10
पोलु तना सेवाता लोप्पा वेहतह्तोग़
1 “ओग़ मावा संगे मनदह्पा उड्ला बुदते मन्ह्तोग़, मयग्डाहि जेक मनदह्पा बारा पका कळक मन्ह्तोग़,” इनजोर नाक मन्कलोर इन्ह्तोर. इंजेके ननाय पोलुनन, गूनमते वळ्ह्कवाल, कुलुल बुदते मनवाल किर्स्तुना पेदिरते मीक उंद पोल्लो वेहतह्नन:
2 अद इद्रम मन्ह्ता: “पोलुर दुनियातोरा लेह्कान ताकिह्तोर,” इनजोर मियगा वावालोर उच्वुर मन्कलोर माक पास्किह्तोर. नना अके वातस्के ओरिन कळकते वळ्ह्ककन इनजोर विचर कीयलाह आतन, मति मीवा संगे नना अद्रम वळ्ह्कनाह आयमाकि! नना मीक अर्जि कीय्ह्नन.
3 इह केंजाट! माट वने दुस्रोरा लेह्का दुनियातेन मह्नोम! मति दुनियातोरा लेह्का लळेम आयोम.
4 माट इद दुनियाता बुदते, तेल्वते वने लळेम आयोम, मति देवुळता लावते लळेम आय्ह्नोम. लळेम आसि मन्कना बुदते बेसता कबुरता अडम मेग़्किस मनदनव सबे विचर्किन बूळे कीय्ह्नोम.
5 मन्कना बुदते विचर कीयनदिन आरे कीय्ह्नोम, अहे देवुळतुन पुनवाह कीयनद मोर्दोप बुदताङ सबे पोल्लोन आरे कीय्ह्नोम. मन्कलोरा उंद-उंद कैंगम विचरतुन मिळ्हचि किर्स्तुना पोल्लोतुन केंजनाह कीय्ह्नोम.
6 मीट किर्स्तुना उकुमता लेह्कान पूरा ताकलाह आयकिर अस्के, “माट अद्रम ताकोम” इनवालोर सबेटोरिन सिक्सा ईयलाह माट तयर मह्नोम.
7 मीवा मोकम मुनेह बेव पोल्लोङ दिसिह्ताङ, अविना लोप्पा बेस विचर कीम्ह्टु. “नना किर्स्तुना मन्कनन” इनजोर इनवाल मन्कल, तना किर्स्तुना मन्कल आतप लेह्कान, माट वने किर्स्तुनोरोम आंदोम इदिन पुनेग़!
8 मीवा विस्वसतुन बेर्सिह कीयलाह, सामि माक अदिकर ईतोग़, तान बूळे कीयलाह आयो. इद्रमता अदिकर ईता इनजोर नना पका पोंगतेक तेला, ताना लोप्पा लजा आयोन.
9 “तना सीटटाङ पोल्लोने ओग़ माक रेयपिह बह केवोग़!” इनजोर विचर केमाट. नना अद्रम केवोन.
10 नना इद्रम बाराह्कु वेहतह्नन इतेके, “पोलु तनाङ सीटिने बेराङ-बेराङ, पका कळक पोल्लोङ रासिह्तोग़, मति मावा संगे मनदह्पा लावलेवप लेह्कान दिसिह्तोग़, ओग़ बेस-नेह्ना वळ्ह्क पुनोग़,” इनजोर उच्वुर इन्ह्तोर.
11 अद्रम इनवालोर मन्कलोर इद पोल्लोतुन पुनिर: मियग्डाहि जेक मनदह्पा मावाङ सीटिनाङ पोल्लोने बेद्रम मावा अदिकर तोहतह्नोम, अद्रमलेह्काने मीवा संगे मनदह्पा वने मावा अदिकर अचोने ताकिह्ता.
12 उच्वुर तम्क बेचोन बेरोरोम इनजोर तमाय कबळतुन ऊळिस इन्ह्तोर. तमतमाय निच जोकिस ऊळिह्तोर ओसो तम्क बेरोरोम इनजोर इन्ह्तोर. अद्रमतोर मन्कलोर तेल्वलेवोर आंदुर. माट कोनि ओरा मुडोरोम आयोम, ओरा संगे निच जोकिस ऊळवालोरोम आयोम, ओरे तेला बेरोर आयिर, माट अचोटोरोम आयोम!
13 मति मावा लोप्पा वेहतह्नन: माट केवद कबळता लोप्पा पोंगवालोरोम आयोम! मियगा एव्स मनजि बेसता कबुरतुन पोकुर कीतोम, इद देवुळि ईतद कबळ आंदु. बेचोन कबळ देवुळि माक ईता, अचोने कबळता लोप्पा माट पोंगवालोरोम आंदोम.
14 माटे मुने मियगा किर्स्तुना बेसता कबुरतुन ततोम. अदिनेनाह्क मियगा माट कीसीतद कबळता लोप्पा माट पोंगतेक वने बार आयो, मावा अंदतुन वेंडिस अतप लेह्का आयो.
15 दुस्रोर कीतद कबळतुन माटे कीतोम इनजोर पोंगवालोरोम आयोम; मीवा विस्वस बेर्सनेक-बेर्सनेके, मीवा पटटगा मावा सेवा वने पका बेर्सनाह आयग़ा इनजोर इद्रम आसा मन्ह्ता. मति देवुळि बेचोन अंद ईयग़ा अचोने कीकोम.
16 पेग़्के मीवा पटटा अबर वने बेसता कबुरतुन पोकुर कीयनाह आयग़ा. अगा बोग़े सेवा केवव पटिनगा माट अतेके, दुस्रोर कीतद कबळतुन माटे कीतोम इनजोर पोंगनद पोल्लो पेसो.
17 मति देवुळता सास्त्रमतगा रासतप लेह्का, “पोंगवाल मन्कल सामि कीतद कबळतुन सीता कीस पोंगेग़.”
18 नना अदिकरतोनन इनवाल मन्कनगा, सामि ईतद अदिकर इले; मति सामि बोन्क अदिकर ईस्तोग़, ओग़े निटम अदिकरतोग़ आंदोग़.