12
Mwata Bwabwatana alona ge Yova Baliya
Inoke etotohi gegetogana ge bwabwatana etega ya kitek labulabum tuwanaa. Yova etega ya kite, ana kaliko i ola sabwelu, waikena i minaa aena gabulanaa, ge ana hanahana putum elulutega eluwa i minaa kokowanaa. I liyan, ge i yowalu wawaya matana lomwanina kaiwena.
Inoke etotohi etega al ya kitek labulabum tuwanaa. Mwata bwabwatana keketina etega ya kite, kokowana ana gewi seben ge ana hon ana gewi elulutega, ge kokowana maisena ge maisena ana hanahana i gan. Ulina eliyana putum awalehina, ana bwata i ola wan ted (1/3), i hala palolobalem labulabumwa hi lau hi tala panayawiya. Yaka i na i talmilil yova toto wana sauga ab awonaa, ge i matamatan sauga natuna ni masal inoke ni tinon. Yova i ab natuna melutau, ge wawaya ya alona wana gasisi bwalibwaligena labi gegewena gamagaliliyau ni logugui-agil. Wawaya o aneloseyau hi ahe i ha Yehoba eliyana, iya i miminaa wana abamisiyo wawasana elana. Yova i lou i na labi kekevana elana, labi o abamina etega iyoho to Yehoba i lovivina-an kaiwena, inoke nihi matahikan lan ali gewi wan tausan tu handeled sikisti (1,260).
Yaka haveyan i masal labulabumwa. Maikol* alonau ge wana aneloseyau hi lohaveyan mwata elana, inoke mwata alonau ge wana aneloseyau hi tagalahi. Yaa mwata nige i gagasisi, inoke Maikol wana boda mwata alonau ge wana boda hi takel tagilagil labulabumwa. Yaka mwata bwabwatana alonau ge wana aneloseyau hi alilowagil hi lau panayawiya. Iya mwata houhouwena, alana hi ba Debol o ebo Seitani,* ge iya panayawi gamagaliliyau gegewel i pagegel. 10 Inoke anan bwabwatana etega ya hago labulabumwa i ba:
“Yehoba wana gamagalau iyaka i pwamwalil,
wana gasisi iyaka i ahe ge i tologugui,
ge wana Mesaiya wana
logugui ana gasisi iyaka i pankitela,
kaiwena talilau ali towoliwoli,
iya lan ge bulin i wolel wala Yabowaine matanaa,
iyaka aneloseyau hi alilowanem labulabumwa.
11 Talilau wali gasisi i neem
Sipi Natuna saliyana elana,
heliya wasa waiwaisana hi wasaan gagasisi,
ge yawaliliya hi talamwan yoho,
inoke toto o eliyana ali
topihigelgel Seitani iyaka hi pakokove.
12 Tomilabulabum ku gewigewi nuku yaliyaya!
Yaa hauna nak geb komiu tomipanayawi ge komiu
bolo ku miminaa hogaa eliyamiu,
kaiwena Seitani iyaka i lowa eliyamiu!
Iya iyaka i huga nabi,
kaiwena i atena wana sauga iyaka i kaubwa.”
13 Sauga mwata i atena age iyaka hi alipalo panayawiya, inoke i lopetaki nuwana yova ni lib, yova toto i ab natuna melutau. 14 Yaa Yehoba magisubu bwabwatana opena labui i pek yova elana, inoke i you i na abamina toto Yehoba i lovivina-an kaiwena labi kekevana elana, ge ana bwaga ni yapu mwata elana. Inoke hi matahikan sauga ana yapu ni ola baliman eton ge awalehina.* 15 Mwata wewel i koyapuli-an i tagilem gamwanaa i ola wewel i sasani, inoke tage wewel o yova ni yale yoho. 16 Yaa bilibili yova i labe, bilibili awana i tanal, inoke wewel toto mwata i koyapuli-an i tinon. 17 Yaka mwata i huga nabi yova elana, ge i nok i na haveyan ni ginol yova tubutubunau gegewel al elal, bolo Yehoba wana logugui hi henapuan ge Yeisu wana panpankiti hi toulil.
18 Inoke mwata i na i talmilil talbwasiya.
* 12:7 Maikol iya aneloseyau wali tohouwa bwabwatana etega, ge iya boda Isileli ali tomatahikan, iyoho i pamasal Daniyela 12:1 elana. * 12:9 “Debol” pana Gilik, ge “Seitani” pana Hibilu, ali sapu te “Towoliwoli” o ebo “Topihigelgel.” * 12:14 Baliman eton ge awalehina, he lan ali gewi 1,260 to, i ola puna 6 ana baaba.