Yaka Deibid Gat i eguluwan i na i miminaa gol etega panuwa Adulam labenaa labi Yuda. He tutunau ge bolau hi gewi al hi na hi tubwi elana, gegewel ali gewi po handeled (400). Yaka i na labi Mowabi ana kin elana ge i patalam tamana ge hinana nihi miminaa to. He iya i na i minaa ababunsumi* etega elana. Abwe palopita Gad i baek elana i ba, “Bahi nu miminaa te. Nu sikal labi Yuda.” Inoke i ginol ola to, i na panuwa Helet ulaina elana ge i miminaa ga to. (puna 1-5)

Sol alonau wana totuwalali hi minaa wana panuwaa Gibeya. I baek elal i ba, “Ga i ola ku olak Deibid elana ge ku pihigelgel elau?” Yaka Doegi gagama Idom Sol wana wasa i pek i ba, “Ahimelek Deibid i labe i nel Yehoba elana ga ni ginol ola. I ola al, beleid ge Golaiya wana haveyan kilepana i pek elana.” (puna 6-10)

Inoke Sol topowon Ahimelek alonau tutunau i yogaagil hi nem ge i baek elana i ba, “Ga i ola ge alom Deibid wami nuwatu ku teli pamaisena nuku pihigelgel elau? U labe, ge sauga ya i matamatan wana sauga waiwaisana yaka ni lopaaligau.” (puna 11-13)

Anana Ahimelek i lahe i ba, “He wam totuwalali gegewel gamwaliyaa Deibid te i waisi hot bosowaina ana mel nu teli, age? O kin, nige no aatena kekeisi i gagan tage gamagal etega nuwana ni lopaaligawa, inoke bahi alowau tutuwau nu wowolema ni oola.” (puna 14-15)

Yaka abwe Sol i ba tolohaveyan bolo hi talmilil labenaa Ahimelek alonau wana pan topowon nihi lolil, yaa hi towa. Inoke i ba Doegi gagama Idom ni ginol. Yaka iya topowon ali gewi eiti paib (85) i lopaaligal. Yaa Ahimelek natuna Abaiyada i lou i na i miminaa Deibid elana. (puna 16-23)