21
Isa ka a jɛrɛ yiraka a la karandenilu la dala da la
1 Waati wo tamin kɔ rɔ, Isa ka a jɛrɛ yiraka a la karandenilu la Tibɛriyasi Dala da la. A ka a jɛrɛ yiraka wo ɲa le ma.
2 Simɔn Piyɛri, Tomasi mɛn ye kilila ko Filani, a ni Natanayɛli mɛn bɔni Kana mɛn ye Kalile mara rɔ, wo ni Sebede dencɛ fila, a ni karanden fila do, wo bɛɛ tɛrɛ ye i ɲɔɔn fɛ.
3 Simɔn Piyɛri ka a fɔ ii yɛ ko: «N watɔ jɛɛ faa diya.» Ii ka a fɔ a yɛ ko: «An fanan di wa i kɔfɛ.» Ii bɔra ka yɛlɛ kulun kɔndɔ. Su kelen wo rɔ, ii ma foyi mira.
4 Wo sɔɔma da la, Isa tɛrɛ ye dala da la, kɔni a la karandenilu ma a lɔn ko ni Isa le ye.
5 Isa ka a fɔ ii yɛ ko: «N denilu, ai ra jɛɛ do sɔrɔn wa?» Ii ka a jabi: «Ɛɛn.»
6 A ka a fɔ ii yɛ ko: «Ai ye jɔɔ lafili kulun bolokininma fan fɛ, ai ri jɛɛ mira.» Ii ka jɔɔ lafili wo rɔ, ii tɛrɛ ti se a masɔmɔnna jɛɛ siyaman bolo.
7 Wo rɔ karanden mɛn duman tɛrɛ Isa yɛ, wo le ka a fɔ Piyɛri yɛ ko: «Maari le!» Wo ka a tɛrɛn duruki gbansan ye Simɔn Piyɛri kan na. Awa, a ka a mɛn tuma mɛn na ko Maari le, a ka duruki wo tɛsidi, ka i juran ji rɔ ka wa Isa tɛrɛn ye.
8 Karanden doilu ni kulun nara a ni jɛɛ siyaman ba a ni jɔɔ, baa a tɛrɛ ma jan bakɛ dala da la, ko a ri mɛtɛri kɛmɛ ɲɔɔn bɔ.
9 Ii se mɛn kɛni gbelema ii ka jɛɛ do yen janinna sinkɔn ta la, a ni buru.
10 Isa ka a fɔ ii yɛ ko: «Ai ye ai la jɛɛ do ta, a nani mɛn di.»
11 Simɔn Piyɛri yɛlɛra kulun kɔndɔ ka jɔɔ sɔmɔn ka jɛɛ kunba kɛmɛ a ni biloolu ni sawa mira. Hali jɛɛ wa siyaya bakɛ jɔɔ ti a rafarafarala.
12 Isa ka a fɔ ii yɛ ko: «Ai ye na dabɔ kɛ.» Karanden woilu si ma susu ka a maɲininka ko: «Yon de i ri?» Ii ka a lɔn ko Maari le.
13 Isa ka buru ta ka a ratala ii la, ka jɛɛ fanan datala ii la.
14 Isa wuli ka bɔ saya rɔ, a yiraka sawanan de tɛrɛ ye a la karandenilu la.
Isa ka Piyɛri fɛsɛfɛsɛ
15 Ii banni dabɔla, Isa ka a fɔ Simɔn Piyɛri yɛ ko: «Yuhana dencɛ Simɔn, n duman i yɛ ka tamin do ɲin bɛɛ la wa?» A ka a jabi: «Ɔɔn Maari, i ka a lɔn ko i duman n yɛ.» Isa ka a fɔ a yɛ ko: «I ye n na saa denninilu balo.»
16 A ka a fɔ a yɛ fanan ko: «Yuhana dencɛ Simɔn, n duman i yɛ wa?» Piyɛri ka a jabi: «Ɔɔn Maari, i ka a lɔn ko i duman n yɛ.» Isa ka a fɔ a yɛ ko: «I ye kɛ n na saa kɔnɔgbɛnna le ri.»
17 A ka a fɔ a yɛ a siɲa sawanan dɔ ko: «Yuhana dencɛ Simɔn, n duman i yɛ wa?» Piyɛri niiafinda, baa Isa ra a maɲininka fo siɲa sawa ko: «N duman i yɛ wa?» A ka a jabi: «Maari, i ka ko bɛɛ lɔn. I ka a lɔn ko i duman n yɛ.» Isa ka a fɔ a yɛ ko: «I ye n na saa denninilu balo.
18 N ye tuɲa le fɔla i yɛ ko: i tɛrɛ ye denninya rɔ waati mɛn dɔ i tɛrɛ ye i la kurusi yala sidila ka wa yɔrɔ rɔ, yɔrɔ mɛn ta duman i yɛ, kɔni i wa kɔrɔya tuma mɛn na, i ri i bolo rasɔmɔn, mɔɔ gbɛrɛ ri i sidi ka i lawa yɔrɔ rɔ, yɔrɔ mɛn i tɛ a fɛ ka wa.»
19 Isa ka kuma wo fɔ ka Piyɛri sa ɲa yiraka, a ri mɛn kɛ sa a ri Alla tɔɔ gbiliya. Wo rɔ a ka a fɔ a yɛ ko: «Bila n kɔfɛ.»
Karanden mɛn duman tɛrɛ Isa yɛ
20 Piyɛri ka kɔfɛnɛ, ka Isa la karanden yen mɛn duman a yɛ, a ye taamala ii kɔfɛ. A la karanden mɛn tɛrɛ ye a kɔfɛ dɔɔnnin waati la, mɛn ka a kun la a sisi rɔ ka a fɔ a yɛ ko: «Yon ye i janfala?»
21 Piyɛri ka a yen ka a fɔ Isa yɛ ko: «Ɲin don? A ko di?»
22 Isa ka a jabi: «Ni a duman n yɛ a ye to dunuɲa rɔ haan n ye na waati mɛn dɔ, wo tɔnɔ ɲuman ɲa la i ma? Ile, bila n kɔ!»
23 Kuma wo kosɔn, a tɛrɛ ye fɔla fan bɛɛ badenmailu tɛma ko karanden wo ti faala. Kɔni Isa ma a fɔ ko ale ti faala, kɔni ko: «Ni a duman n yɛ a ye to dunuɲa rɔ haan n ye na waati mɛn dɔ, wo tɔnɔ ɲuman ɲa la i ma?»
24 Karanden kelen wo le kɛla a la sereya ri a la ko bɛɛ rɔ a ni a ka ko bɛɛ sɛbɛ. An ka a lɔn ko a la sereya ye tuɲa le ri.
25 Isa ka ko gbɛrɛ siyaman kɛ, mɛnilu ma sɛbɛ yan. Ni wo kelen kelenna bɛɛ tun sɛbɛra, kitabu mɛnilu tun di sɛbɛ wo rɔ, woilu tun tɛ kun dunuɲa rɔ.