किर्स्तुना बळयि योहन रासतदु मुनेता सीटि
इद सीटटुन बोग़ रासतोग़ इन्जि, सीटटे रासतद इले. मति “येसुनाङ माट केंजतोम, मावाङ कोंडाने ऊळतोम, बेस-नेह्ना ऊळिसि, मावाङ कय्कने वने इटिस ऊळतोम,” इद्रम रासतद मन्ह्ता. इद पोल्लोतुन ऊळिसि, मुनेतोग़ पेदामन्कल, येसुना बळयि योहनिये इद सीटटुन रासतोग़ इन्जि, मुनेतोर विस्वसिराङ पेदल्क इंदुर. योहन रासतदु बेसता कबुरि ओसो तोहचीतव पोल्लोङ, इव पुस्तकिन रासवाल योहन वेग़े आंदोग़. इद सीटटुन रासनस्के, वेग़ वेल्लाय मुय्तोग़ आस मतोग़. ओसो योहन आसिया पटटा इपिसुस सहरतेन मतोग़. अद तूकने आसिया पटटोर लोकुर वेल्लाटोरे, येसुना पोग़ोन विस्वस कीस मतोर. ओर विस्वसिरा नडुमि, येसुना विरुद पोकुर केवालोर लोकुर वासि, देवुळता मग़ि मन्कल मारियिस इद बूमते वावोग़, ओसो बळयिर पोकुर कीतोग़ येसु देवुळ लोहतोग़ किर्स्तु आयोग़, ओसो मन्कल डोलिस बेस्केन जीवा अरवोग़ इनजोर, अग्डोर विस्वसिरिह्कु, इद्रमताङ जोल पोल्लोन काग़्हन्दुर.
अदिनेनाह्क अग्डोर विस्वसिरिन उसर कीयलाह, योहन रासिह्तोग़. इतेके अद्रम जोल काग़्हवालोराङ पोल्लोन केंजनदायो. मति निटमतोग़ विस्वसि मन्कन इद्रम पुनदनाह आस्ता इन्जि योहन काग़्हतह्तोग़: (1) देवुळ लोहतोग़ पिसिह केवाल येसु किर्स्तु मन्कल मारियिस वातोग़; ओग़ पूरा देवुळिय आंदोग़, पूरा मन्कल वने आंदोग़ इन्जि, निटमतोर विस्वसिर नमिह्तोर. (2) निटमतोर विस्वसिर देवुळता वचन वेहतपे ताकिह्तोर. (3) निटमतोर विस्वसिर देवुळताहि पूना पुटमुळ दोर्कतोर, तमा ऐंगेटोर विस्वसिरिन जीवा कीस्तोर. इद्रम जीवा कीयनदु देवुळतग्डाह मन्ह्ता. देवुळि तना मग़िन मावासाटि इद बूमते लोहचि, अद माक बेचोन जीवा कीता, इद पोल्लोतुन तोहचीता. अद्रमे देवुळता मग़िन मीट विस्वस कीस मतेके, मीकु निटमे अमेसाता पिसमुळ दोर्कताये इनजोर, योहन इद सीटटुन रासतोग़.
1
येसु डोलिसि ओसोवने जीवा अरतदिना साक्सि
1 बोग़ बूम पुटवस्केडाह मन्ह्तोग़, ओना लोप्पा माट मीक वेहतलाह आतोम. ओनाङ माट केंजतोम, मावाङ कोंडाने ऊळतोम, बेस-नेह्ना ऊळिसि, मावाङ कय्कने वने इटिस ऊळतोम. ओनाय मेटे देवुळि माक वळ्ह्किसि, पिसमुळ ईस्ता.
2 बोग़ देवुळता पिसमुळ आंदोग़, ओन देवुळि मन्कल मारियिह कीस लोहताह्कु, माट ओन ऊळतोम, अद पोल्लोता साक्सि माट ईयलाह आतोम. ओसो माट ओन पुनदनामुने, ओग़ देवुळबाबाना संगे मतोग़, ओग़ अमेसाता पिसमुळ एवाना लोप्पा, मीक वेहतलाह आतोम.
3 देवुळबाबाना मग़ि येसु किर्स्तुन माट ऊळतोम, ओनाङ केंजतोम. मीट वने मावा संगे कलियिस मनदना इन्जि, ओना कबुरतुन मीक वेहतह्नोम. माट सबेटोरल ऐंगेन कलियिस मतल इतेके, देवुळबाबाल ओसो येसु किर्स्तु, वेरा संगे कलियिस मतप आस्ता.
4 मीट वने मावा संगे कलियिसि, माक पका गिर्दा वायि इनजोर, मीकु इव पोल्लोन रासलाह आतन.
देवुळि वेह्चलेह्काडा आंदु
5 येसु किर्स्तुनग्डाह बेद पोल्लो केंजतोम, अदिन मीक वने वेहतलाह आतोम. अद इद्रम मन्ह्ता, देवुळि वेह्चलेह्का मन्ह्ता. तानगा मुर्तिय ईकळ इले.
6 अदिनेनाह्क माट देवुळता संगे कलियिस मह्नोम इनजोर वेहचि, ईकळते मतेक अचोन, माटु जोल मन्कलोरल, ओसो सेतेमते ताकवोरल आंदल.
7 मति देवुळि बेद्रम वेह्चते मन्ह्ता, अद्रमलेह्का माट वने ताना वेह्चते ताकतेके, ओर्विह्क-ओर्वोग़ कलियिस मह्नल. ओसो देवुळता मग़ि येसुना नेतुर, मावा सबे पापमतुन एडिह कीस्ता.
8 मयगा बेदे पापम इले इनजोर इतेक अचोन, मयगा मुर्तिय सेतेम इले. माट कुदि नाळेम आय्ह्नल.
9 अदिनेनाह्क मावा पापमतुन मकिह केवालेवा, देवुळता मुनेह कबुल आतेक अचोन, अद मावा पापमतुन मापि कीस्ता. ओसो सबे लाग्वाङ कबस्कना पापमताहि, माक एडिह कीस्ता. इद्रमलेह्का देवुळि तना वेहतप लेह्का कीसि, तना सेतेम तोहतह्ता.
10 बोग़े मन्कल पापम केवोग़ इलेग़, इनजोर देवुळि इन्ह्ता. अदिह्क माट पापम केवोम इनजोर इतेक अचोन, देवुळतुन जोल कीय्ह्नल; ताना पोल्लोतुन मावा जीवातगा तासवल.