13
अदिकरते मनवालोरिह्‌क वग़्ङिस मनदना
केंजाट, सबे अदिकर देवुळताहि वाता. इंजेटा सर्करतुन वने, अदे निल्पिह कीता. अदिनेनाह्‌क मीट सर्करताङ सबे पोल्‍लोन केंजिसि ताकाटु. अद्रमता अदिकर मनवालोरा विरुद आयना इतेके, देवुळता विरुद आतप आस्ता. अद्रम विरुद आयवाल, देवुळताहि सिक्सातुन दोर्किह कीस्तोग़. बेसताङ कबस्क केवाल सर्करतुह्‌क बाराह्‌क रेयनोग़? लाग्वाङ कबस्क केवाले रेयनोग़. सर्करतुह्‌क रेयवालेवा मनदना इतेके, मीट बेसताङ कबस्क कीम्ह्‌टु. अस्के ओर मीक बेसतोर इनजोर इनदनुर. ओर मीवा पाय्दातेनाह्‌क, देवुळताङ सेवकिर आंदुर. मति लाग्वाङ कबस्क केवालोरिह्‌क, सिक्सा ईयनद अदिकर ओरगा मन्ह्‌ताये. अदिनेनाह्‌क मीट लाग्वाङ कबस्क कीतेके, ओरिह्‌क रेयाटु. लाग्वोरिह्‌क सिक्सा ईयलाहिये, सर्कर ताकिह केवालोरिनु देवुळि निल्पिह कीता. अदिनेनाह्‌क मीट ओरा पोल्‍लोते वग़्ङिस मनदना, मनवेके मीक सिक्सा वने दोर्किह्‌ता, मीवा जीवा वने चुहेम आयो आस्ता.
सर्करतुन ताकिह केवालोर देवुळता सेवातोरे. अदिनेनाह्‌क मीट ओरिह्‌क सिद्‌वा दोहाटु. दोहवेके, ओर तमा कबळतुन बह रोमवा कीयनुर? बोन्क बाताल ईयनद ओप्पिह्‌ता, अदिन ईम्ह्‌टु. इतेके सिद्‌वा एनवालोरिह्‌क सिद्‌वा दोहाटु, गरपटि एनवालोरिह्‌क गरपटि दोहाटु, अदिकरते मनवालोरिह्‌क रेयिस मान ईम्ह्‌टु.
ओर्विह्‌क-ओर्वोग़ बह जीवा कीयना
8-9 देवुळि माक लेकालेवा जीवा कीताह्‌कु, माट वने दुस्रोरिन जीवा कीयनाय गावले. इद करातुन विळ्सिसि, दुस्रा बेदे कराता मोता मियगा मनमाकि. सास्त्रमतगा रासतव मोसानाङ अडोन मीट पुतिरे: साट्याल कबळ केमा, दुस्रोन हव्कमा, कलमा, दुस्रोना मादगा कोंडा केमा इनजोर रासतद मन्ह्‌ता. मोसानाङ सबे अडोङ, सास्त्रमता उंदिय पोल्‍लोते माळतप आताङ. अद बेद इतेके, निमा कुदतुन जीवा कीयना लेह्‌का, दुस्रोरिन वने जीवा कीम. 10 दुस्रोरिन जीवा कीतेके, ओरिन बाताले कोटुल कीया वावो. इद्रमलेह्‌का माट जीवा कीतल इतेके, देवुळताङ पूरा अडोन माळतप आतल.
11 माट मुने किर्स्तुन विस्वस कीयलाह आतल अस्के, देवुळि माक इद ईकळता दुनियाताहि पिसिह कीयनद कगो बेस्के एवयग़ा इनजोर, अग़ ऊळिंदल. इंजेके अद कगो एरे एवता. अदिह्‌क मीट मीवा निद्रताहि तेदिसि, उसर आम्ह्‌टु. नना वेहतप लेह्‌का ताकाटु. 12 इंजेक ईकळ मारलाह आसि, वियतलाह आता. अदिनेनाह्‌क माट ईकळता लेह्‌काडाङ लाग्वाङ कबस्किन पोहचि, देवुळता वेह्‌चते ताकसोरे, ईकळतुन आरे कीयलाह तयर आयिङ. 13 ओसो माट वेह्‌चते मनाह्‌कु, बेसता बुदते ताकिङ. अद्रमे ओचेरा लेह्‌का केवा, साट्याल बुदते विचर वातप केवा, वह्‌चळ केवा, ओसो दुस्रोरगा जीवा कर्ववा, बेसता अग़दे ताकिङ. 14 मीटु मन्कना बुदताङ लालुस्किन मुर्तिय सीता केवाहु,किर्स्तु येसुसामिये मीक आव्रे कीयेग़.
13:1 दानिय्येल 2:21; 4:17; योहन 19:11 13:1 1 तिमोति 2:2; तीतुस 3:1; 1 पत्रु 2:13-14 13:4 1 पत्रु 2:13-14 13:5 1 पत्रु 2:19 13:7 मत्याल 22:21; मार्कल 12:17; लूकाल 20:25 13:8-9 पेसमुळि 20:13-17; व्यवस्थाविवरण 5:17-21 13:8-9 लैव्यव्यवस्था 19:18; मत्याल 7:12; 19:19; 22:39-40; याकुब 2:8 13:10 गलातितोर 5:14; 1 योहन 3:10 13:11 1 पत्रु 4:7; 2 पत्रु 3:9 13:11 मार्कल 13:37; 1 कुरिंततोर 15:34; इपिसुसतोर 5:14; 1 तिसलुनितोर 5:6 13:12 1 कुरिंततोर 7:29 13:12 इपिसुसतोर 5:11; 6:11-13; 1 तिसलुनितोर 5:8; इब्रितोर 10:25; 12:1; याकुब 5:8; 1 योहन 2:8,18; तोहचीतव पोल्‍लोङ 1:3; 22:10 13:13 1 कुरिंततोर 3:3 13:13 लूकाल 21:34; गलातितोर 5:19-21; इपिसुसतोर 5:18; 1 तिसलुनितोर 4:12; 1 पत्रु 4:3; 2 पत्रु 2:13 13:14 गलातितोर 5:16; 1 पत्रु 2:11 13:14 इपिसुसतोर 4:24; कुलुसितोर 2:23; 1 योहन 2:15-16