21
Sariya mɛnilu siira jɔnilu kosɔn
1 Allabatala ka a fɔ Musa yɛ ikɔ tuun ko: «I ye sariya ɲinilu fɔ Isirayɛlikailu yɛ.
2 Ni ai ka Heburu jɔncɛ san, a ye baara kɛ ai yɛ san wɔɔrɔ kɔrɔ. Kɔni a san wɔrɔnwulana wa se, ai ye a bila sa a ri wa. A ma kan ka foyi sara a bila ko rɔ.
3 Ni ai ka a san ka a tɛrɛn muso tɛ a kun, ai ye a kelen bila. Ni ai ka a san ka a tɛrɛn muso tii le a ri, ai ye a ni a muso bila.
4 Kɔni ni jɔncɛ wo muso ka denilu sɔrɔn a yɛ ka a tɛrɛn a jɔntii le ka muso wo di a ma, muso ni a denilu ri to jɔntii bolo. Jɔncɛ kelen di wa.
5 «Kɔni ni jɔncɛ ka a fɔ ko a jɔntii ni a muso ni a denilu duman a yɛ, ko wo le kosɔn a tɛ a fɛ a jɔntii ye a bila,
6 jɔntii ri wa jɔn di Alla ɲakɔrɔ. A ri wa jɔn di wo rɔ ka a lalɔ bonda la, wala bonda la jiri la, ka a tolo sɔɔ sɔɔlifen na. Wo rɔ jɔncɛ ri to baarala jɔntii yɛ a si bɛɛ kɔrɔ.
7 «Nba, ni cɛɛ do ka a denmuso feere ka a kɛ jɔnmuso ri, denmuso tɛ hɔrɔya ikomin jɔncɛilu ye hɔrɔyala ɲa mɛn ma.
8 Ni denmuso ma diya a jɔntii yɛ, mɛn ka a san a furu kanma, jɔntii ye a to denmuso fa ye a kunka. Jɔntii kana denmuso feere siya gbɛrɛ mɔɔ ma. Wo sariya tɛ a bolo, janfa le wo ri.
9 Ni jɔntii ka denmuso wo di a dencɛ ma, fɔɔ a ye a mira ikomin a denmuso.
10 Ni jɔntii ka jɔnmuso kɛ a muso ri, ka ban ka muso gbɛrɛ furu ka a la jɔnmuso kan, fo a ye jɔnmuso balo, ka a feriyabɔ, ka la a fɛ ikomin a darini a kɛla ɲa mɛn ma kɔrɔman na.
11 Ni jɔntii ma ko sawa wo kɛ jɔnmuso yɛ, jɔnmuso ri kanhɔrɔya ka wa a sankɔ sa a lasɛ la.»
Kojuu mɛnilu ni saya ka kan
12 «Mɔɔ mɛn wa mɔɔ gbasi ka a faa, wo tii ye faa.
13 Kɔni ni mɔɔ ka mɔɔ faa ka a tɛrɛn a miriya tun tɛ a la ka a faa, kɔni Alla le ka a kɛ wo kɛra a bolo, mɔɔfaala wo ye i bori ka wa a makandan yɔrɔ do rɔ, n kɛtɔ mɛn yirakala ai la.
14 Ni mɔɔ do ka a lawuli a ma ka a mɔɔɲɔɔ faa kewuya la, ai ye wo tii mira ka a faa, hali ni a ra i bori ka wa a makandan n saraka janin diya rɔ.
15 «Ni mɔɔ mɛn ka a fa gbasi, wala a na gbasi, wo tii ye faa.
16 «Ni mɔɔ mɛn ka mɔɔ do sonya ka wa a ri, wo tii ye faa. Ni ai ka mɔɔ wo tɛrɛn a bolo, wala ni ai ka a tɛrɛn a ra mɔɔ wo feere, wo tii ye faa.
17 «Ni mɔɔ mɛn ka a fa wala a na danka, wo tii ye faa.
18-19 «Ni mɔɔ do ka a mɔɔɲɔɔ madimin kaba la wala a bolo la sɔsɔli rɔ, ka a kɛ sababu ri a mɔɔɲɔɔ wo lani ri to a la lafen kan ka mɛn, ai kana ko kɛ wo tii la fɔlɔ, fɔɔ ka makɔnɔni kɛ. Kɔ fɛ, ni madiminbatɔ ka gbeleke ta ka i wuli ka taama damira lu ma, a gbasila kana jalaki butun. Kɔni madiminbatɔ la baara lalɔ mɛn kɛra, a gbasila ye wodi bɔ ka wo sara madiminbatɔ yɛ. Ka a la wo kan, a ye a janto madiminbatɔ rɔ haan a wa kɛndɛya fewu.
20 «Mɔɔ wa a la jɔncɛ wala a la jɔnmuso gbasi gbeleke la, ni jɔn wo faara wo kosɔn, ko ye latɔn jɔntii la.
21 Kɔni ni jɔn wo ka tele kelen wala tele fila kɛ a ma faa, ko kana latɔn jɔntii la, baa a ta le jɔn di fasayi!
22 «Cɛɛ fila wa to kɛlɛla ka se muso kɔnɔma do ma, ka a kɛ sababu ri a moyira jona, ni muso ma madimin ba kɛ, mɛn sera a ma wo ri wodi bɔ. A ka kan ka wodi jate mɛn bɔ, muso tii ri wo fɔ, kɔni fɔɔ kititɛɛlailu wa sɔn jate wo ma.
23 Kɔni ni kojuu ka muso sɔrɔn, ai ye wo ta sara, nii ye sarala nii de la,
24 ɲa ye sarala ɲa le la, ɲin ye sarala ɲin de la, bolo ye sarala bolo le la, sen ye sarala sen de la.
25 Mɛn wa do majanin, ai ye wo fanan majanin. A wa do madimin, ai ye a fanan madimin. Mɛn wa mɔɔ gbasi ka yɔrɔ do funu, ai ye wo tii fanan gbasi ka yɔrɔ do funu.
26 «Ni mɔɔ do ka a la jɔncɛ wala a la jɔnmuso gbasi ka se wo ɲa ma ka a ɲa fuyen, fo a ye jɔn wo kanhɔrɔya. Wo ri kɛ ɲa wo sara ri.
27 Ni a ka a la jɔncɛ wala a la jɔnmuso gbasi ka wo ɲi bɔ a da rɔ, fo a ye jɔn wo kanhɔrɔya. Wo ri kɛ ɲi wo sara ri.
28 «Ni tora do ka cɛɛ wala muso sɔɔ ka a faa, ai ye tora wo bon kaba la ka a faa. Mɔɔ kana tora wo sobo dɔɔn. Kɔni ai kana tora tii jalaki wo rɔ.
29 Ni tora wo darini mɔɔilu sɔɔla, ka a tɛrɛn mɔɔilu ra wo fɔ a tii yɛ kɔni a ma sɔn ka a janto a rɔ, ni tora wo ka mɔɔ do sɔɔ ka a faa, ai ye tora wo bon kaba la ka a faa ka a tii fanan faa.
30 Kɔni ni sayabatɔ la denbaya ka a fɔ ko tora tii ye wodi bɔ sa a kana faa, tora tii ri wodi bɔ ka a nii kunka. Kɔni wodi jate mɛn fɔni, fo a ye wo bɛɛ sara le fasayi.
31 Ni tora ka mɔɔ do dencɛ wala denmuso sɔɔ, sariya kelen ɲin ye mɛn fɔla, ai ye wo kɛ.
32 Ni tora ka jɔncɛ wala jɔnmuso sɔɔ, tora tii ye wodi gbanan bisawa bɔ ka a di jɔn tii ma. Kɔni ai ri tora wo bon kaba la.
33 «Ni mɔɔ do ka ji lamara denka sen ka a da lakani to, ni wo tɛ a ka ji lamara denka kɔrɔ da lakani to, ni tora wala sofali nara be wo kɔndɔ,
34 denka tii ri kolofen sankɔ lasɛ kolofen tii ma. Kɔni kolofen wo sobo ri kɛ denka tii ta ri.
35 «Ni mɔɔ do la tora ka mɔɔ gbɛrɛ ta madimin fɔɔ a sara, nisi tii fila woilu ye dɛ ka tora kelen wo feere ka a sankɔ wodi rafara ii ɲɔɔn tɛ. Ii ri tora faani sobo fanan ratala ii ɲɔɔn tɛ.
36 Ni mɔɔilu tun ka a lɔn kɔrɔman ko tora wo darini torailu sɔɔla, kɔni a tii ma sɔn a jantola a rɔ, tora tii wo ye tora faani ɲɔɔn bɔ ka a di tora tii do wo ma. Tora faani wo ri kɛ a ta ri.
37 Ni mɔɔ do ka nisi wala saa sonya ka a faa, wala ka a feere, a ye nisi loolu sara nisi kelen nɔ rɔ. Ni saa le, a ye saa naanin lasɛ saa kelen nɔ rɔ.»