nige u aatenal. He heliya wam nunuwana wasana iyaka hi wasaan toekelesiya labi ya elal. Inoke sauga ebo tonawanawa ololal o nuwaliya nihi novevehe al, nuwau nu label wali nawanawa kaiwena, ni ola te Yehoba u lalabe o. Keliso wana tuwalali kaiwena te hi tagil ge hi nawanawa, ge nige ali labe hi aaheya bolo nige toabulilek i oola elal. Inoke kila toekelesiya gamagalau ololal o ta label, inoke kila ta ola wali totuwalali baaba tutunahotina ana tuwalali elana.
Bahi Nu Giginol Ni Oola Diyotilipes, Yaa Demitiliyas Nu Labe
Ekelesiya wali leta etega valila ya ginol, yaa Diyotilipes wama baaba nige i hahago, kaiwena iya nuwana te ni logulogugui ya. 10 Inoke sauga ebo na nowa, wana ginol gegewena na ba pamasal. He iya baaba nanakina i baubaunan ge i loloba kaiwema. Yaa nige tage i loloba ya te kaiwema, yaa talilau bolo topapaatena nawanawa nige i yoyoga pahel. Ge i ola al ebo alonau enuna nuwaliya nihi yoga pahel, he i lolopwalil ge i papatuna owaowa-agil hi tatagil ekelesiya elana.
11 No heliyam nunuwanina, bahi pagan nanakina nu aawapupune, yaa pagan waiwaisana nu awapupune. Henala ebo pagan waiwaisana ni awaawaginol, he iya Yehoba natuna. Henala ebo pagan nanakina ni awaawaginol, he iya nige sauga etega Yehoba i kikite ge i aatena.
12 Gamagalau gegewel Demitiliyas hi awa wawaisi-an iya gamagal waiwaisana. He iya baaba tutunahotina ana kamwasa i toulil, inoke toto ya i pamasal al te iya gamagal waiwaisana. I ola al, wana pagan ama ha awa wawaisi-an, ge u atena ama wama wasa i tunahot.
Nuwatu Mowamowasena
13 No nuwatu hi gewi iyoho bosowaina na pamasal eliyam, yaa nige nuwau pepa ge pen na patuwalali-agil. 14 Ya nuwatu te sauga kekeisi abwe na nowa na kitewa, inoke maninila ta pahanalivaso ge ta liwaliwan.
15 Yehoba wana nuwa laumwal ni minaa atemwa.
Wam heliyamwau labi ya elana hi mulolu eliyam. Nau no mulolu nu baunan no heliyamwau maisena ge maisena elal labi ei elana.