25
Deibid alonau Nabal ge Abigeil Liwaniliya
1 He Samuwela i aliga, yaka Isileli gegewel hi migogo ge wana yaomal kaiwena hi kahikahin. Inoke tuwana hi teliya wana panuwaa Lama.
Yaka abwe Deibid i na i minaa labi kekevana alana Palan.
Maon tonowakina etega alana Nabal wana bilibili i gan panuwa Kamel gegelinaa. Iya wana sipi ge goti hi gewi nabi. Sauga etega Deibid wasa i hago te Nabal ge wana totuwalali iyoho wana sipi pupunoliya hi tomwatomwa. He yaliyaya ana sauga to. Inoke Deibid wana hevalau ali gewi elulutega i patunal hi na wana awanun hi baunan hi ba, “Valila wama pagan i waisi wam sipi ali tomatahikan elal, inoke yaliyaya ana sauga ya elana tab bosowaina aanan kekeisi nu pem?” Yaa Nabal i towa ge Deibid i sisinali-an. Sauga hi sikal ge Deibid wana wasa hi pek, yaka i huga, inoke alonau wana hevalau ali gewi po handeled (400) hi egon tage nihi na Nabal nihi lahe wana ginol kaiwena. (puna 2-13)
Totuwalali etega Nabal lagona Abigeil wana wasa i pek Deibid wana elopapatuna ga hi ba ola ge Nabal wana ginol kaiwena. Yaka Abigeil aanan waiwaisana i bwata i usan donki elal ge wana totuwalali i patunal, yaka iya al i nok. Inoke Deibid alonau wana hevalau i pwawal kamwasaa hi nenem Nabal ge wana boda nihi lopaaligal. Yaka i kululu Deibid awonaa ge i ba, “Bahi nu nuwanuwatu Nabal wana ginol kaiwena, kaiwena iya tokokona. Yehoba iyaka i kausiwa bahi totom nu tatagalahi ge gamagalau nu lololil saliyaliya ni lalau. Tunahot Yehoba ni telewa nu tabwa kin ge ni ba tubutubumwau emwa nihi kin al.” Wana baaba Deibid i yaliyaya-an ge wana mulolu i ahe nimanaa. (puna 14-35)
Sauga Abigeil i sikal wana limiya, Nabal iyaka i im kokona, inoke nige wana wasa i pepek ga i ginol ola. Lan i gan ge imwim wana gasisi i so, yaka wana wasa Abigeil i pek hauna iyaka i gan. Sauga o gila etega i masal Nabal elana ge tuwana i aliga, yaka lan elulutega i mowasi abwe Yehoba i paaliga. Wasana Deibid i hago inoke i ba, “Yehoba ta tobalan, kaiwena nau i kausau bahi nak na giginol, ge Nabal i lahe wana ginol kaiwena.” Yaka abwe baaba i patuna Abigeil elana ni tabwa iya lagona. Inoke alona wana yaliyaya i talam ge i nok Deibid elana i tabwa lagona. He valila Deibid Ahinowam Diyeslil yovana i alolonan. Yaa Sol natuna Mikal, iya Deibid lagona, iyaka tamana i pek tau getoga elana i alolonan. (puna 36-44)