4
विस्वसिरा मनमुळ
1 बहलेह्का किर्स्तु मयेनाह्कु देबाङ तितोग़, ओना लेह्काडा विचरते मन्जि, देबाङ अरतेकाय तिनदकोम इन्जि, दीराते मन्ह्टु. बाराह्क इतेके, बोर तमा मेंदुदगा तिपल एतह्तोर, ओर पापम कीयना विचरताहि पिह्ट अरयह्तोर.
2 अहे मीट पिसनाङ दियाङ एवनाहि, मीटु लाग्वाङ विचर्कने ताकलाह गिर्दा आयवा, देवुळता विचरते तिरियसोरे मनदकिर.
3 मुने मीटु देवुळतुन पुनवोरिर मतिर अस्के, लाग्वा विचरते तिरियताह्कु, गोचुर आयना, सिंड्रि-साट्याल आयना, कल लोटि आयना, वेल्लाटोर कलियिसि कडा रिमाते विचर वातप कीयना, बोमान मोळ्कना, इद्रमताङ मीट कींदिर. मीट मुने अह कीताङ दियाङ मारताङ, इंजेटाहि अद्रमताङ केमाटु.
4 इंजेक मीवा पाळ्ना गोततोर, इद्रमताङ लाग्वाङ कबस्कने, मीट ओरिह्क संग आयवाह्कु, बयल आस्तोर. अदिह्के ओरु बह इतेक अह वळ्ह्कना, कूदिङ दायना कीस्तोर.
5 मति हातोरा, पिसतोरा नेयम कीयनद देवुळता मुनेह, ओरिह्क लेका-जोका ईयाय पोयतग़ा, इद पोल्लो मीट सीताते तासाटु.
6 इदिनेनाह्कु येसुना बेसता कबुरि हातोरिह्क वने, (वेर हायनामुनेन) वेहतद मता. वेर हातोरिह्क, सबेटोर पापि मन्कलोरा लेह्का, तमाङ मेंदुस्कने हामुरता सिक्सा कोनि दोर्कताये. तेला मति अद बेसता कबुरतुन नमताह्कु, वेराङ जीवाङ देवुळलेह्का अमेसा पिससोर मनदा पग़यनुङ. अदिह्क ओरिह्क बेसता कबुर वेहतद मता.
7 इंजेके इद दुनियाताङ आक्रि दियाङ गट्नेन एवताङ. इद पोल्लोतुन सीता कीसि, मीट पार्तना कीयनस्के, उसरते मनदना इन्जि, अक्र्ने मन्ह्टु.
8 सबेट्काय बेसतल पोल्लो बेद इतेके, ओर्विह्क-ओर्वोग़ अमेसा पूरा जीवाताहि जीवा कीसोर मन्ह्टु. अह कीतिर इतेके, मीटु ओर्वोग़-ओर्विना पापमतुन मापि कीकिर.
9 बोराय जेकताहि मीवा लोन वातोर इतेके, जीवाते मुयोग़ आयवा, ओरिन बेस ऊळाटु.
10 देवुळि ओर्विह्क-ओर्विह्क रीतरीतिनाङ कबस्क कीयलाह, बुद ईता. मीट देवुळ ईतव बुदिनु जबब्दरते काळ्ङवालोरा लेह्का मन्ह्टु. मन्जि, देवुळ तूसिसीतव बुदिनु, मीटु ओर्विह्क-ओर्वोग़ कबळ अरयलाह काळ्ङाटु.
11 बोन्क देवुळता पोल्लो वेहतलाह बुद दोर्कता, ओग़ु सेतेमते देवुळताङ पोल्लोनु कुद देवुळिये वेहतपु, अद्रम वेहतना. बोन्क साय्ता कीयलाह बुद दोर्कता, ओग़ु देवुळ ईतद लावते, दुस्रोरिह्क साय्ता कीयना. अस्के वेरु येसु किर्स्तुनाये लोकुर इन्जि, दुनियातोर देवुळबाबाह्कु मान ईयनुर. सबे मान, डीसा, राजेम अमेसा अमेसात्कु सिरप ओन्के आयि! अहे आयि!
विस्वसते वाताह्कु लोकुरा कुळ्सा
12-13 ए नावाङ गोततोरिर, मीवा पोग़ोन वातदु किस मळ्गतपु, बेह्रा तिपलतेनाह्कु बयल आयमाटु. माक इद बेद्रमता तिपल वाता रा इन्जि, आलिह केवाये गिर्दा आम्ह्टु. बाराह्क इतेके, मीट इंका येसु किर्स्तुनाङ तिपल्कने पोत्ला आतिर. अद्रमे ओग़ु मल्स वासि, सबेटोरिह्क तना डीसा तोहतनोग़ अस्के, मीट इंका ओना डीसाते कलियिसि, पका गिर्दा आयकिर.
14 मीटु किर्स्तुना लोकुरिर मताह्कु, बोग़ाय मीवा मोकम एग़ रेहतेके, मीट देय्वातोरिरे. बाराह्क इतेके, मीवा पोग़ोन देवुळता जीवाता दळ्म मन्ह्ता, अद मीकु देवुळता डीसा तोहतग़ा.
15 मीटु हव्कतिर, कलतिर, बोबाङ अरतिर, दुस्रोना कबळते कय बोयतिर इतेके, देबाङ तिनदलाह ओप्पकिर.
16 मति माट किर्स्तुनोरोम इन्जि देबाङ तितेके, ताना लजा आयवा, किर्स्तुना पेदिर माक अरता इनजोरे, देवुळतुन जोहर कीम्ह्टु.
17 बाराह्क इतेके देवुळि इद दुनियातुन नेयम कीयनद वेला एवता. अद मुने तनाये लोकुरा नेयम कीयग़ा. देवुळि माक वने नेयम कीयग़ा इतेके, देवुळता बेसता कबुर केंजवोरा बेचोन गोसा आयग़ा!
18 सास्त्रमते रासतपु,
सेतेमतोग़ मन्कह्के बेरा तिपलते पिसमुळ आस्ता इतेके
देवुळता सीता केवोरु पापि लोकुर, वेरा बह आयग़ा?
19 अदिह्क, मीट देवुळता विचरते तिपल आयवालोरिर, अमेसा बेसताङ कबस्क कीसोर मन्ह्टु. मीक पुटिह कीतोग़ु, सेतेमतोग़ देवुळबाबाना कयदे, मीवा जीवातुन विळ्सिसीम्ह्टु, (बाराह्क इतेके ओग़ मीक वेहतद पोल्लोतुन करल कीयनोग़े).