1 Nba, Allabatala Alla tun ka mɛn bɛɛ kɛ Musa ni Isirayɛlikailu yɛ ka ii labɔ Misiran, wo fɔra Musa birancɛ Jɛtiro yɛ, mɛn ye Madiyankailu la sarakalasela ri. 2 Musa muso Sefora tɛrɛ ye a fa Jɛtiro bolo a wara, baa Musa tun ka a lawa ko a ye waati do kɛ ye. 3 Sefora dencɛ fila fanan tɛrɛ ye Jɛtiro bolo ye. Musa tun ka a dencɛ kelen tɔɔ la ko Kerisɔn, baa a ka a fɔ ko: «N ye londan de ri.» 4 A ka dencɛ do fanan tɔɔ la ko Eliyɛsɛri, baa a ka a fɔ ko: «N fa Maari Alla ra n dɛmɛn ka n bɔ Ferawuna bolo, mɛn tɛrɛ ye fɛrɛ ɲininna n ma ka n faa fanmuru la.»

5 Musa birancɛ Jɛtiro ka Musa muso ni a dencɛilu ta ka wa Musa tɛrɛn wula kɔndɔ. Wo tuma Musa ni Isirayɛlikailu daa makɛni Alla la koyinkɛ kɔrɔ. 6 Jɛtiro ka kela lawa Musa ma ko: «Nde, i birancɛ Jɛtiro, natɔ bɔla i tɔrɔfɛ. I muso ni a dencɛ fila natɔ a kɔfɛ.»

7 Wo rɔ, Musa wara a birancɛ kunbɛn diya. A seni ye, a ka i majii ka a fo, ka ban ka a sunbu. Ii ka foli di i ɲɔɔn ma. Ii banni wo la, ii wara don Musa la faaninbon na. 8 Allabatala ka ko mɛn bɛɛ kɛ Ferawuna ni a la mɔɔilu la Isirayɛlikailu dɛmɛn ko rɔ, Musa ka wo bɛɛ ɲafɔ a birancɛ yɛ. Isirayɛlikailu ka tɔrɔya mɛn bɛɛ sɔrɔn sila la, a ni Allabatala ka ii kisi ɲa mɛn ma, Musa ka wo fanan ɲafɔ a birancɛ yɛ.

9 Allabatala ka koɲuma mɛn bɛɛ kɛ Isirayɛlikailu yɛ, ka ii bɔ Misirankailu bolo ɲa mɛn ma ka ii kisi, Jɛtiro sɛwara wo bɛɛ la kosɛbɛ. 10 Jɛtiro ka a fɔ ko: «Tandoli ye Allabatala yɛ, mɛn ka ai bɔ Ferawuna bolo, ka a la mɔɔilu labɔ Misirankailu la fanka kɔrɔ. 11 N ka a lɔn sisen ko Allabatala ka bon batofen tɔilu bɛɛ ri, baa Misirankailu tɛrɛ jɛrɛdabayani Isirayɛlikailu ma; wo le kosɔn Alla ka Misirankailu halaki.» 12 Musa birancɛ Jɛtiro nara saraka ni saraka janinta di Alla ma. Haruna ni Isirayɛlikailu la mɔɔbakɔrɔilu bɛɛ nara ka dɔɔnnin kɛ Musa birancɛ fɛ Alla ɲakɔrɔ.

13 Wo duu sa gbɛnin, Musa wara i sii ka a kɛ mɔɔilu la kititɛɛ ri. Ka bɔ sɔɔma ma haan ka se wura la, jama lɔni tɛrɛ a laminin dɔ ka makɔnɔni kɛ. 14 Musa tɛrɛ ye mɛn bɛɛ kɛla mɔɔilu yɛ ɲin, a birancɛ ka wo yen. Wo rɔ, a ka a fɔ Musa yɛ ko: «I ye nfen kɛla ɲin di? Nfenna kosɔn ile kelen pe siini mɔɔilu la kititɛɛla yan? Ka bɔ sɔɔma ma haan wura la, jama bɛɛ lɔni i laminin dɔ ka makɔnɔni kɛ.» 15 Musa ka a birancɛ jabi: «N ye wo kɛla ka a masɔrɔn mɔɔilu ye nala n ma ka Alla diyanan ko lɔn. 16 Ni sɔsɔli wulira doilu tɛ, ii ri na wo fɔ n yɛ, n di wo kititɛɛ ii tɛma. N di ii lalɔnniya Alla la jamariliilu ni a la sariyailu la.»

17 Jɛtiro ka a fɔ ko: «I ye baarala ɲa mɛn ma, wo ma ɲi de. 18 I ri i jɛrɛ sɛɛ fewu, ka mɔɔilu fanan sɛɛ. Baara wo ka bon i kelen ma. I kelen ti se wo kɔrɔ. 19 I tolo malɔ n na kumakan na, n ye i lalila. Alla ye i dɛmɛn ka n na lalilikan mira. Ile ka kan ka kuma mɔɔilu tɔɔ rɔ Alla yɛ, ka ii la sɔsɔliilu lase a ma. 20 I ye ii karan Alla la jamariliilu ni a la sariyailu la. Ii ka kan ka sila taama ɲa mɛn ma, a ni ii ka kan ka ko mɛnilu kɛ, i ye woilu bɛɛ yiraka ii la. 21 Ka a la wo kan, i ye mɔɔ doilu suwandi jama bɛɛ tɛma, mɛnilu ri se ko la, mɛnilu fanan silanni Alla ɲɛ. Woilu ye kɛ mɔɔilu ri, jama lani mɛnilu la, mɛnilu sidini tuɲa la, dibirafen mira ma di mɛnilu yɛ. I ye mɔɔ woilu sii jama kun na. I ye doilu sii mɔɔ waa kelen kelen kun na, ka doilu sii mɔɔ kɛmɛ kɛmɛ kun na, ka doilu sii mɔɔ biloolu biloolu kun na, ka doilu fanan sii mɔɔ tan tan kun na. 22 Woilu ye mɔɔilu la sɔsɔliilu kititɛɛ lon lon. Ni kiti mɛn bonyara ii ma, ii ri na wo ri ile ma, kɔni ii ri sɔsɔli mɛsɛnilu kititɛɛ ye. Wo rɔ, i ri i lafɛrɛn dɔɔni, baa ii ri i dɛmɛn baara ba wo la. 23 Alla ye i jamarila mɛn na, ni i ka wo kɛ i ri se wo baara la. Mɔɔ bɛɛ la sɔsɔliilu ri ɲanabɔ wo rɔ, ii ri kɔsɛ ii wara jususuma dɔ.» 24 Nba, Musa ka a tolo malɔ a birancɛ la lalilikan na ka wo bɛɛ mira. 25 A ka mɔɔilu suwandi Isirayɛlikailu bɛɛ tɛma, mɛnilu ri se ko la, ka woilu sii jama kun na. A ka doilu lasii mɔɔ waa kelen kelen kun na, ka doilu lasii mɔɔ kɛmɛ kɛmɛ kun na, ka doilu lasii mɔɔ biloolu biloolu kun na, ka doilu fanan nasii mɔɔ tan tan kun na. 26 Woilu le tɛrɛ ye mɔɔilu la sɔsɔliilu kititɛɛla lon lon. Ni kiti mɛn gbɛlɛyara ii ma, ii ri na wo ri Musa ma, kɔni ii ri sɔsɔli mɛsɛnilu kititɛɛ ye.

27 Nba, wo kɔ, Musa ka sila di a birancɛ ma. Wo ka i kɔsɛ ka wa a la jamana rɔ.