5
लेहता पग़वाह वटे मेततद तोला सीटि
पया नना ऊळतन अस्के, राजकुर्सतगा उदतदिना (इतेके देवुळता) तिनळ कयदगा ऊर्हतद तोला सीटि मता. अद तोला सीटटा लोप्पा ओसो पलते, पोल्‍लोङ रासिस मताङ. अद सीटटुन बोग़े लेहता पग़वाह, सीटटगा एळुङ जागाने वटे मेतिस मता. अस्के उंद पका लावता देवतुलतुन ऊळतन. अद जोरते इद्रम केयता, “इद तोला सीटटगा मेततदिन तेंडिसि, तान लेहतना लायकतोग़ बोग़ मन्ह्‌तोग़?” इता. मति पोग़ोन देवुळदीपतगा, इद बूमतगा, हानादीपतगा वने, बोग़े सीटटुन लेहचि, तानग्डा पोल्‍लोतुन अर्वना लायकतोग़ दोर्कोग़. सीटटुन लेहचि, तानग्डा पोल्‍लोतुन अर्वना लायकतोग़ बोग़े दोर्कवाह्‌कु, नना योहननन पकाय अळया बोटटन.
उंद गोरेपिला तोला सीटटुन लेहतह्‌ता
पया पेदल्कनग्डाहि ओर्वोग़ नयगा वासि, “अळमा! इद ऊळा! बोन यहुदाना पुळ्गता सिङपुल इन्ह्‌तोर, ओग़ दाविद राजाना कूळतोग़, तना कोटुलतोरिन गेल्सतोग़.* अदिनेनाह्‌क तोला सीटटगा एळुङ जागानगा मेततद वटेतुन तेंडिसि, तान लेहतलाह ओग़ लायक मन्ह्‌तोग़,” इनजोर वेहतोग़. अचोटेने उंद गोरेपिलातुन ऊळतन. राजकुर्सता ओसो नालुङ दिंचिना, वीसा नालवुर पेदल्कना नडुम निच मता. तान मुनेने बोग़ो मति हव्किस मतप लेह्‌कान दिसिंदु. तान्क एळुङ कोह्‌क मताङ, ओसो एळुङ कोंडाङ मताङ. अव कोंडाङ पूरा बूमतगा, देवुळ लोहतव तानाङ एळुङ जीवाङ!
अद गोरेपिला वासि, राजकुर्सतगा उदिस मतदिना तिनळ कयदग्डाहि, अद तोला सीटटुन एता. गोरेपिला अद तोला सीटटुन एतस्के, नालुङ जीवात मनदनव दिंचिङ ओसो वीसा नालवुर पेदल्कु, ताना मुनेह अर्सि मोळ्कतोर. ओर ओर्वोग़-ओर्वोग़, तमाङ कय्कने उंद जेतुरि, ओसो दूपम उर्न्जनद बंगरता कस्ला पोस मतोर. अद कस्लामेंड दूपम मता. अद दूपम इतेके देवुळता मन्कलोरा पार्तना आंदु. 9-10 मोळ्किसि ओर इद्रम पूना पाटा वाग़तोर:
“नीक मन्कलोर हव्किस मतोर,
निमा नीवा नेतुर पोहच डोलतिन.
अद नेतुरता कर्सा कीसि, सबे पुळ्गिनाहि, दुस्राङ-दुस्राङ पोल्‍लोङ वळ्ह्‌कवालोरग्डाहि,
सबे देसेह्‌कनोरग्डाहि, सबे जातिनोरग्डाहि, मन्कलोरिन देवुळतेनाह्‌क अलग कीतिन.
ओसो ओरिन मावा देवुळता राजेमतोर कीतिन, तानाङ बूमयालोर वने कीतिन,
ओर पूरा बूमते राजेम कीयनुर.
अदिह्‌क तोला सीटटुन एतलाहि,
ओसो तानगा मेततद वटेतुन तेंडलाहि, निमान लायकतोनिन!
इनजोर पूना पाटा वाग़तोर.
देवतुल्क येसु किर्स्तुन मोळ्किह्‌ताङ
11 पया नना ऊळतन: राजकुर्सि ओसो नालुङ जीवात मनदनव दिंचिङ ओसो पेदल्कु, वेरा सर्ने तिरियनव लाकिनाङ-लाकिङ, कोटिनाङ-कोटिङ लेक पग़वाह देवतुल्क मताङ. नना अविस्कना लेङ केंजतन. 12 अव जोरते इद्रम इताङ:
“मन्कलोर इद गोरेपिलातुन हव्किस मतोर,
मति इंजेके अदिकर तानाये, सबे मालसोम तानाये, बुदि तानाये, लाव तानाये,
मान तानाये, डीसा तानाये, तान जोहर कीकल,
अदे अद्रम कीयना लायकता आंदु,”
इनजोर इताङ. 13 अस्के पोग़ोटा बूमतगा मनदनव, इद बूमतगा मनदनव, हानादीपतगा मनदनव, सम्दुरतगा मनदनव, देवुळ पंडटव सबे इद्रम इनदनद केंजतन:
“राजकुर्सतगा उदतदिन, ओसो गोरेपिलातुन जोहर कीकल.
मान, डीसा, राजेमि अमेसा-अमेसातुह्‌क अविस्कनाये मनि,”
इनजोर इताङ. 14 इतस्के नालुङ आस जीवात मनदनव दिंचिङ, “इंगो आमेन” इनजोर इताङ. अहे ओसो पेदल्कु दंडुम अर्सि मोळ्कतोर.
5:1 4:9 5:1 10:2 5:1 यहेजकेल 2:9-10 5:1 यशायाह 29:11; दानिय्येल 12:4 5:2 10:1; 18:21 5:3 पिलिपितोर 2:10 5:5 पुटमुळि 49:9; इब्रितोर 7:13-14 5:5 यशायाह 11:1,10; रोम सहरतोर 15:12; तोहचीतव पोल्‍लोङ 22:16 * 5:5 बोन यहुदाना पुळ्गता सिङपुल इन्ह्‌तोर, ओग़ दाविद राजाना कूळतोग़, तना कोटुलतोरिन गेल्सतोग़ इतेके येसु किर्स्तु आंदोग़. 5:6 योहन 1:29; तोहचीतव पोल्‍लोङ 13:8 5:6 गोरेपिला इतेके येसु किर्स्तु आंदोग़. 5:6 4:6 5:6 4:4 5:6 13:8 5:6 जकर्याह 4:10 5:6 1:4-5 5:7 4:9 5:8 4:6 5:8 4:4 5:8 4:10 5:8 14:2; 15:2 5:8 देवुळताङ पाटाङ 141:2; तोहचीतव पोल्‍लोङ 8:3-4 5:9-10 13:8 5:9-10 1 कुरिंततोर 6:18-20; तोहचीतव पोल्‍लोङ 7:9; 10:11; 11:9; 13:7; 14:3-4,6; 17:15 5:9-10 1 पत्रु 2:9; तोहचीतव पोल्‍लोङ 1:6; 3:21; 20:4 5:9-10 4:11 5:9-10 देवुळताङ पाटाङ 33:3; 40:3; 98:1; 149:1; यशायाह 42:10; तोहचीतव पोल्‍लोङ 14:3-4 5:11 4:6 5:11 दानिय्येल 7:10; इब्रितोर 12:22; यहुदाल 14 5:12 7:12 5:12 योहन 1:29; तोहचीतव पोल्‍लोङ 4:11; 13:8 5:13 पिलिपितोर 2:10 5:13 4:9 5:13 रोम सहरतोर 11:36; तोहचीतव पोल्‍लोङ 1:6 5:14 4:6 5:14 4:4,10