2
Isa sɔrɔn ɲa
Nba, lon do rɔ, Rɔmu mansaba Ɔjusiti ka a fɔ ko a la mansaya yɔrɔ bɛɛ mɔɔilu bɛɛ ye wa tɔɔ sɛbɛli diya. Kirinisi le tɛrɛ ye jamanatiiya la Siri waati wo la, wo tɔɔ sɛbɛli fɔlɔ. Ka bɛn tɔɔ sɛbɛ ko ma, mɔɔ bɛɛ wara a fa so kɔndɔ. Wo rɔ, Yusufu bɔra Nasarɛti, mɛn ye Kalile mara rɔ, ka wa Jude mara rɔ. A wara Bɛtilɛhɛmu, Mansa Dawuda la so kɔnin, ka a masɔrɔn ale ye Mansa Dawuda bɔnsɔn de ri. Mariyamu wara a kɔfɛ, mɛn mamirani a bolo la. Ii fila wara ii tɔɔ sɛbɛli diya Bɛtilɛhɛmu. Wo tuma, Mariyamu kɔnɔma le tɛrɛ.
Ka ii to Bɛtilɛhɛmu, Mariyamu moyi lon sera. A moyira a dencɛ fɔlɔ la. A ka faanin miniminin den ɲɛrɛnni ma ka a la kolofen na dɔɔnnin kɛ fen kɔndɔ, baa ii tun ma jiya diya sɔrɔn londan jiya bon na.
Mɛlɛka ka Isa sɔrɔn ko fɔ saagbɛngbɛnna doilu yɛ
Wo tuma, saagbɛngbɛnna doilu tɛrɛ ye Bɛtilɛhɛmu so da la. Ii tɛrɛ ye sila ii ɲana waa rɔ ye, ka ii janto ii la saa kuruilu rɔ. Su wo rɔ, Maari Alla la mɛlɛka do ka a jɛrɛ yiraka woilu la. Maari Alla nɔɔrɔ mɛlɛnda ka ii laminin, ka ii masilan kojuuya. 10 Kɔni mɛlɛka ka a fɔ ii yɛ ko: «Ai kana silan, baa n nani kibaro ɲuma fɔla ai yɛ, mɛn di ai la jamana mɔɔilu bɛɛ lasɛwa kosɛbɛ. 11 Kisiba ra sɔrɔn ai yɛ bi, Mansa Dawuda la so kɔndɔ. Ale le Maari ri, Ɲenematɔmɔnin kɔnin. 12 N ye tɔɔmasere mɛn yirakala ai la: Ai ye wa den ɲɛrɛnni sɔrɔn, a mamini faanin dɔ, a lani soboilu la dɔɔnnin kɛ fen kɔndɔ.» 13 I kɔrɔkɔrɔ wo rɔ, wo yɔrɔ kelen dɔ, mɛlɛka siyaman ba bɔra ka na la mɛlɛka fɔlɔman wo kan. Ii bɛɛ ladɛnnin ka Alla tando ko: 14 «Gbiliya ye kɛ Alla yɛ mɛn ye sankolo rɔ. Jususuma ye kɛ mɔɔilu yɛ duukolo kan, mɔɔ mɛnilu duman a yɛ kɔnin.»
Saagbɛngbɛnnailu wara den ɲɛrɛnni mafɛnɛ diya
15 Mɛlɛkailu kosɛ mɛn kɛni sankolo rɔ, saagbɛngbɛnnailu ka a fɔ i ɲɔɔn yɛ ko: «An ye wa Bɛtilɛhɛmu. Alla ra ko mɛn lase an ma, an ye wa wo lakɔrɔsi.» 16 Ii ka ikaliya ka wa Mariyamu ni Yusufu tɛrɛn. Ii ka den ɲɛrɛnni lani tɛrɛn kolofenilu la dɔɔnnin kɛ fen kɔndɔ. 17 Ii ka den wo yen ɲa mɛn ma, ii ka wo bɛɛ dantɛɛli kɛ mɔɔilu yɛ. 18 Mɛnilu ka ii la dantɛɛli kan namɛn, woilu bɛɛ kabannakoyara. 19 Kɔni Mariyamu ka wo bɛɛ to a jusu rɔ ka imiri wo ma kosɛbɛ. 20 Saagbɛngbɛnnailu wo ka ii kɔsɛ waati mɛn na, ii bɛɛ ka Alla gbiliya ka a tando, ii ka mɛn bɛɛ lamɛn a ni ii ka mɛn bɛɛ yen, a bɛɛ kɛra ikɔ mɛlɛka ka a fɔ ii yɛ ɲa mɛn ma.
Den sɔrɔnbailu wara a ri Allabatobonba kɔndɔ
21 Den sɔrɔn ka tele seyin bɔ tuma mɛn, ii ka a la kojii kɛ. A tɔɔ lara ko Isa, mɛlɛka ka tɔɔ mɛn fɔ Mariyamu yɛ, ka a tɛrɛn a tun ma kɔnɔ ta buru. 22 Ii sɛninya waati dafara tuma mɛn, sɛninya waati mɛn sɛbɛni Nabi Musa la sariya rɔ kɔnin, Yusufu ni Mariyamu wara den di Jerusalɛmu. Ii wara a yiraka kanma Maari Alla la, 23 baa a sɛbɛni Maari Alla la sariya rɔ ko: «Ni i den fɔlɔ kɛra cɛman di, den wo ye a bila a dan na Maari Alla yɛ.» 24 Maari Alla la sariya ka saraka mɛn fɔ, ko kanba fila wala kanba wulenni fila, Yusufu ni Mariyamu ka wo bɔ.
Simeyɔn ni Ana ka den ɲɛrɛnni yen
25 Wo tuma, cɛɛ do tɛrɛ ye Jerusalɛmu ye, mɛn tɔɔ ko Simeyɔn. Mɔɔ ɲuma le tɛrɛ; a silanni Alla yɛ a ɲa jɛrɛ jɛrɛ ma. Alla tun ka kisiba lahidi mɛn ta Isirayɛlikailu yɛ, Simeyɔn tɛrɛ ye wo dafa makɔnɔla. Alla la Nii Sɛniman tɛrɛ ye Simeyɔn kan. 26 Alla la Nii Sɛniman tun da a yiraka a la ko a tɛ sa fewu fɔɔ a ɲa wa ban lala Maari la Ɲenematɔmɔnin kan.
27 Nba, Alla la Nii Sɛniman ka Simeyɔn nana Allabatobonba jin kɔndɔ. Wo waati kelen, Yusufu ni Mariyamu nara den di ye ka sariya ko ɲanabɔ. Ii don mɛn kɛni Allabatobonba jin kɔndɔ, ii bɛnda Simeyɔn na. 28 Simeyɔn ka den ɲɛrɛnni ta ka Alla tando. A ka a fɔ ko:
29 «Sisen, n Maari Alla,
i ri i la jɔn boloka ka wa jususuma dɔ
ka bɛn i la kumakan ma.
30 N jɛrɛ ɲa ra la i la kisiba kan bi,
31 i ka mɛn dabɛn adamadenilu bɛɛ ɲana.
32 A kɛtɔ kɛnɛbɔlan di,
mɛn di i la sila yiraka siya gbɛrɛilu la.
A ri bonya di i la mɔɔilu Isirayɛli ma.»
33 Mɛn fɔni Isa ma Simeyɔn bolo, wo ka a fa ni a na kabannakoya. 34 Simeyɔn duwara ii yɛ, ka ban ka a fɔ Isa na Mariyamu yɛ ko: «I tolo malɔ! Den ɲin di Isirayɛlikailu siyaman nabe, ka siyaman fanan kɔrɔta. A ri kɛ Alla la tɔɔmasere ri, mɔɔ siyaman di i ban mɛn dɔ kɔnin. 35 Wo rɔ, miriya mɛnilu ye mɔɔ siyaman kɔndɔ, woilu ri bila gbɛ rɔ. Kɔni ile, i ri dunin ba sɔrɔn i jusu rɔ. A ri kɛ ikomin fanmuru wa i sɔɔ.»
36 Wo ka Alla la nabi muso do fanan tɛrɛn Allabatobonba kɔndɔ, mɛn tɔɔ ko Ana. A fa, mɛn bɔni Asɛri bɔnsɔn dɔ, a tɔɔ tɛrɛ ye ko Fanuyɛli. Ana ra kɔrɔya bakɛ. A sunkurunya waati, a furura a cɛɛ bolo ka san wɔrɔnwula kɛ. 37 A furu san wɔrɔnwula, a cɛɛ sara ka a kelen to ye. Sisen, a sɔrɔn tun da san biseyin a ni san naanin bɔ. A ye Allabatobonba kɔndɔ tuma bɛɛ, ka Alla bato su ni tele. A la baara ye sun don di, a ni Alla matara. 38 Ana nara se Yusufu ni Mariyamu kɔfɛ. A ka baraka bila Alla yɛ kosɛbɛ, ka ban ka wo den na ko fɔ mɔɔilu yɛ, mɛnilu jii lani Alla ka a fɔ ko a ri Jerusalɛmukailu hɔrɔya ka bɔ ii la tɔrɔya rɔ.
Yusufu ni Mariyamu wara Isa ri Nasarɛti so kɔndɔ
39 Fen fen fɔni Alla la sariya rɔ, Yusufu ni Mariyamu ka wo bɛɛ kɛ, ka ban ka i kɔsɛ Kalile mara rɔ. Ii wara i sii ii jɛrɛ la so la, Nasarɛti kɔnin. 40 Denni kunbayara, ka fanka sɔrɔn a fari rɔ. A walijiyara. Alla la ɲumaya ye a kan.
Isa wara Taminkunna Sali rɔ
41 San san Isa sɔrɔnbailu tun di wa Taminkunna Sali kɛ Jerusalɛmu. 42 Ka bɛn Isirayɛli mɔɔilu la namun ma, Isa ka san tan ni fila sɔrɔn san mɛn na, a fanan wara sali rɔ a sɔrɔnbailu kɔfɛ. 43 Sali ban mɛn kɛni, Isa sɔrɔnbailu ka sila ta ka wa so. Jaa, Isa ra to ii kɔma Jerusalɛmu ye, kɔni ii ma wo lɔn. 44 Iko ii mɔɔ siyaman ba tɛrɛ ye sila kan ka wa so, ii lara a la ko Isa ye ii taama ɲɔɔn do bolo jama tɛma ye. Wo bolo ma, ii ka tele wo muumɛ kɛ taamala. Kɔni fitiri waati seni, ii ma Isa yen fewu! Ii ka a ɲinin ii wara mɔɔilu tɛma, a ni ii taama ɲɔɔnilu. 45 Ii ma a yen. Wo rɔ, ii ka i kɔsɛ ka wa a ɲinin Jerusalɛmu. 46 A tele sawanan lon, ii donda Allabatobonba jin kɔndɔ ka Isa siini tɛrɛn dina karanmɔɔilu tɛma. A tɛrɛ ye a tolo malɔla ii la ka ɲininkali kɛ ii kun ma. 47 A la hankilimaya ni a la jabili ka woilu bɛɛ kabannakoya. 48 A sɔrɔnbailu ka a yen tuma mɛn, ii fanan kabannakoyara. A na ka a maɲininka ko: «N dencɛ, nfenna i ra ko su ɲin kɛ an na? An haminni tɛrɛ kojuuya. An tun da i ɲinin fan bɛɛ ka kaɲa.» 49 Isa ka a jabi: «Nfenna ai tɛrɛ ye n ɲininna ten? Ai ma a lɔn ko n ye n fa la bon na wa?» 50 Kɔni a sɔrɔnbailu ma wo kɔrɔ lɔn.
51 Isa wara ii kɔfɛ Nasarɛti, ka to ii bolo ye. A tɛrɛ ye ii kan mirala tuma bɛɛ ka bonya di ii ma. Ko mɛnilu bɛɛ taminni, a na kɔnin ka woilu bɛɛ to a jusu rɔ. 52 Isa tora kunbayala a fari rɔ. A walijiyara. A diyara Alla yɛ, a ni mɔɔilu fanan yɛ.