23
Deibid wana Wona Mowamowasena
1 Tomihahaina Hot abamina bwabwatana i pek Deibid Diyesi natuna elana,
Yakobo wana Yabowaine i hile ni tabwa kin, ge iya Isileli wali wona waiwaisal ana totomwatomwa.
He wana wona mowamowasena ana baaba i ola hiwe:
2 Yehoba Yayaluwana wana baaba i baunanim na baunan, iya wana liwaliwan elau na pamasal.
3 Isileli wala Yabowaine, iya wala Pat abalou, i baem elau i ba:
“Ebo gamagal etega ni tologugui alona wana ginol sasapona, ebo ni nul alona nau Yabowaine o lovakun,
4 he iya i ola sabwelu matakululuna sauga i haha mwelulugaa, nige ana yaluyalu,
i ola kehe mwawin i pahun i siun bilibiliya, ge sabwelu i yane namanamalina.”
5 Nau alowau tubutubuwau Yabowaine i hilema naha kin. Wana bateli i baunan eliyau ni mihot, bateli o iya i nuwatuan ge ni patunahot.
Sauga gegewena i pwamwalau ge waisi toto nuwau nasi ni ba ni gan.
6 Yaa gamagalau nanakil ni apapanak-agil ni ola pepesala ta tomwa yohil, heliya nige bosowaina niman elana ta libhikagil.
7 Nige bosowaina nimala awawana elana ta tuwalali-an, iyai te etuwalali aiyan ge ebwakil elana bosowaina ta tomwa palol, yaka abwe ta pahel ge ta ton olagil.
Deibid wana Tolohaveyan Gasigasisel
Deibid wana tolohaveyan gamwaliyaa, enuna alaliya i bwata, kaiwena heliya toasiyala ge ginol gasigasisel enuna hi ginolil haveyan enuna gamwaliyaa. (puna 8-39)