Kareba Kadoresan nauki'
Matius
Pungngu' tannunna
Inde sura'e nauki' mesa passikolana Puang Yesus disanga Matius, untetteran Kareba Kadoresan kumua Puang Yesusmo To dibassei bayu-bayu la ma'pasalama' to mangka nadandi Puang Allata'alla. Puang Yesus digente' “peampoanna tomaraya Daud” (1:1; 9:27; 12:23; 15:22; 20:30-31; 21:9, 15; 22:41-45). Nauki' toi duka' pengkaranganna Puang Yesus ungganna'i angganna kadanna Puang Allata'alla mangka napayolo lamban nabi (bacai: 1:22-23; 2:5-6, 15, 17-18, 23; 3:3; 4:14-16; 8:17; 12:17-21; 13:35; 21:4-5, 16; 26:31; 27:9-10).
Puang Yesus nadadian mesa to Yahudi anna kamai illalan alukna to Yahudi, sapo Kareba Kadoresan nabaa, battu' dikua kasalamasan, tae' angga umpatu lako to Yahudi, sangngadinna lu lako angganna ma'rupa tau illalan lino.
Illalan inde sura'e, pembuda-buda mantula' Puang Yesus kumua la ma'parentami Puang Allata'alla. Dengan toi duka' untetteran kalembasanna Pepa'guruanna Musa.
Dengan lima to'na tula'na Puang Yesus: (1) Pepatudu napalanda' Puang Yesus yao mesa tanete, untetteran la sipato'na napogau' to unturu' tongan Puang Allata'alla (5:1-7:29); (2) pepakari'di' lako passikolana la umpalako manappa pengkarangan nabeenni Puang Yesus (10:1-42); (3) pira-pira tandengan naoyong Puang Yesus la naola umpomakaleso kaparentaanna Puang Allata'alla (13:1-58); (4) pepatudu umba la nakua panggauanna to unturu' Puang Yesus (18:1-35); anna (5) allo ma'katampakanna anna kasaeanna Anak Mentolino (24:1-25:46).
Lesoanna issinna
1. Rettenanna kabuttuanna Puang Yesus anna kadadianna (1:1-2:23)
2. Pengkaranganna Yohanes to simantedok (3:1-12)
3. Puang Yesus ditedok anna nasudi ponggawana setang (3:13-4:11)
4. Pengkaranganna Puang Yesus dio Galilea (4:12-18:35)
5. Penonosanna Puang Yesus mengkalao dio Galilea sae langngan Yerusalem (19:1-20:34)
6. Katampakanna pengkaranganna Puang Yesus dio Yerusalem anna lako tondok sikadappi'na (21:1-27:66)
7. Katuoanna sule Puang Yesus anna pa'pakari'di'na lako passikolana (28:1-20)
1
Rettenanna kabuttuanna Puang Yesus
Luk. 3:23-38
Kabuttuanna Yesus Kristus peampoanna tomaraya Daud, peampoanna Abraham, susi inde laoannae:
Keanak Abraham dadi Ishak,
keanak Ishak dadi Yakub,
keanak Yakub dadi Yehuda anna angganna sirondongna.
Keanak Yehuda dadi Peres anna Zerah nasibalii Tamar,
keanak Peres dadi Hezron,
keanak Hezron dadi Ram,
keanak Ram dadi Aminadab,
keanak Aminadab dadi Nahason,
keanak Nahason dadi Salmon,
keanak Salmon dadi Boas nasibalii Rahab,
keanak Boas dadi Obed nasibalii Rut,
keanak Obed dadi Isai,
keanak Isai dadi tomaraya Daud,
keanak Daud dadi Salomo nasibalii ambo' bainena Uria,
keanak Salomo dadi Rehabeam,
keanak Rehabeam dadi Abia,
keanak Abia dadi Asa,
keanak Asa dadi Yosafat,
keanak Yosafat dadi Yoram,
keanak Yoram dadi Uzia,
keanak Uzia dadi Yotam,
keanak Yotam dadi Ahas,
keanak Ahas dadi Hizkia,
10 keanak Hizkia dadi Manasye,
keanak Manasye dadi Amon,
keanak Amon dadi Yosia,
11 keanak Yosia dadi Yekhonya anna angganna sirondongna. Attu iatoo dipali' to Israel lako Babel.
12 Mangkai pampalisan lako Babel,
keanak Yekhonya dadi Sealtiel,
keanak Sealtiel dadi Zerubabel,
13 keanak Zerubabel dadi Abihud,
keanak Abihud dadi Elyakim,
keanak Elyakim dadi Azor,
14 keanak Azor dadi Zadok,
keanak Zadok dadi Akhim,
keanak Akhim dadi Eliud,
15 keanak Eliud dadi Eleazar,
keanak Eleazar dadi Matan,
keanak Matan dadi Yakub,
16 keanak Yakub dadi Yusuf muanena Maria to undadian Puang Yesus to digente' Kristus battu' dikua To dibassei bayu-bayu la ma'pasalama'.*
17 Dadi, mengkalao dio Abraham sae lako tomaraya Daud, sapulo appa' lapikna. Mengkalao dio Daud sae lako attunna pampalisan lako Babel, sapulo appa' lapikna. Anna mengkalao dio attunna pampalisan sae lako kadadianna Kristus sapulo appa' duka' lapikna.
Kadadianna Puang Yesus
Luk. 2:1-7
18 Kadadianna Yesus Kristus, susi inde uleleannae: Maria indona, situmai Yusuf. Sapo ta'pa sidapo' anna manambukmo ura'na kakuasaanna Penawa Masero. 19 Inde Yusuf-e mesa to malolo, iamo nangei morai la kumassoro'. Sapo la napomatimmin annu moka la umpakasiri' tumainna lako tau kamban.
20 Inde anna penawa-nawaan liumi Yusuf la kumassoro'e, mangngimpi napellambi'i malaeka' nasua Dewata, ma'kada lako nakua: “O Yusuf peampoanna tomaraya Daud, dau marea' umpobaine Maria, annu itin anak natambukko ura'na kakuasaanna Penawa Masero. 21 La muane anakna anna la musangai Yesus annu la umpasalama' petauanna dio mai kasalaanna.”
22 Ia nangei dadi susi anna malara lemba' battakadanna Puang Allata'alla napalanda' nabinna nakua: 23 “Patanannia' talinga, itin anak darao la manambuk, la muane anakna anna la disangai Imanuel.” Imanuel kalembasanna “Nasolaangkia' Puang Allata'alla”.
24 Millikki Yusuf, napogau' tongammi susi mangka natulasanni malaeka'na Dewata napolalan umpobaine Maria. 25 Sapo tae' dengan siballa'i sambu' sae lako dadi anakna, muane. Yusufmo ussangaii Yesus.
* 1:16 To dibassei bayu-bayu la ma'pasalama': Illalan basa Yunani dikuaan Kristus, illalan basa Ibrani dikuaan Mesias. 1:21 Yesus: Kalembasanna ‘Dewata ma'pasalama'.’