23
Ai ye mɔɔilu mira telenbaya la
1 «Ai kana wuya lajɛnsɛn mɔɔilu tɛma. Ai wa kɛ sere ri kiti diya, ai kana wuya fɔ ka mɔɔ juu dɛmɛn.
2 Ai kana ai bila jama kɔ ka wa kojuu kɛ. Ai wa kɛ sereilu ri kiti diya, ai kana ai la sereya jɛnkɛ ka ai bila jama kɔ ka wuya fɔ.
3 Ni bolokolon nara kiti diya, ai kana wuya fɔ a la ko kininkinin kosɔn ka a dɛmɛn.
4 «Ni ai bɛnda ai juu la nisi ri, wala a la sofali ri, mɛn da tunun a ma, ai ye a mira ka wa a ri a tii ma.
5 Ni ai ka ai juu yen sila la, a la sofali beni a donin gbilin kɔrɔ, ai kana a to ye. Ai ye ai juu dɛmɛn a la sofali a lawulila.
6 «Bolokolon wa na kiti diya, fɔɔ ka wo la kiti tɛɛ telenbaya la.
7 Ai kana wuya la ai mɔɔɲɔɔ na kiti diya. Ai kana kiti gboya mɔɔ jalakibali la, wala mɔɔ telenni la, ka woilu faa, baa mɛn wa kojuu wo kɛ, n tɛ yafa wo ma.
8 Ai kana surɔfen mira, ka a masɔrɔn surɔfen de ye a kɛla mɔɔilu tɛ sɔn tuɲa yenna. Mɔɔ telenni ye kititɛɛ mɛnilu kɛla, surɔfen ye woilu tiɲanna.
9 «Ai kana londanilu tɔrɔ. Ai jɛrɛ ka a lɔn londanya ye ɲa mɛn ma, baa ai tɛrɛ ye londan de ri Misiran jamana rɔ.»
San wɔrɔnwulana ni lon wɔrɔnwulana
10 «Ai ye sɛnɛ kɛ san wɔɔrɔ kɔrɔ, ka lanni kɛ ka suman nadon.
11 Kɔni a san wɔrɔnwulana, ai ye ai la duu wo to ye, ai kana a sɛnɛ. Bolokolon mɛnilu ye ai tɛma, woilu ri balo do sɔrɔn ye, baa suman doilu ri fɛrɛn a jɛrɛ ma. Bolokolonilu fanan wa mɛn to ye, waa rɔ soboilu ri wo dɔɔn. Ai ye wo ɲɔɔn kɛ ai la rɛsɛnfɛilu fanan dɔ, a ni ai la olibiye fɛilu rɔ.
12 «Baara kɛta mɛn wa kɛ ai ma, ai ye wo kɛ tele wɔɔrɔ kɔrɔ. Kɔni tele wɔrɔnwulana lon, ai kana baara si kɛ. Wo rɔ, ai la nisi ni ai la faliilu ri ii ɲɔɲɔ, a ni i la jɔnmuso la dencɛ ni londan mɛnilu siini ai wara.
13 «N ka mɛnilu bɛɛ fɔ ai yɛ, ai ye woilu bɛɛ labato fewu. Ai kana batofen gbɛrɛilu si bonya muumɛ. Mɔɔilu kana woilu tɔɔ mɛn ai da rɔ.»
Dina sali lon ba sawa
14 «San san ai ye sali sawa kɛ ka n bonya.
15 «A waati wa se Abibu karo la, ai ye Buru Fununbali Sali kɛ, ka buru lɛbɛnta dɔɔn tele wɔrɔnwula kɔrɔ ikomin n ka a fɔ ai yɛ ɲa mɛn ma. Ai ye a kɛ ten, baa ai bɔra Abibu karo le la Misiran. Kɔni ai kana na n bato diya ni niilifen ma na ai bolo.
16 Ai ri Sumanka Sali kɛ san san. Wo tuma, ai ri ai la suman kura fɔlɔilu kɛ saraka ri, ai ra mɛnilu sɔrɔn ai la sɛnɛ rɔ. Ai wa ban sɛnɛ baarala san san ka suman nadon, ai ye Suman Nadon sali kɛ.
17 San san, ai la cɛɛilu bɛɛ ye na sali sawa ɲin kɛ n ɲakɔrɔ ka n bato, nde mɛn ye ai Maari Allabatala ri.
18 «Ai wa kolofen kɛ saraka ri ka wo jeli di n ma, ai kana buru fanan di n ma, lɛbɛn ye mɛn dɔ. Ai wa kɛ kolofen bɔla n yɛ sali tumana, wo ken kana su si.
19 San san ai wa suman kura fɔlɔ mɛnilu ka, ai ye na wo ɲuma ɲumailu ri ai Maari Allabatala a la bon na.
«Ai kana badenni sobo tibi a na nɔnɔ la.»
Alla ri a la jama dɛmɛn
20 «N di mɛlɛka lawa ai ma, mɛn di wa ai ɲɛ ka ai lakandan sila la. A ri ai lana jamana rɔ, n ka mɛn dabɛn ai yɛ.
21 Ai ye ai tolo malɔ mɛlɛka wo la ka a kumakan mira ka wo kɛ, baa a ye ko bɛɛ kɛla n tɔɔ le rɔ. Ai kana a masɔsɔ. Ni ai ka a sɔsɔ a ti nala yafala ai ma.
22 Kɔni ni ai ka ai tolo malɔ a la koɲuma ka n kumakan bɛɛ latelen, ai juuilu ri kɛ n juuilu ri, ai kɛlɛɲɔɔnilu ri kɛ n kɛlɛɲɔɔnilu ri.
23 «N na mɛlɛka ri wa ai ɲɛfɛ ka ai ladon jamana wo rɔ. Amɔrikailu siini ye, a ni Hɛtikailu ni Peresikailu ni Kanaankailu ni Hifikailu ni Jebusikailu, kɔni n di woilu halaki.
24 Ai kana i majii ii la batofenilu ɲɛ ka woilu bato. Ai kana i ladɛn ii la dina ko kɛɲailu rɔ. Ai ye ii la batofen bisikilu ratiɲan fewu. Ai ye ii la kaba lalɔni batotailu rakadikadi.
25 Ni ai ka ai Maari Allabatala bato, n di balo ɲuma ni ji siyaman di ai ma, ka jankarɔ mabɔ ai la.
26 Ai muso si kɔnɔ ti tiɲan ai la jamana rɔ. Muso si tɛ kɛ densɔrɔnbali ri. N di si jan di ai ma ka ai sabati.
27 «N di a kɛ, jamanailu bɛɛ mɔɔilu wa ai na ko mɛn, ii ri silan kosɛbɛ. Ai wa se yɔrɔ yɔrɔ, ye mɔɔilu ri kɔndafili ai ɲɛ kojuuya. Ai juuilu bɛɛ ri i bori ai ɲɛ.
28 N di dondoli kunbailu lawa ai ɲɛ ka Hifikailu ni Kanaankailu ni Hɛtikailu gbɛn.
29 Kɔni n ti nala woilu gbɛnna ai ɲɛ san kelen kɔrɔ, sa jamana rakolon kana to, baa waa rɔ soboilu kana siyaya ai ma ka ai tɔrɔ.
30 N di to mɔɔilu gbɛnna ai ɲɛ dooni dooni haan ai ye siyaya ka jamana wo bɛɛ mira ka a kɛ ai ta ri.
31 N di ai la jamana dan sii. A dan di bɔ Kɔɔji Fararɔbin ma ka wa se fɔɔ Filisitiilu la kɔɔji ma, ka bɔ Sinayi wula ma ka wa se fɔɔ Efirati Ba ma. N di jamana wo duurenilu don ai bolo, ka ii gbɛn ai ɲɛ.
32 Ai kana teriya don ai ni woilu tɛma, wala ai ni ii la batofenilu tɛma.
33 Ai kana sɔn mɔɔ woilu ye i sii ai la jamana kɔndɔ sani ii ri ai lɔ nde Allabatala hakɛ tala, baa ni ai ka ii la batofenilu bato, a ri kɛ ikomin ai ra mira miralifen na.»