15
Musa ni Isirayɛlikailu ka Alla tando
1 Nba, Musa ni Isirayɛlikailu ka kalaman bɔ kɛ Allabatala yɛ ko:
«An di kalaman bɔ kɛ Allabatala yɛ
baa a ra se a juuilu la fewu.
A ra soilu ni kɛlɛdenilu bɛɛ lafili kɔɔji rɔ.
2 Allabatala ye fanka dila n ma.
N ye kalaman ɲin bɔla ale le kosɔn.
Ale le ra n kisi n juuilu ma.
N Maari Alla le; n di a bato.
N fa Maari Alla le; n di a bonya.
3 Allabatala ye ikomin kɛlɛkɛla fadiman.
A tɔɔ le ko Allabatala.
4 Ale ra Ferawuna a la kɛlɛdenilu ni wo la sowontoroilu lafili kɔɔji rɔ.
Hali Ferawuna a la jalatii fisamantɛilu tora Kɔɔji Fararɔbin wo rɔ.
5 Ji dunba wo ka woilu latunun fewu.
Ii jiira ji kɔrɔ ikomin kabakurun.
6 Ee Allabatala, fanka jɛrɛ jɛrɛ ye i bolo la.
I ra i juuilu mɔɲɔnkɔ fewu i bolo la!
7 I ra se i juuilu la ka ii halaki,
ka bonya ba sɔrɔn wo rɔ.
I mɔnɛra ka ii halaki,
ikomin ta ye bin jaran janinna ɲa mɛn ma.
8 I ka fɔɲɔ labɔ i nun dɔ fanka la tuma mɛn na,
jiilu ka ii ladɛn i ɲɔɔn kan.
Ji mɛn tun ye woyenna, wo ka i lɔ ka kɛ ikomin jin.
Ji dunba wo ka i lɔ kɔɔji tɛma ka a raja.
9 An juuilu ka a fɔ ko: ‹n di ii kɔsaran fɔɔ ka ii mira.
Ko n di ii bolofenilu rafara an ɲɔɔn tɛma.
Ko fen fen lɔɔ ye n na, ko n di wo bɛɛ ta.
Ko n ni n na fanilu sɔmɔn n laa wo rɔ ka ii halaki.›
10 Kɔni Allabatala, i ka i dafɔɲɔ fɛ kɔɔji kan.
Ji ka ii bɛɛ latunun.
Ii jiira ji fankama wo kɔrɔ ikomin nɛɛfinbɔɔ.
11 Ee batofen gbɛrɛ ɲuman di kɛ ikomin Allabatala, mɛn ye i ɲɔɔn di?
Ɛɛn de, i ɲɔɔn tɛ.
Yon sɛniman wa ikomin ile?
Nɔɔrɔ ye yon na ikomin ile?
Yon ye kabannakoilu kɛla ikomin ile?
12 I ka i bolo rasɔmɔn dɔrɔn,
dunuɲa ka an juuilu lakunun.
13 I ra i la mɔɔilu kunka.
I ri i lɔ an ɲɔrɔ i la kaninteya la a ni i la sebaya la,
ka wa i sii diya sɛniman dɔ.
14 Siya tɔilu ka wo kibaro mɛn tuma mɛn na,
ii silanda fɔɔ ka yɛrɛyɛrɛ.
Silan ba wo ka Filisitiilu mira.
15 Edɔmukailu la kuntiilu silanda kojuuya.
Mowabukailu la ɲɛmɔɔilu yɛrɛyɛrɛra silan bolo ma.
Kanaankailu jiitɛɛra fewu.
16 Ii silanda kojuuya fɔɔ ka yɛrɛyɛrɛ.
Allabatala, ii ka i la sebaya yen tuma mɛn na,
ii tora ii nɔ rɔ ikomin farakolo.
Ii ma se foyi kɛla
fɔɔ i la mɔɔilu banda taminna,
i ka mɔɔ mɛnilu kunka jɔnya rɔ kɔnin.
17 Allabatala, i ye i la mɔɔilu ladonna i la jamana kɔndɔ,
ka i lasii i la koyinkɛ lahidi kan,
i ka mɛn suwandi ka a kɛ i jɛrɛ sii diya ri,
i, Allabatala, i ka bon mɛn lɔ i jɛrɛ bato kanma.
18 Allabatala ri a la mansaya kɛ kadawu.
19 Baa, Ferawuna la sowontoroilu ni a la sofadenilu bɛɛ donda kɔɔji tɛɛfaranin tɛma tuma mɛn na,
Allabatala ka kɔɔji kadi ka a jii ii kan ka ii bɛɛ latunun.
Kɔni Isirayɛlikailu ka ii taama duu jaran kan ka tamin kɔɔji tɛɛfaranin tɛma.»
20 Nabi Miriyamu, Haruna kɔrɔmuso, wo ka sɛsɛ do ta a bolo. Isirayɛli muso tɔilu bɛɛ fanan ka doilu ta ka ii bila Miriyamu kɔ, ka sɛsɛilu fɔ ka don kɛ.
21 Miriyamu ka kalaman bɔ kɛ ka a fɔ ii yɛ ko:
«Ai ye kalaman bɔ kɛ Allabatala yɛ,
baa a ra se a juuilu la fewu.
A ra soilu ni sofadenilu bɛɛ lafili kɔɔji rɔ.»
Ji Kunanin ko rɔ
22 Nba, Musa ka Isirayɛlikailu ta ka bɔ Kɔɔji Fararɔbin dɔ. A lɔra ii ɲɔrɔ ka wa se Suri wula kɔndɔ. Ii ka tele sawa taama kɛ wula kɔndɔ, ii ma ji tɛrɛn ye.
23 Ii sera yɔrɔ do rɔ, mɛn tɔɔ ko Mara, kɔni ii ma se wo ji minna, baa a kunanin tɛrɛ. Wo le kosɔn, yɔrɔ wo tɔɔ lara ko Mara.
24 Isirayɛlikailu wulira ka ii makasi Musa kan. Ii ka a fɔ ko: «An di nfen minna yan?»
25 Musa ka a makasi Allabatala yɛ, ko a ye a dɛmɛn. Allabatala ka jiri do yiraka a la. Musa ka jiri kunkundun wo ta ka a bila ji rɔ. Ji diyara kosɛbɛ!
Ka ii to ye, Alla ka sariyailu di ii ma, ii ka kan ka taama ka bɛn mɛnilu ma. A ka ii kɔrɔbɔ ye fanan.
26 A ka a fɔ ii yɛ ko: «Ni ai ka i raja ka nde Allabatala kan natelen, ka taama ka bɛn n sawo ma, ka n na jamariliilu ni n na sariyailu bɛɛ labato, n ka jankarɔ mɛnilu la Misirankailu kan, n tɛ wo si la ai kan, baa n ye Allabatala le ri, mɛn ye ai lakɛndɛyala.»
27 Nba, Isirayɛlikailu bɔra Mara ka wa se Elimu. Kɔ yɔrɔ tan ni fila ni tamaroju biwɔrɔnwula tɛrɛ ye yɔrɔ wo rɔ. Ii ka ii daa makɛ ji da la ye.