2
1 N ye a fɛ le ai ye a lɔn ko n ye kɛlɛ ba su mɛn dɔ ai yɛ a ni Layodisekailu ni mɛnilu bɛɛ tɛrɛ ma n fari yen.
2 N di kɛlɛ kɛ ii yɛ kosa ii jusu ye sɛɛbɛ don, ka kɛ faribanku kelen di kaninteya rɔ, ka lɔnnin dafani sɔrɔn hankilimaya rɔ kosa ii ye Alla la gbundu ko lɔn, Mɔɔ Ɲenematɔmɔnin,
3 banaya lɔnnin ni hankili bɛɛ dokonni mɛn dɔ.
4 Nba, n ye a fɔla ai yɛ, kosa mɔɔ si kana ai majuuwaya kuma dumanilu la.
5 Baa hali n fari tɛ ai tɔrɔfɛ kɔni n hankili ye ai fɛ. N sɛwani, n wa ai la wakali yen, a ni ai la lemɛniya bɛrɛ Mɔɔ Ɲenematɔmɔnin ma!
Nii kura dafani Isa rɔ
6 Wo rɔ, baa ai ra Isa Ɲenematɔmɔnin sɔrɔn ikomin Maari, ai ye to ale fɛ.
7 Ai ye ai lulu lajii, ka sabati ale rɔ, ka ai fanka don lemɛniya rɔ ikomin ai karannin ɲa mɛn ma. Ai ye baraka bila Alla yɛ waati bɛɛ.
8 Ai ye a kɛ ai hankili la, kosa mɔɔ si kana ai mira dunuɲa kuma fuuilu ni majuuwaya koilu fɛ, ka fara adamadenilu la namunilu ni dunuɲa tanama koilu la, mɛnilu bɔni tɛ Mɔɔ Ɲenematɔmɔnin dɔ.
9 Ka a masɔrɔn Allaya dafani bɛɛ toni Isa faribanku le rɔ.
10 Ai fanan da dafa ale rɔ mɛn ye faamailu ni fankatiilu bɛɛ kun na.
11 Ai ra faaninta kɛ Isa fɛ, mɔɔilu la faaninta tɛ mɛn di, kɔni mɛn ye mɔɔilu hɔrɔyala faribanku diyana koilu fanka ma, Mɔɔ Ɲenematɔmɔnin ye mɛn kɛla.
12 Ka a masɔrɔn ai sunda ji rɔ waati mɛn na, ai ni Isa su donda ai ɲɔɔn fɛ. Ai ra wuli saya rɔ ai ɲɔɔn fɛ fanan lemɛniya baraka rɔ Alla fanka ma mɛn ka a lawuli saya rɔ.
13 Ai faanin le tɛrɛ a ri ai hakɛilu la ko rɔ a ni ai faribanku faanintakɛbaliya ma. Kɔni sisen, Alla ra an hakɛilu makoto, ka Isa nii bila ai ɲɔɔn fɛ.
14 Julu sɛbɛ mɛn nabɛnni an kanma a ni tɔn mɛnilu tɛrɛ an halakila, a ra woilu bɔ, ka ii ban, ka ii gbɔngbɔn a faa jiri kan.
15 Wo ɲa ma, a ra fankatiilu ni faamailu la kɛlɛkɛ fenilu bɔ ii bolo, ka lɔ ii ɲɛrɔ dunuɲa ɲakɔrɔ ikomin mɔɔ miranilu kɛlɛ rɔ, ka fanka sɔrɔn ii ma a la saya baraka rɔ a faa jiri kan.
16 Wo le rɔ, ai kana sɔn mɔɔ si ye ai kitila ai la dɔɔnninfen na ko rɔ wala ai la minninfen wala sali lon do, wala karo kura ladɛnnilu, wala Ɲɔɲɔ Lon na ko rɔ.
17 Woilu bɛɛ kɛni ko natɔilu lulen de ri mɛnilu tɛrɛ ye nala, kɔni tuɲa jɛrɛ kɛni Mɔɔ Ɲenematɔmɔnin de ri.
18 Ai kana sɔn, mɔɔ si ye ai jalaki jɛrɛ majii rɔ wuya rɔ a ni mɛlɛka bato fɛ. Wo mɔɔ su ye a wasola a la koyennilu le la ko rɔ. A fani waso fuu le la a la adamadenya miriya rɔ,
19 ka bɔ Isa rɔ. Adon, ale le kɛni ikomin faribanku kun. Isa baraka rɔ fari bɛɛ baloni, ka kɛ kelen di lulu fenilu ni fasailu fɛ, a tɛrɛ ka bon ikomin Alla ye a fɛ ɲa mɛn ma.
Hɔrɔya Isa rɔ
20 Ni ai ni Mɔɔ Ɲenematɔmɔnin ra faa ai ɲɔɔn fɛ, ka ai hɔrɔya dunuɲa tanama koilu ma, nfenna wo rɔ ai ye taamala ikomin dunuɲa mɔɔ le ai ri? Nfenna ai ye sɔnna ii ye tɔn su ɲinilu la ai ma?
21 Ai kana a ta! Ai kana a ragbɛ ai nɛn na! Bolo kana maa a la!
22 Woilu kɛni fenilu le ri mɛnilu ye tununna ka tamin ii wa labaara waati mɛn na. Woilu kɛni jamariliilu ni karanilu le ri ka fara mɔɔilu la.
23 Wo jamariliilu munuɲani ko kɔrɔlɔn de ri, ka fara ii diyagboya bato ɲa ma, a ni ii la jɛrɛ majii, a ni ii faribanku mira ɲa gbɛlɛn, kɔni fanka tɛ woilu la, ka faribanku natailu kolo.