8
येसु नालुङ अजर्कना मुडुह्क तिहतह्तोग़
1 अद्रमे पया उंद दिया ओसो वने येसुनगा वेल्ला मुल जमा आतोर. ओरगा तिनदलाह बाताले इलवा मता. अस्के येसु माक कग़यवालोरिन केयिसि इद्रम इतोग़,
2 “वेर नयगान मनजि नेटुह्क मूंड दियाङ आतोर, वेरगा तिनदलाह बातय इले. अदिह्क नाक वेरा मान वसिह्ता.
3 वेरग्डाह बोर-बोर वेल्ला जेकनाहि वातोर मन्ह्तोर. नना वेरिन अहे लोह्कने लोहतेके, वेर अग़दे अनेके कग़्विह्क ऊंगेङ-वेळ्केङ आयनुर,” इनजोर इतोग़.
4 पया कग़यवालोर येसुन इतोर, “अलाले, वेर लोकुर पंजलाहि इद पेळ्ह्कल जागाते तिंडि बेग्डाह बोग़ तचीयनोग़?” इतोर.
5 अस्के “मियगा बेचोक आरिङ मन्ह्ताङ?” इनजि येसु ओरिन ताल्ह्कतोग़. “अविय! मयगा इतेके एळुङे आरिङ मन्ह्ता,” इनजोर इतोर.
6 पया येसु मुडुन उद वेहचि अव एळुङ आरिन पोसि, देवुळतुन जोहर कीसि आरिन किळ्ह्तोग़. किळ्ह्चि मुडुह्क तूसिसीयलाह तनाङ कग़यवालोरिह्क ईतोग़, ओर पया मुडुह्क तूसतोर.
7 ओरगा उचुक उड्लाङ मीन्ह्क वने मताङ. अविस्कनेनाह वने देवुळतुन येसु जोहर कीसि लोकुरिह्क तूसिसीयलाह वेहतोग़.
8 पया लोकुर पंजनाह तितोर. तिनजि पिसतव आर किळ्केङ एळुङ बेराङ डालाङ निंदताङ.
9 अगा तितोर लोकुर जोक-जोक नालुङ अजर्क (4000) लेह्का मतोर. पया येसु सबे मुडुन लोहतोग़.
10 लोहचि येसु तनाङ कग़यवालोरा संगे ओडाते उदिसि दलमनुता इनदनद एरियाते अतोग़.
परुसिर येसुन सीना तोहता वेहतह्तोर
11 पया अगा उच्वुर परुसिर वातोर, वासि येसुना संगे पोल्लोने गिटोगटो कीसोरे, “निमा देवुळदीपताहि वातिन इनजि माक उंदि सीना तोहा,” इनजोरे येसुना पट ऊळलाहि ओन ताल्ह्कतोर. ओग़ कीया पग़वोग़ इतेके जोल केवाल माक दोर्कनोग़ इनजि ओरा विचर मता.
12 इद पोल्लोतुह्क येसु नारज आसि पोस नेस्कतोग़, पया “इद पीळतोरु बाराह्क सीना ताल्हकिह्तोर? नना सेतेम वेहतह्नन, इद पीळतोर लोकुरिह्कु बेदे सीना तोहोन,” इतोग़.
13 पया येसु परुसिरिन विळ्सिसि तनाङ कग़यवालोरा संगे ओडातगा उदिसि सम्दुरतुन वेंडिस वातोर.
येसु परुसिरा, एरोद अंतिपसना तप तोहतह्तोग़
14 वानेके कग़यवालोर आरिन ततलाह माग़्ङतोर. ओडाते दायह्पा ओरगा उंदिय आरि मता.
15 अस्के येसु ओरिन इतोग़, “ऊळाट! परुसिर ओसो एरोद अंतिपस, वेरा ओयता पिंडटा लोप्पा उसरते मन्ह्टु, ताना अग़दुह्क आयमाट,” इतोग़.
16 इतस्के “मयगा आरिङ लेवाह्के बहे गूरु माक वेहतह्तोग़,” इनजि तम-तमाय वळ्ह्किंदुर.
17 तेन पुनजि येसु इतोग़, “मीट आरिङ इलवाह्कु बाराह्क इचोन आलिह कीय्ह्निर? नाकु आरिना पर्वा इले इनजि मीक इंका तेळियोया? बह मीट इंका पुनविरा?
18 बह मीवा बुदि अचोन कैंगम आताया? नना कीतव कबस्किन ऊळतिर. कोंडाङ मन्ज वने मीक तेळियो? केव्क मन्ज वने केंजविर? बह मीक एर्का इलेया?
19 मुने नना एयुङ आरिने एयुङ अजर्क (5000) लोकुरिह्क तीहतन, अस्के पिसतव बेचोक डालाङ गुम कीतिर?” इतोग़. ओर इतोर, “बारा डालाङ गुम कीतोम,” इतोर.
20 येसु ओसो इतोग़, “अहे ओसो एळुङ आरिने नालुङ अजर्क (4000) लोकुरिह्क तीहतन. अस्के मीट बेचोक डालाङ आरिङ गुम कीस मतिर,” इतोग़. ओर येसुन इतोर, “एळुङ डालाङ गुम कीस मतोम,” इतोर.
21 इतस्के येसु ओरिन इतोग़, “बह इंजेक वने मीक तेळियोया?” इतोग़.
येसु तोव्वोग़ मन्कन सव्रे कीस्तोग़
22 अद्रमे पया येसु बेत्सेदा नाटेनगा वातोग़. वातस्के नाटेनोर ओर्वोग़ गुडिनु येसुनगा ततोर. तचि “वेग़ तोवनाह वेनाङ कोंडान इटा सामि,” इनजोर अर्जि कीतोर.
23 इतस्के येसु ओग़ तोव्वोना कयदुन पोसि लोह्क लेवगा ओतोग़. ओसि ओनाङ कोंडानगा उस्किसि ओना पोग़ोन कय तासतोग़. तासिसि “बातालय दिसिह्तया?” इनजोर ताल्ह्कतोग़.
24 अस्के ओग़ ऊळिसि इतोग़, “नाक मन्कलोर मराना लेह्का दिसिह्तोर,” इतोग़.
25 इतस्के येसु ओसो वने तना कय ओनाङ कोंडानगा तासतोग़. तासतस्के ओग़ ओसो नाह्किस ऊळतोग़, अस्के मुनेतलेह्काने सव्रेम आतोग़. ओग़ सबे पोळ्क्ने ऊळ बोटटोग़.
26 पया येसु ओन इतोग़, “इंजेके निमा लोन अन! मति इद नाटेना लोप्पाड्क अनमा,” इनजोर इतोग़.
येसु बोग़ आंदोग़ इनजि पत्रु पुन्ह्तोग़
27 पया येसु तनाङ कग़यवालोरा संगे केसरिया-पिलिपि इनदनद नाटेना एरेताङ नाह्कने अतोग़. दायह्पा तनाङ कग़यवालोरिन “नना बोनन आंदन इनजोर लोकुर नाक इन्ह्तोर,” इनजि ताल्ह्कतोग़.
28 अस्के “उय्तुर बार नीक एग़ मीहवाल योहन इन्ह्तोर, उय्तुर बार ‘देवुळता कबुरतोग़एलियाल आंदोग़,’ उय्तुर बार ‘मुनेतोग़ बोग़ो देवुळता कबुरतोरग्डाहि ओर्वोग़ जीवा अरतोग़,’ इन्ह्तोर,” इनजोर कग़यवालोर इतोर.
29 इतस्के येसु ओरिन, “अले पया मीट वेहाट, नाक बोग़ इनजोर मीट इह्निर?” इनजोर ताल्ह्कतोग़. ताल्ह्कतस्के “सामि, निमा पिसिह केवाल किर्स्तुनिन आंदिन,” इनजोर पत्रु इतोग़.
30 इदिन केंजिसि, “नना किर्स्तुनन इनजिर मीट बोने वेहमाट बहा,” इनजोर ओरिन उकुम इतोग़.
येसु तना वायना हामुरतुन पुनाह कीस्तोग़
31 पया तनाङ कग़यवालोरिन इद्रम काग़्हता बोटटोग़, “मान्वना नडुम पुटटोन्कु, इतेके नाकु पका तिपल आयनद मन्ह्ता. यहुदिराङ पेदल्कु, पेर्मालोर, सास्त्रमगूरुर नाक पास्कनुर, हव्कनुर, ताना पया दियाने नना तेग़्ककन, इव करल अद्रम आयनुङे!” इनजोर वेहतोग़.
32 येसु इद पोल्लोतुन ओरिह्क बेस तेळियनाह वेहतोग़. वेहतस्के पत्रु येसुन बाजेते अबर ओसि, “गूरु, निमा अद्रम विचरे केमा,” इनजि येसुना वेहतद पोल्लोता अडम वळ्ह्कतोग़.
33 पया येसु कग़यवालोरके मल्स ऊळिसि पत्रुन इद्रम तेर्हतोग़, “एय देयमता बुदते वळ्ह्कवनिन, अद्रमता बुदतुन पोहचीम! नीवा विचरि मन्कना विचरतेह मन्ह्ता, मति देवुळता विचरतके इले,” इनजोर तेर्हतोग़.
34 पया येसु तनाङ कग़यवालोरिन ओसो अगा जमा आता मुडुन तना एरे केयिसि इद्रम इतोग़, “बोग़ाय नावाङ कग़यलाह वायना विचर कीतेके, ओग़ तना हव्कनागुटा कांजतप, आपुनाये कुसितुन पोहचि नावा अग़दे ओन्क ताक पोयतग़ा.
35 बोग़ इद बूमते तना कुदता जीवातुन पिसिह कीयलाह ऊळिह्तोग़, ओग़ आक्रिते बूळेम आयनोग़. मति बोग़ नावा बेसता कबुरतुन पोकुर कीयलाह सबे पोहतह्तोग़, ओन्क देवुळि पूना जीवा ईयग़ा.
36 मन्कल पूरा दुनियातुन गेल्सतेक तेला मति तना कुदता जीवातुन पिववद किसबटटगा लेसिह कीतोग़ इतेके ओन्क बाताल पाय्दा आयग़ा?
37 मन्कल तना जीवातुन लेसिह कीतोग़ इतेके ताना बद्लातुह्क ओग़ बातय ईया पग़वोग़.
38 सिंड्रि आंचाळ तना मुजोन नाळेह कीयना लेह्कान इद पीळतोर मन्कलोर देवुळतुन नाळेह कीसि पापमते पिसिह्तोर. अद्रमतोरा नडुमि बोगु नना येसुनाङ कग़यवानन इनदलाह पेग़्के-मुनेह आस्तोग़, ओनु नना मान्वना नडुम पुटटोनन वने जेक तासकन, ओसो बेद दिया नाकु पवित्र देवुतुल्क बेरा गिजुरते ततनुङ, अद दिया नना बाबाना डीसाते वायकन, अस्के अद्रमतोग़ मन्कन मावोग़ इनदलाहि पेग़्के-मुनेह आयकन,” इनजोर इतोग़.