16
येसु मल्स जीवा अरयह्तोग़
(मत्याल 28:1-8; लूकाल 24:1-12; योहन 20:1-10)
1 वारमता पोल्वा दिया मारता, अस्के मग्डला नाटेनद मरियालि, याकुबिना तलोग़ मरियालि ओसो सलमि इवु येसुना सेतातगा वाटलाहि अतर्नेय अस्ताङ.
2 इमा दिया (इतेके ऐतारम दियाते) सकर पङपङ आसोरे अव गुमयातगा वाताङ.
3 वानेके तम-तमाय इंदुङ, “बोग़ माक गुमयातुन तिळ्ह्प कीतद बंडातुन तेंडिसीयनोग़ रि?” इंदुङ.
4 पया एरे एवनेके गुमयातुन ऊळताङ. ऊळनेके गुमयातगा तिळ्ह्प कीतद बंडा पका बेरा मता, मति अद बंडातुन अबर गूळ्हतद मता.
5 पया अव आस्कु लोप्पा ओळियताङ. अस्के ओर्वोग़ लेयोग़ पांड्रि जगा केग़सि तिनळ बाजे उदिस मतदिन अव ऊळताङ. ऊळिसि गाबरेम आताङ.
6 अस्के ओग़ अविस्किन इतोग़, “गाबरेम आयमट, हव्कनागुटातगा वेळ्हतोन नासरेत नाटेनोग़ येसुन पर्ह्कलाह आतिर. ओग़ जीवा अरतोग़, इगा इलेग़. इद ऊळाट, ओना सेतातुन तासिस मतद जागा, ओन इगन तासिस मतोर.
7 इंजेक मीट पत्रुन ओसो दुस्रोर ओनाङ कग़यवालोरगा अनजि ओरिन इद्रम वेहाट, ‘ओग़ मीक वेहतप लेह्का, इंजेक मीवा मुनेन गालिल पटटे अन्ज मन्ह्तोग़, अगान ओन कलियकिर,’ इनजि वेहाटु,” इनजोर इतोग़.
8 अव आस्क पया पका रेयिस मताङ. अविस्कना जीवाङ दिर-दिर साङिंदुङ. अदिह्क अव गुमयातग्डाह पेसिसि कग़यवालोरके वितताङ. पका रेयिस मताह्कु अग़दे बोने वेहोङ.
येसु मग्डाला मरियलिह्क दिसिह्तोग़
(मत्याल 28:9-10; योहन 20:11-18)
9 ऐतारम सकर येसु हामरताहि तेग़्कतोग़. तेग़्कतस्के सुरु मुने मग्डाला नाटेना मरियलिह्क दिसतोग़. मुने येसु तानग्डाहि एळुङ देयह्किन पेसिह कीस मतोग़.
10 दिसतस्के अद अनजि येसुना संगे मंदुर, ओर मन्कलोरिन वेहता. ओर दुकम आसि अळसोर मतोर.
11 येसु जीवा अरतोग़, मरियालि ओन ऊळता इनजोर केंजतोर. मति अद पोल्लोतुन ओर नमोर.
12 ताना पया, मुने येसुना संगे मतोर इर्वुर मन्कलोर येरुसलेमताहि नाग़ अनजोर मतोर. अस्के येसु ओरिह्क दिसतोग़. इद मल्का येसुना रुप मिळ्न्दिस मता.
13 मति ओन सीता कीतस्के, ओर इर्वुर मल्स अनजि येसुना संगे मतोर दुस्रोरिन वेहतोर. मति वेरा पोल्लोतुन वने ओर नमोर.
14 पया अक्रा कग़यवालोर उदिसि गाटो तिनजोर मतोर, अस्के येसु ओरिह्क दिसतोग़. दिसिसि इद्रम इतोग़, “नना तेग़्कतस्के नाक ऊळतोर मन्कलोरा पोल्लोतुन बाराह्क नमविर? नमोम इनजोर बाराह्क कैंगम आतिर?” इनजोर इतोग़.
15 पया ओसो इतोग़, “मीट पूरा बूममेंड अनजि नावा पोल्लोता बेसता कबुरतुन पोकुर कीम्ह्टु.
16 नावा पोल्लोतुन विस्वस कीसि देवुळता पेदिरते एग़ मीतोरिन देवुळि पिसिह कीयग़ा. मति विस्वस केवोरिन ओरा पापमतुह्क सिक्सा ईयग़ा.
17 नावा पोल्लोतुन विस्वस केवालोर मन्कलोरा कयदे देवुळता लावताङ इव सीनाङ आस्ता: नावा पेदिरते देयह्किन पेसिह कीयनुर.
18 पूनाङ-पूनाङ पोल्लोङ वळ्ह्कनुर, तरस्किन तमाङ कय्कने तेहतनुर, ओसो डोलनद मतु उटेक वने ओरिह्क बाताले आयो, ओसो ओर तमाङ कय्क बेमरतोरा पोग़ोन तासतेके, ओर सव्रेम आयनुर,” इनजोर वेहतोग़.
येसु देवुळदीपतगा दास्तोग़
(लूकाल 24:50-53; बळयिर 1:9-11)
19 पया येसुसामि ओरिन इव पोल्लोङ वेता पया, देवुळि ओन पोग़ोन तना जागातगा ओता. येसु पोग़ोन अतोग़ अस्के देवुळता तिनळ बाजे उदतोग़.
20 पया येसुनाङ कग़यवालोर सबे तिरियिसि ओना पोल्लोतुन पोकुर कीतोर. सामि ओरा तोळ मंदोग़ अहे ओरा कयदे देवुळता लावताङ सीनाङ तोहंदोग़. ओर वेहतव पोल्लोङ निटमे इनजोर अव सीनाङ तोहंदुङ. आमेन.