2
1-3 इंजेके मीटु देवुळि बेचोन बेस मन्ह्ता इनजि पुतिर. इतेके मीटु मीवाङ सबे लाग्वाङ कबस्किन विळ्सिसीम्ह्टु: सबे कुळ्सा, सबे सोङु, नाळेह कीयनद बुदि, ओसो जीवा कर्वतप आयनदु, कूदिङ दायनदु, इविन विळ्सिसीम्ह्टु. इंजेक पुटटोग़ कस्मुल बाला बेद्रम पाल उनडलाह गिर्दा आस्तोग़, अद्रमे मीटु इंका मीवा जीवातुह्कु पाललेह्का मनदनदु देवुळता पोल्लोतुन पुनदलाह गिर्दा आम्ह्टु. इद्रमता पाल उनजोर मतिर इतेके मीट देवुळतके दायनद वेला एवनाहि विस्वसते बेर्ससोर मनदकिर.
देवुळता लोकुर इतेके जीवात मनदनव बंडानलेह्काडोर
4 दुनियाते विस्वसलेवोर मन्कलोर येसुनु अङ्ळमतोग़ इनजि पोहचीतप ऊळतोर, मति देवुळ ओनु कूब असलतोग़ इनजि आचिसि तना लोतुह्कु आदर ईयनद मोदुल-बंडा इनजि तासता. ओग़ु जीवात मनदनदु बंडाता लेह्का मन्ह्तोग़.
5 ओना एरे वाताह्कु मीट इंका जीवात मनदनव बंडानलेह्का आसि, देवुळि तना जीवातुह्क जागा कीयलाह मीकु लोनलेह्का दोहतह्ता. मीटु इंजेके देवुळतुह्क इनजि अलग आतिर, मीटु बूमयालोरा लेह्का मनजि येसु किर्स्तुनेनाहि देवुळबाबान गिर्दा कीयलाहि मोक ईतपु, आपुनाङ विचर्किन पोहचि, देवुळता विचर मतप ताकिह्निर.
6 अद पोल्लोता लोप्पा पवित्र सास्त्रमते वने देवुळि इहे इन्ह्ता:
नना येरुसलेम सहरते बंडालेह्काडोन ओर्विन तासिह्नन,
ओग़ु नना आचतोग़ु असलता आदर ईयनद मोदुल-बंडालेह्काडोग़,
ओना पोग़ोन बोर बर्वस तासिह्तोर, ओर बेस्केने मेसेह्ने आयोर आयनुर.
7 बोर येसुन नमिह्तोर, ओरिह्क ओग़ असलतोग़े! मति बोर ओन नमोर, ओरा लोप्पा सास्त्रम इह वेहतह्ता:
बेद बंडातुन बेल्दर्कु पोहचीतप ऊळतोर,
अदे बंडा इंजेके आदरता मोदुल-बंडा आता.
अद्रमे ओर नमवोरु येसुसामिन पोहचीतप ऊळिह्तोर.
8 अदु ओरिह्क कोदुर ईयनद बंडालेह्का आसि,
मुटिह कीयनद आदलेह्का आता.
इनजि इंका पवित्र सास्त्रम वेहतह्ता. तना पेकाना लोप्पा देवुळता वेहतद पोल्लोन केंजवाह्कु, नमवाह्कु, ओरु कोदुर ईसि अरयह्तोर. ओरु अरयिर इनजोरे देवुळ ओरिन आचिस तासता.
9 मति मीटु अद्रमतोरिर आयविर. मीटु देवुळ आचतोरिर येसु राजानाङ बूमयालोरिर, मीट पवित्र आयना इनजि वेगुर आतोरिर ओसो देवुळताये लोकुरिर. बेद देवुळि मीकु ईकळताहि केयिसि बेस्केन ऊळवद वेह्चते तता, अदे देवुळताङ असलताङ कबस्किन दुस्रोरिह्क मीट वेहतकिर इनजिये अद मीकु इचोन कदर ईस तासता.
10 देवुळता कबुरतोग़ ओर्वोग़ मुने मीवा लोप्पा इह रासतोग़:
मुने मीटु बोनाय लोकुरिर आयविर,
मति इंजेके मीटु देवुळता लोकुरिर आतिर.
मुने मीटु देवुळता गूनमतुन पुनविर,
मति इंजेक मीटु देवुळता गूनमतुन पुतिर.
11 ए नावाङ गोतयालोरिर, मीवा देवुळदीपता लोतेनाह मीटु जेक आसि, इद दुनियाते रेंड दियाङ मह्निर. अदिह्के मीक नना वेहतह्नन, अमेसा मीवा जीवाता अडम मनदनव विचर्कनाहि, इतेके मीवाङ लाग्वाङ विचर्कनाहि, जेक आम्ह्टु.
12 विस्वसलेवोरा नडुम मनदह्पा मीटु कसुरलेवपु असल मन्ह्टु. ओरु मीकु “वेर लाग्वोरे!” इनजि कसुर तोहतेकाय, मीवा असलता ताकमुळतुन ऊळनुर, ऊळिसि पया पया ओर इंका देवुळता मोकम ऊळनद दियाते देवुळतुनु मान ईयनुर.
अदिकरते मनवालोराङ पोल्लोङ केंजना
13-14 येसुसामिह्कु मान आयना इनजि, इद दुनियाते अदिकरते मनवालोरा पोल्लोते वग़्ङिस मन्ह्टु: बेरोग़ राजाल मनेग़, ओसो ओग़ लोहतोर अदिकरतोर मनिर, ओराङ पोल्लोङ केंजसोर ताकाटु. बाराह्क इतेके ओर अदिकरतोर बेसता कबळ कीतोनु कदरते ऊळना, लाग्वा कबळ कीतोन बारा सिक्सा ईयना इनजि राजाल ओरिन लोहतोग़.
15 देवुळता विचर बह मन्ह्ता, बुदलेवा मीवा अडम वळ्ह्कवालोर, मीवा असलता ताकमुळतुन ऊळिसि, मीवा पोग़ोन कसुर ओपलाह बातय दोर्कवाह्कु, केमेन आयना इनजि.
16 मीटु देवुळता लोकुरिर आताह्कु, इंजेके बोराय कय इळ्न इलविर, निटमे! अदिनेनाह्कु मीटु माक विचर वातपु कीकोम, इनजि लाग्वाङ कबस्कने दल्गमाटु. मति माट देवुळता सेवा-साकुर केवालोरोम इनजि, ताना पोल्लो केंजसोर बेस मन्ह्टु.
17 इतेके, सबेटोरगा कदरते वळ्ह्कना, आपुनाङ ऐंगेटोर विस्वसिरिन तमोग़-दादानलेह्का जीवा कीयना. देवुळतुह्कु रेयिस मनदना, ओसो राजानु मान ईसि ताकना.
18 मीट ओर्युलतोरिर, मीवाङ माल्कालोरा पोल्लोते वरेम आस मन्ह्टु; सिरप गूनमतोरगाने आयो, मति कळकते मनवालोर माल्कालोरगा वने, ओराङ पोल्लोङ केंजिस तिरियाटु.
19 बोग़ाय कसुर-काय्दालेवा तिपल अरतेके, ओग़ु देवुळ नाक ऊळिह्ता, तान सीता कीसि अद तिपलतुन दीरा पोसि आपतेके, ओना पोग़ोन देवुळि गिर्दा आस्ता.
20 मीटु कसुर कीसि देबाङ तिनजि दीरा पोसि आपतेके, मीक ओसो बाताल बेरातनमि? मति बेसतल कबळ कीतेक तेला देबाङ तिनेके मीट दीरा पोस आपतिर इतेके देवुळि मीवा पोग़ोन बेचोन गिर्दा आस्ता!
21 इद्रमे मनदना इनजि देवुळि मीकु केयता. येसु किर्स्तु इंका मयेनाह्कु तिपल अरसि माकु उंदि अग़ तोहतोग़, ओना कोजता पेग़्के कोज वाटिस मीट ओना लेह्का दीरा पोसि ताकना इनजि.
22 ओग़ु बातय कसुर केवोग़, ओना तोडटाहि बेस्केने नाळेह कीयनद पोल्लो पेसो.
23 ओना मोकम एग़ रेहतोर, मति ओग़ु कोदा पोसि बोनाय मोकम एग़ रेहोग़. बेचोन तिपल अरस तेला “नाक अह कीय्ह्निर, मति ऊळाट!” इनजि मुर्तिय दगाङ एवोग़. मति सेतेमते नेयम कीयनद देवुळतुन नमिसि, ताना कयदे तन्क विळ्सिसीतोग़.
24 माटु मावा पापमताङ विचर्कनाहि पिह्ट अरसि, सेतेमते ताकनेनाह्क ओग़ु मावा पापमता सिक्सातुन तना मेंदुदा पोग़ोन एचि हव्कनागुटातगा डोलतोग़. ओग़ु देबाङ तिन्ज नोमुर आताह्के मीट मीवा जीवाते बेस आतिर.
25 मुने मीटु लेसताङ गोरेनलेह्का अग़ विळ्सिस अनजोर मतिर, मति इंजेके मीवा जीवातुन काप आडवाल कोपानगा मीट मल्स वातिर.