10
Josuwe ka Amɔrikailu la mansailu kɛlɛ
1 Nba, Jerusalɛmu mansa Adoni Sedɛki ka a mɛn ko Josuwe ra Ayi so mira. Ko a ka sokɔndɔ mɔɔilu ni a mansa bɛɛ halaki, ikomin a tun ka Jeriko sokɔndɔ mɔɔilu ni a mansa halaki ɲa mɛn ma. Ko Kibeyɔnkailu ra hɛrɛ ɲinin Isirayɛlikailu fɛ, ka duɲɔɔnya don ii ni woilu tɛma ka ii sii woilu tɛma.
2 Jerusalamukailu bɛɛ silanda kojuuya wo rɔ, baa Kibeyɔn tɛrɛ ye so ba le ri. A ka bon Ayi so ri, a ni mansasoilu bɛɛ ka kan. Kibeyɔn cɛɛilu bɛɛ tɛrɛ ye cɛɛ fadiyanin de ri fanan.
3 Wo le kosɔn, Jerusalɛmu mansa Adoni Sedɛki ka kela lawa Heburɔn mansa Ohamu ma, a ni Jaramutu mansa Piramu ni Lakisi mansa Jafiya ni Ekilon mansa Debiri.
4 A ka a fɔ ko: «Ai ye na ka n dɛmɛn ka Kibeyɔnkailu kɛlɛ, baa ii ra hɛrɛ ɲinin Josuwe ni Isirayɛlikailu fɛ ka duɲɔɔnya don ii ni woilu tɛma.»
5 Wo bolo ma, Jerusalɛmu mansa ni Heburɔn mansa ni Jaramutu mansa ni Lakisi mansa ni Ekilon mansa a ni ii la kɛlɛdenilu ka ii ɲɔɔn nadɛn. Mansa woilu ye Amɔrikailu la mansa loolu le ri. Ii ni ii la kɛlɛdenilu bɛɛ wara Kibeyɔnkailu kanma, ka ii daa makɛ Kibeyɔn so laminin dɔ ko ii ye a kɛlɛla.
6 Kibeyɔnkailu ka kela lawa Josuwe yɛ Kilikali ko: «I kana i la jɔnilu to ii kelen na. I jaandi, i kaliya, i ye na an nakisi. I ye an dɛmɛn, baa Amɔrikailu la mansa mɛnilu siini koyinkɛ ma yɔrɔilu rɔ, woilu bɛɛ ra ii ɲɔɔn nadɛn ka na an kanma.»
7 Josuwe ka wo mɛn tuma mɛn na, a ka a la cɛɛ fadiyaninilu ni a la kɛlɛden tɔilu bɛɛ ladɛn. Ii bɛɛ bɔra Kilikali ka wa kɛlɛ diya.
8 Allabatala ka a fɔ Josuwe yɛ ko: «I kana silan mansa woilu ni ii la kɛlɛdenilu yɛ. N di ii bila i la fanka kɔrɔ. Ii si ti nala sela i kɛlɛla.»
9 Josuwe ni a la kɛlɛdenilu bɔni Kilikali, ii ka su muumɛ kɛ taama la. Wo rɔ, ii nara bara Amɔrikailu rɔ ka be ii kan.
10 Allabatala ka a kɛ Amɔrikailu silanda Isirayɛlikailu yɛ kosɛbɛ, fɔɔ ka ii hankili ɲaamin. Isirayɛlikailu ka ii kɛlɛ ka mɔɔ siyaman faa ii rɔ Kibeyɔn ye, ka ban ka a tɔilu kɔsaran Bɛti-Hɔrɔn so sila la. Ii tɛrɛ ye Amɔrikailu kɛlɛla ka wa se fɔɔ Aseka ni Makeda soilu ma.
11 Amɔrikailu ka ii bori Isirayɛlikailu kɔrɔ Aseka so sila la, mɛn bɔni Bɛti-Hɔrɔn. Ii boritɔla ten, Allabatala ka a kɛ sancikolo kunbailu jiira ii ma ka bɔ sankolo rɔ haan ii sera Aseka. Sancikolo ka mɔɔ siyaman faa ii rɔ ka tamin Isirayɛlikailu ka mɛnilu faa fanmuru la.
12 Wo lon kelen--lon mɛn Allabatala ka Amɔrikailu bɔsi Isirayɛlikailu bolo--Josuwe ka i lɔ Isirayɛlikailu bɛɛ ɲana ka Allabatala matara ko:
«Tele, i lɔ Kibeyɔn so kundɔ.
Karo, ile lɔni ye to Ajalɔn dinban kundɔ.»
13 Tele ka i lɔ wo rɔ. Karo fanan lɔni tora a nɔ rɔ. Ii tora ii ɲa ma fɔɔ Isirayɛlikailu ka ii la mɔnɛ bɔ ii juuilu rɔ. Ko woilu bɛɛ sɛbɛni Jasɛri la kitabu kɔndɔ. Tele lɔni tora sankolo tɛma; a ka tele kelen ɲɔɔn kɛ, a ma be.
14 Wo ɲɔɔn tun ma kɛ fɔlɔ. A ɲɔɔn fanan ti nala kɛla butun, baa mɔɔ ka mɛn fɔ, Allabatala sɔnda ka wo kɛ. Sika tɛ a rɔ, Allabatala jɛrɛ le tɛrɛ kɛlɛ kɛla Isirayɛlikailu yɛ.
15 Kɛlɛ banni, Josuwe ni Isirayɛlikailu bɛɛ ka ii kɔsɛ ii daa makɛ diya rɔ Kilikali.
Josuwe ka mansa loolu faa
16 Nba, Amɔrikailu la mansa loolu tun ka ii bori ka wa ii dokon falan do la Makeda so da fɛ.
17 A fɔra Josuwe yɛ ko mɔɔilu ka Amɔrikailu la mansa loolu doonni tɛrɛn falan na Makeda so da fɛ.
18 Josuwe ka a fɔ a la mɔɔilu yɛ ko: «Ai ye wa kabakurun belebeleba doilu makurukuru ka falan datuun, ka mɔɔ doilu bila yɔrɔ wo kɔnɔgbɛn na.
19 Kɔni ai kana mɛn ye. Ai ye ai juuilu kɔsaran fewu ka ii kɛlɛ. Ai kana a to ii ye don ii la soilu kɔndɔ, baa ai Maari Allabatala ra ii bila ai la fanka kɔrɔ.»
20 Josuwe ni Isirayɛlikailu ka Amɔrikailu halaki fewu. Dɔɔni ii ma ii bɛɛ faa. Mɔɔ dando mɛnilu ma faa, woilu borira ka wa don ii la so bailu kɔndɔ.
21 Nba, Isirayɛlikailu bɛɛ ka ii kɔsɛ hɛrɛ rɔ Josuwe ma ii daa makɛ diya Makeda. Mɔɔ si ma Isirayɛlikailu mafɔ wo kɔ.
22 Awa, Josuwe ka a fɔ ko: «Ai ye wa falan da laka sisen ka Amɔrikailu la mansa loolu labɔ. Ai ye na ii ri n ma.»
23 Ii wara mansa loolu labɔ falan na. Mansa loolu woilu le siini tɛrɛ Jerusalɛmu so kun na, a ni Heburɔn so ni Jaramutu so ni Lakisi so ni Ekilon so, bɛɛ ni a ta.
24 Ii nara mansa woilu ri Josuwe ma tuma mɛn na, a ka Isirayɛlika cɛɛilu bɛɛ makili ko ii ye na. Josuwe ka a fɔ a la kɛlɛden kuntiilu yɛ ko: «Ai ye na ai senilu la mansa ɲinilu kan kan.» Ii nara ii senilu la mansailu kan kan.
25 Josuwe ka a fɔ ii yɛ ko: «Ai kana silan, ai jusu kana tiɲan! Ai ye ai raja, ka ai jusu latɛɛ, baa Allabatala ri ɲin ɲɔɔn kɛ ai juuilu bɛɛ la, ai kɛtɔ mɛnilu kɛlɛla.»
26 Josuwe ka mansa woilu faa, ka ii su dun jiriju loolu la. Ii dunni tora jiri la fɔɔ tele be waati.
27 Tele be waati la, Josuwe ka a fɔ a la mɔɔilu yɛ ko ii ye mansailu suilu lajii ka bɔ jirijuilu la. Josuwe la mɔɔilu ka ii suilu lajii ka wa woilu lafili falan kɔndɔ, mansailu doonni tɛrɛ falan mɛn kɔndɔ. Josuwe la mɔɔilu ka kabakurun ba doilu la falan da la ka a datuun woilu la. Hali bi kabakurun ba woilu ye ye.
Josuwe ni a la kɛlɛdenilu ka so gbɛrɛilu mira
28 Wo lon kelen Josuwe ni a la kɛlɛdenilu wara Makeda so kɛlɛ ka se ye mɔɔilu la. Josuwe ni a la kɛlɛdenilu ka Makeda mansa ni sokɔndɔ mɔɔilu bɛɛ faa fanmuru la. A ka ii bɛɛ halaki; a ma mɔɔ si to ye. Josuwe tun ka mɛn kɛ Jeriko mansa la, a ka wo ɲɔɔn kɛ Makeda mansa la.
29 Josuwe ni Isirayɛlikailu bɛɛ bɔra Makeda ka wa Libina so kɛlɛ.
30 Allabatala ka Libina so ni a mansa fanan di Isirayɛli kɛlɛdenilu ma. Ii ka Libina sokɔndɔ mɔɔilu bɛɛ faa fanmuru la. Ii ma mɔɔ si to ye. Josuwe tun ka mɛn kɛ Jeriko mansa la, a ka wo ɲɔɔn kɛ Libina mansa la.
31 Josuwe ni Isirayɛlikailu bɛɛ bɔra Libina ka wa Lakisi. Ii seni ye, ii ka so laminin ka a kɛlɛ.
32 Kɛlɛ tele filana lon, Allabatala ka Lakisi so di Isirayɛlikailu ma. Ii ka Lakisi sokɔndɔ mɔɔilu bɛɛ faa fanmuru la, ikomin ii tun ka a kɛ Libina so kɔndɔ ɲa mɛn ma.
33 Wo tuma, Kɛsɛri mansa Horamu ni a la mɔɔilu nara Lakisikailu dɛmɛn kanma. Kɔni Josuwe ni a la kɛlɛdenilu ka ii kɛlɛ ka se ii la. Ii ma mɔɔ si to ye.
34 Josuwe ni Isirayɛlikailu bɛɛ bɔra Lakisi ka wa Ekilon. Ii seni ye, ii ka so laminin ka a kɛlɛ.
35 Wo lon kelen Josuwe ni a la mɔɔilu ka so mira. Ii ka Ekilon sokɔndɔ mɔɔilu bɛɛ faa fanmuru la, ka ii halaki, ikomin ii tun ka a kɛ Lakisi so kɔndɔ ɲa mɛn ma.
36 Josuwe ni Isirayɛlikailu bɛɛ bɔra Ekilon ka wa Heburɔn, ka so wo kɛlɛ.
37 Ii ka Heburɔn mira, ka a mansa ni sokɔndɔ mɔɔilu bɛɛ faa fanmuru la ka ii bɛɛ halaki. Ii ma mɔɔ si to ye. Ii ka ye mɔɔilu bɛɛ faa ikomin ii tun ka a kɛ Ekilon ɲa mɛn ma. Ii ka Heburɔn so mɛsɛnilu fanan mira, ka ye mɔɔilu bɛɛ faa.
38 Wo kɔ rɔ, Josuwe ni Isirayɛlikailu bɛɛ wara Debiri so kɛlɛ.
39 Josuwe ni a la kɛlɛdenilu ka Debiri so ni a mansa ni Debiri so mɛsɛnilu bɛɛ mira, ka woilu mɔɔilu bɛɛ faa fanmuru la, ka ii bɛɛ halaki. Ii ma mɔɔ si to ye. Ii tun ka mɛn kɛ Heburɔn so kɔndɔ la a ni Libina sokɔndɔ mɔɔilu ni woilu la mansa la, ii ka wo ɲɔɔn de kɛ Debiri sokɔndɔ mɔɔilu ni ii la mansa la.
40 Josuwe ka jamana wo bɛɛ se, koyinkɛ ma yɔrɔilu ni gbɛkannan ni telebe koyinkɛ ma yɔrɔ ni ii la mansailu bɛɛ. A ka mɔɔilu bɛɛ halaki, mɛnilu bɛɛ ka jan, a ka fen bɛɛ faa mɛn ye a niilakilila ikomin Allabatala, Isirayɛli la Alla ka a jamari ɲa mɛn ma.
41 Josuwe ka ii kɛlɛ ka bɔ Kadɛsi-Baraneya so la haan Kasa so, a ni Kosɛni jamana bɛɛ, ka wa sii Kibeyɔn so la.
42 Wo le ka a kɛ, Josuwe ni a la kɛlɛdenilu sera mansa woilu bɛɛ la kɛlɛ kelen de rɔ ka ii la duuilu mira ii la. Baa, Isirayɛlikailu Maari Allabatala tɛrɛ ye kɛlɛ kɛla ii yɛ.
43 Ii banda wo bɛɛ mirala tuma mɛn na, ii ka ii kɔsɛ ii daa makɛ diya Kilikali.