23
1 Pɔli ka a ɲa lɔ kititɛɛ dɛkuru rɔ kosɛbɛ, ka a fɔ ii yɛ ko: «N badenmailu, n da n taama kɔnɔgbɛya rɔ Alla ɲana haan sisen.»
2 Mɔɔ mɛnilu lɔni tɛrɛ Pɔli tɔrɔfɛ, Alla la sarakalasela kuntiiba Ananiyasi ka a fɔ woilu yɛ ko ii ye Pɔli gbasi a da rɔ.
3 Pɔli ka a fɔ a yɛ ko: «Ile, filanfilante! Alla fanan di ile gbasi. I siini yan ko ka n na kititɛɛ ka bɛn sariya ma, kɔni i jɛrɛ ra sariya tiɲan, baa ile ka a fɔ ko ii ye n gbasi.»
4 Mɔɔ mɛnilu lɔni tɛrɛ Pɔli tɔrɔfɛ, woilu ka a fɔ ko: «I ye Alla la sarakalasela kuntiiba le naninna ten wa?»
5 Pɔli ka ii jabi: «N badenmailu, n tun ma a lɔn ko ale le ye Alla la sarakalasela kuntiiba ri. Ni wo tɛ, n tun tɛ wo fɔ, baa a sɛbɛni Alla la kitabu kɔndɔ ko: Mɛn siini i la mɔɔilu kun na, i kana kuma juu fɔ wo ma.»
6 Nba, Pɔli ka a yen ko kititɛɛ dɛkuru farani. A fan kelen ye Sadusiilu ri. A fan kelen ye Farisilu ri. Wo le kosɔn, Pɔli ka a kan nabɔ ka a fɔ ko: «N badenmailu, n ye Farisi le ri. N fa fanan ye Farisi le ri. Kiti ye kɛla n kanma bi ka a masɔrɔn n jii lani su lawuli ko rɔ, ka bɔ saya rɔ.»
7 Pɔli ka wo fɔ tuma mɛn na, sɔsɔli wulira Farisilu ni Sadusiilu tɛma. Jama ratalara fila ri,
8 baa Sadusiilu ye a fɔla ko su ti nala lawulila ka a bɔ saya rɔ, ko mɛlɛkailu ni jinailu fanan tɛ ye. Kɔni Farisilu lani wo bɛɛ la.
9 Nba, a kɛra mankan ba ri. Sariya karanmɔɔ mɛnilu tɛrɛ Farisilu ri, wo doilu wulira ka sɔsɔli kɛ kosɛbɛ ko: «An ma kojuu si yen cɛɛ ɲin na. Ni mɛlɛka wala jina kumara a yɛ don?»
10 Sɔsɔli juuyara fo kɛlɛden kuntiiba silanda ko ii kana Pɔli sɔmɔn ii ni ii ɲɔɔn tɛ ka a faa. Wo rɔ, a ka kɛlɛdenilu lawa ka Pɔli labɔ mɔɔilu tɛma fanka la, ka wa a ri kɛlɛdenilu la bon ba la.
11 Su wo rɔ, Maari ka a jɛrɛ yiraka Pɔli la ka a fɔ a yɛ ko: «I sɛɛbɛ don. I ra n na ko fɔ ɲa mɛn ma Jerusalɛmu, i ka kan ka a fɔ wo ɲa kelen de ma Rɔmu fanan.»
Yahudiya doilu ko ii ri Pɔli faa
12 Kɛnɛ bɔra tuma mɛn na, Yahudiya doilu ka ii ladɛn ka bɛn kan kelen ma. Ii ka ii kali ko ii tɛ dɔɔnnin kɛ, ko ii tɛ ji min fo ii wa Pɔli faa.
13 Mɔɔ binaanin ni kɔ le bɛnda wo ma.
14 Ii wara Alla la sarakalasela kuntiilu ni mɔɔbakɔrɔilu tɛrɛn ye, ka a fɔ ii yɛ ko: «An ka an kali ko an tɛ dɔɔnnin kɛ fo an wa Pɔli faa.
15 Wo bolo ma, ai ni kititɛɛ dɛkuru ye kela lawa kɛlɛden kuntiiba ma ko a ye Pɔli lana ai ma, sa ai ri a la ko fɛsɛfɛsɛ koɲuma. An di an dabɛn ka a faa sila la sani a ye se ai ma yan.»
16 Kɔni Pɔli barincɛ ka janfa kuma wo mɛn. A wara kɛlɛdenilu la bon ba la ka wo ɲafɔ Pɔli yɛ.
17 Wo rɔ, Pɔli ka kɛlɛden kuntii do kili ka a fɔ a yɛ ko: «I ye wa kanberen ɲin malɔ kɛlɛden kuntiiba la. Kuma do ye a fɛ ka a fɔ a yɛ.»
18 Kɛlɛden kuntii wo wara kanberen malɔ kɛlɛden kuntiiba la, ka a fɔ a yɛ ko: «Kasoden mɛn tɔɔ ko Pɔli, wo ka n kili ka a fɔ n yɛ ko n ye na kanberen ɲin di i ma. Ko kuma do ye a fɛ ka a fɔ i yɛ.»
19 Kɛlɛden kuntiiba ka kanberen mira a bolo ma ka i mabɔ mɔɔilu la ka a maɲininka ko: «Nfen ye i fɛ ka a fɔ n yɛ?»
20 Kanberen ka a fɔ a yɛ ko: «Yahudiya doilu ra bɛn kan kelen ma ko ii ri i madiya sini, ko i ye wa Pɔli ri kititɛɛ dɛkuru ma sa ii ri a la ko fɛsɛfɛsɛ koɲuma.
21 Kɔni i kana sɔn wo ma, baa mɔɔ binaanin ni kɔ ye Pɔli makɔnɔla sila la, sa ii ri a faa. Ii ra ii kali, ko ii tɛ dɔɔnnin kɛ, ko ii tɛ ji min, fo ii wa a faa. Ii ra ban ii rabɛnna fewu. Ii ye ile la jabili le makɔnɔla sisen.»
22 Kɛlɛden kuntiiba ka a fɔ kanberen yɛ ka a magbɛlɛya ko: «I kana a fɔ mɔɔ si yɛ ko i ra ko ɲin nase n ma.» Wo rɔ, a ka sila di kanberen ma ko a ye wa.
Kɛlɛden kuntiiba ka Pɔli lawa jamanatii Felisi ma
23 Kɛlɛden kuntiiba ka kɛlɛden kuntii fila kili ka a fɔ ii yɛ ko: «Ai ye kɛlɛden mɔɔ kɛmɛ fila rabɛn, a ni sotii biwɔrɔnwula ni tanbatii kɛmɛ fila. Dibi wa don kosɛbɛ, ai bɛɛ ye wa Sesare.
24 Ai ye so doilu rabɛn Pɔli yɛ fanan. Ai ye wa a kɛndɛ malɔ jamanatii Felisi wara Sesare.»
25 A ka sɛbɛli rabɛn ka a don ii bolo. A ka mɛn sɛbɛ, wo le ɲin di.
26 «Nde Kolodi Lisiyasi le ye sɛbɛ ɲin nawala jamanatii ɲuma Felisi ma. N ye i fola.
27 «Yahudiyailu ka cɛɛ ɲin mira. Ii tɛrɛ ye a faa ko rɔ. N ka a mɛn waati mɛn na ko Rɔmu duuren de a ri, n ka kɛlɛdenilu ta ka wa a bɔsi ii bolo.
28 Yahudiyailu tɛrɛ ye a jalakila kun mɛn na, n tɛrɛ ye a fɛ ka wo lɔn. Wo le rɔ, n wara a ri ii la kititɛɛ dɛkuru rɔ.
29 Wo rɔ, n ka a yen ko a jalaki kun ye ii jɛrɛ la sariya koilu le ri. Kɔni mɛn ni saya wala kaso labila ka kan, ii ma a jalaki wo si la.
30 A fɔra n ɲana tuma mɛn na ko Yahudiya doilu ra bɛn kan kelen ma ko ii ri a faa, n ka a lawa i ma i kɔrɔ. N ka a fɔ a jalakibailu yɛ ko ii ye wa a jalaki kun fɔ ile ɲana. Mɛn tɛrɛ ye n fɛ ka a fɔ i yɛ, wo le wo ri.»
31 Nba, mɛn fɔra kɛlɛdenilu yɛ, ii ka wo kɛ. Ii wara Pɔli ri Antipatirisi so la su wo rɔ.
32 Wo duusa gbɛ, kɛlɛden mɛnilu tɛrɛ ye ii sen ma, woilu ka ii kɔsɛ ka wa ii la bon ba la. Mɛnilu tɛrɛ ye sotiilu ri, woilu wara Pɔli malɔ.
33 Sotiilu sera Sesare tuma mɛn na, ii ka sɛbɛ di jamanatii ma ka Pɔli karifa a la.
34 Jamanatii ka sɛbɛ karan ka Pɔli maɲininka a bɔ yɔrɔ ma. Pɔli ka a fɔ ko a bɔni Silisi le.
35 Wo rɔ, jamanatii ka a fɔ a yɛ ko: «I jalakibailu wa na tuma mɛn na, n di i fɛsɛfɛsɛ ka i la kititɛɛ.» Mansa Herodi tun ka mansa la jiya bon mɛn lɔ, jamanatii ka a fɔ ko ii ye Pɔli bila wo la ka a kɔnɔgbɛn.