3
देवुळता पूना करलतुन पोकुर केवालोर बळयिर
1 इद्रम रासताह्कु माट मावाय लोप्पा ओसो वने पोंगिह्नोम इनजोर इह्निर बहे? अद्रम आयो! वेर सेतेम मन्कलोर इनजोर दुस्रोर मन्कलोर मावा लोप्पा रासतद सीटटुन मियगा ततलाहि माक गर्ज इले. माट दुस्रा नाग़ दायह्पा मियग्डाहि अद्रमता सीटटा गर्ज वन इले. उच्वुर मन्कलोर अद्रम कीस्तोर, मति माट केवोम.
2 मावा मेटे मीट विस्वस कीताह्कु, माट सेतेम मन्कलोरोम इनजोर तोहतनद सीटटा लेह्काडोरिर मीटे, पुनविरा? मीट मावा जीवातगा रासतद सीटटा लेह्कान आतिर. माट मीक बेचोन जीवा कीय्ह्नोम, मीवा बेचोन पर्वा कीय्ह्नोम इनजि, माट बेक अतेकाय, सबेटोर ऊळिसि पुन्ह्तोर.
3 किर्स्तु रासिसि मावा कयदे लोहतद सीटटा लेह्कान मीट मह्निर इनजोर सबेटोर पुतोर. अद सीटि सयते रासतद आयो, मति जीवात मनदनद देवुळता जीवाते रासतद मन्ह्ता. मोसानाङ अडोना लेह्का तेप्ळे बंडानगा रासतद आयो, मति मन्कलोरा जीवातगा रासतद मन्ह्ता.
4 किर्स्तुना मेटे देवुळतगा मावा पूरा बर्वस मताह्के, माकु इव पोल्लोन वेहतलाह दीरा दोर्कता.
5 माट इव सबे कबस्क मावा बुदते कीया पग़वोम, अदिनेनाह्क माटे इविन कीतोम इनजोर इनोम, देवुळिये मावा कयदे सबे आया पग़नाह कीता.
6 देवुळि इंजेके मन्कलोरा संगे पूना करल कीता. अद करलतुन पोकुर कीयनद सेवा कीयलाह माक ओप्पे कीता. अद पूना करल मोसाल रासतव अडोना इसबते आयो, मति देवुळता जीवाता इसबते आंदु. बोग़े रासतव अडोन पूरा नोम पग़वोग़, अदिह्क अव माक हामुरतेके ओसीस्ताङ. देवुळता जीवा बार माक अमेसाता पिसमुळतके ओसीस्ता.
7 मुनेता करलताङ अडोङ तेप्ळे बंडानगा रासतव मताङ. अविस्किन इस्रयेल मन्कलोरगा ईयह्पा, मोसाना मोकमतगा देवुळता डीसाता वेह्च मांजसोर मता. मति अद वेह्च कमि आनेक वने, ओर ओनगा मांजनदिन ऊळ पग़वोर. अडोना सेवा मन्कलोरिन कसुरतोर कीसि ओरिन हामुरतके ओसीस्ता इनजोर वेहतने. हामुरतके ओसीयनद सेवातगा अचोन लाव मतेक अचोन,
8 देवुळता जीवाता सेवातगा तान्काय एक्वा लाव मनो? मन्ह्ताये.
9 मन्कलोरिन कसुरतोर कीयनद सेवातुह्क अचोन लाव मतेक अचोन, मन्कलोरिन देवुळता मुनेह सेतेमतोर कीयनद सेवातगा तान्काय बेचोन वीळिस लाव मन्ह्ता!
10 बाराह्क इतेके, मोसानाङ अडोना लावु इंजेटा करलता लावतगा एव्वो. रेंडिन आसि ऊळतेक अचोन निटम मुनेता लाव मायतप लेह्कान आता.
11 अडोना पोल्लो मायनद मता. मति अदे अचोन लाव अग़्के मता, इतेके अमेसातुह्क मनदनद बेसता कबुरता पोल्लो बेचोन वीळिस लाव अग़्के मनदग़ा?
12 अदिनेनाह्क माट इद्रमता आसा तासताह्के पका दीराते पोकुर कीय्ह्नोम.
13 मोसा मुय्तोग़ कीतप लेह्का, माट काग़्हतव पोल्लोङ मुळ्हतव, मिसतव पोल्लोङ इलेङ. ओग़ इस्रयेलतोरिह्क देवुळताङ पोल्लोङ वेहतह्पा, ओना मोकम मांजिंदु. मति अद वेह्च मायनदिन लोकुर ऊळमाकिर इनजोर, ओग़ तना मोकमतुन गेंदेते मुळ्हच मतोग़.
14 मति देवुळता वेह्च मोसानाङ केंजतोरा बुदते ओळियो, ओर गळ्स आतोर. नेंड वने इस्रयेलतोर यहुदि मन्कलोर, तमा जमा आयनगा देवुळि ईस मतद पाळ्ना करलता अर्वनदिन केंजिह्तोर, मति ओरा बुदतुन बातालो मुळ्हतप लेह्कान मताह्कु, ओर सेतेम पोल्लोतुन पुनोर. किर्स्तुये ओरा बुदतुन तेग़िय पग़यह्तोग़.
15 इंगो निटमे, नेंड एवनाह ओर तमा जमा आयनगा मोसाल रासतव पोल्लोन अर्वनद केंजतेक तेला मति, गेंदे मुळ्हतप लेह्कान ओरा बुदतुन बातालो मुळ्हच मन्ह्ता, अव पोल्लोना अर्तम ओरिह्क तेळियो.
16 मति ओकावेला बोग़ाय येसुसामिनके मिळ्न्दिह्तोग़, अस्के सामि अद गेंदेतुन तेंडिसि, ओन्कु देवुळतुन पुनदनद बुद ईस्तोग़.
17 सामि इतेके तना जीवाता मेटे मयगा जागा आस्तोग़. बेगा सामिना जीवा मन्ह्ता, अद मन्कलोरिन विळ्सिह कीस्ता.
18 इंजेके माट सबेटोर विस्वसि मन्कलोरल, मोसान लेह्का आयवल. मावा मोकमतुन मुळ्हच मतद गेंदे तेंडटप लेह्कान आता. अदमतगा ऊळना लेह्कान माट इंजेके येसुसामिना मान-डीसातुन ऊळिह्नल, ओसो ओग़ तना जीवाता मेटे माक बद्ले कीसोर दायलाह आतोग़. माट ओना लेह्कान आयना इनजि बेस-नेह्ना बद्लेम आसोर दायलाह आतल.