10
Isa ka mɔɔ tan ni fila suwandi
1 Wo kɔ rɔ, Isa ka a la karanden tan ni fila kili, ka sebaya di ii ma sa ii ri se jina juuilu gbɛnna, a ni ka jankarɔ juuilu su bɛɛ lakɛndɛya a ni ka fɛɛmailu bɛɛ lakɛndɛya ii la fɛɛmayailu bɛɛ ma.
2 Talibidenba tan ni fila woilu tɔɔ le ɲin: fɔlɔman Simɔn, mɔɔilu ye a fɔla mɛn ma ko Piyɛri, a ni a dɔɔcɛ Andere, a ni Sebede dencɛ Yakuba ni a dɔɔcɛ Yuhana,
3 a ni Filipe ni Baritɔlɔmi, a ni Tomasi ni Matiyu mɛn ye niisankɔmirala ri, a ni Alife dencɛ Yakuba ni Tade,
4 a ni Simɔn, faso lahɔrɔya lɔɔ ye mɛn na, a ni Judasi Sikariyɔti, mɛn natɔ Isa donna mɔɔilu bolo.
Isa ka keladenilu kelaya
5 Isa ka mɔɔ tan ni fila woilu kelaya. A ka a fɔ ko: «Ai kana wa siya gbɛrɛilu fɛ, ai kana don Samarikailu la so si kɔndɔ.
6 Kɔni ai ye wa Isirayɛlikailu fɛ, wo mɛnilu tununni ikomin saailu.
7 Ai wa tamin fan fan na, ai ye mɔɔilu kawandi ko Harijeene Mansaya waati ra se.
8 Ai ye jankarɔtoilu lakɛndɛya, ka suilu lawuli, ka kunatɔilu lakɛndɛya, ka jinailu gbɛn ka ii bɔ mɔɔilu fɛ. Ai ka a sɔrɔn gbansan, ai fanan ye a di gbansan.
9 Ai kana sanin, wala wodigbɛ, wala wodi si bila ai la tɛmasidi rɔ.
10 Ai kana bɔrɔ ta, ai kana duruki kɔrɔbila fila ta. Ai kana sanbara fila ta, wala gbeleke fila, baa baaraden ni dɔɔnnin de ka kan.
11 «Ni ai donda so ba do kɔndɔ, wala so mɛsɛn, ai ye mɔɔ bɛrɛ do ɲinin, a bɛnnin mɛn ma ka ai jiya. Ai ye to wo bolo fɔɔ ai bɔ waati wa se so wo kɔndɔ.
12 Ai wa don wo tii la bon na, ai ye ye mɔɔilu tuwa.
13 Ni a bɛnnin ii ma ka ai ramira koɲuma, ai la duwawu ri mira ii ma. Ni a bɛnnin tɛ ii ma ka ai ramira koɲuma, ai la duwawu ri a kɔsɛ ai ma.
14 Ni mɔɔilu ma sɔn ka ai jiya, ni wo tɛ, ni ii ma sɔn ai la kuma ma, ai bɔtɔla lu ma, wala so kɔndɔ, ai ye ye gbangban bɔ ai sen ma.
15 N di tuɲa fɔ ai yɛ: Alla wa mɔɔilu kiti lon mɛn, mɔɔ woilu la kiti ri gbɛlɛya ka tamin hali Sɔdɔmu ni Kɔmɔri ta kan.
Isa ka a la karandenilu lasobi ii la tɔrɔyailu la
16 «Ai tolo malɔ! N ye ai lawala kela diya ikomin saailu, mɛnilu bilani wara juuilu tɛma. Ai ye kɛ hankilimailu ri, ikomin duuma sailu. Ai ye kɛ kojuukɛbali ri ikomin kanbailu.
17 Ai ye ai janto ai jɛrɛ rɔ mɔɔilu kanma. Ii ri ai mira ka wa ai ri kititɛɛ diya. Ii ri ai gbasi gbiɲɛ la ii la salibonilu kɔndɔ.
18 Ii ri ai mira ka wa ai ri faamailu ni mansailu ma, ka a masɔrɔn ai ye n na karandenilu ri. Ai ri kɛ n sere ri wo rɔ, ka n na ko fɔ ii yɛ, ka n na ko fɔ siya gbɛrɛilu fanan yɛ.
19 Ii wa ai mira ka wa ai ri kiti diya, ai ka kan ka kuma mɛnilu fɔ ye, a ni ai ka kan ka woilu fɔ ɲa mɛn ma, ai kana hamin woilu la, baa ai ka kan ka mɛn fɔ, Alla jɛrɛ ri wo don ai da rɔ wo waati kelen na.
20 Baa ai ri kuma mɛn fɔ, woilu tɛna kɛ ai jɛrɛ la kuma ri. Ai Fa Alla Nii de ri kuma don ai da rɔ.
21 «Mɔɔ ri a badenma don mɔɔilu bolo sa ii ri a faa. Fa fanan di wo ɲɔɔn kɛ a den na. Mɔɔilu ri murunti ii sɔrɔnbailu kanma, ka ii don mɔɔilu bolo sa ii ri ii faa.
22 Ai ri gboya mɔɔilu bɛɛ yɛ n tɔɔ kosɔn. Kɔni mɔɔ mɛn wa a muɲun haan a la ban, wo tii ri kisi.
23 Ni ii ka ai tɔrɔ so do la, ai ye ai bori ka wa so gbɛrɛ la. N di tuɲa fɔ ai yɛ: sani ai ye ban Isirayɛlikailu la jamana so bɛɛ taamala, Mɔɔ Dencɛ ri na.
24 «Karanden tɛ bonyala a la karanmɔɔ ri. Jɔn fanan tɛ bonyala a jɔntii ri.
25 Ni karanden kɛra a la karanmɔɔ ɲɔɔn di, a dan de wo ri. Ni jɔn kɛra a jɔntii ɲɔɔn di, a dan de wo ri. A ye di? Ni mɔɔilu ka kuma juu fɔ lutii jɛrɛ ma ko Ibulusa le ye a ri, ii tɛ do fɔ lu kɔndɔ mɔɔilu ma ka tamin wo kan wa?
26 «Wo le kosɔn, ai kana silan mɔɔ woilu yɛ. Fen fen doonni, wo bɛɛ ri bɔ gbɛ rɔ. Gbundu ko tɛ ye, mɛn tɛ lɔn.
27 N wa mɛnilu fɔ ai yɛ dibi rɔ, ai ye wo fɔ tele rɔ. N wa mɛnilu fɔ ai tolo kɔrɔ kan majii rɔ, ai ye ai lɔ bon kun bilinin kan ka wo fɔ.
28 Ai kana silan mɛn di se mɔɔ farikolo halakila kɔni ti se foyi kɛla mɔɔ nii na. Ai ye silan yɛ mɛn di se mɔɔ nii ni a faribanku bɛɛ halakila jahanama kɔndɔ.
29 Ai ye kɔnɔ mɛsɛn fila mayirala wodi gbanan mɛsɛn kelen na, ko di? Kɔni hali kɔnɔ wo kelen tɛ be duu ma ni ai Fa Alla ma sɔn a ma.
30 Ai ta fan fɛ, ai Fa ka hali ai kunsiilu bɛɛ jate lɔn.
31 Wo le rɔ, ai kana silan. Ai ɲatɔnɔma ka tamin kɔnɔ mɛsɛn siyaman nadɛnni kan.
32 «Ni mɔɔ mɔɔ ka a fɔ mɔɔilu ɲana ko a ye n ta ri, n fanan di a fɔ n Fa Alla yɛ, mɛn ye sankolo rɔ, ko wo tii ye n ta ri.
33 Kɔni ni mɔɔ mɛn ka a fɔ mɔɔilu ɲana ko a tɛ n ta ri, n fanan di a fɔ n Fa Alla yɛ, mɛn ye sankolo rɔ, ko wo tii tɛ n ta ri.
34 «Ai kana ai miri ko n da na jususuma di duukolo kan de. N ma na jususuma di de. N nani fanmuru le ri.
35 Baa n nani ka dencɛ ni a fa bila ɲɔɔn na, ka denmuso ni a na bila ɲɔɔn na, ka muso ni a dencɛ muso bila ɲɔɔn na.
36 Mɔɔ juuilu ri kɛ a jɛrɛ la mɔɔilu ri.
37 Kɔni mɔɔ mɛn wa a fa wala a na kanin ka tamin n kan, wo tii ti se kɛla n na karanden di. Mɔɔ mɛn wa a dencɛ wala a denmuso kanin ka tamin n kan, wo tii fanan ti se kɛla n na karanden di.
38 Mɔɔ mɛn ma sɔn ka a jɛrɛ gbɔngbɔn jiri ta ka a bila n kɔ, wo tii ti se kɛla n na karanden di,
39 baa mɔɔ mɛn ye a fɛ ka a nii kisi, wo tii ri bɔnɔ ɲenemaya bɛrɛbɛrɛ la. Kɔni ni mɔɔ mɛn bɔnɔra a faribanku rɔ nde kosɔn, wo tii ri a jɛrɛ kisi.
40 «Ni mɔɔ mɛn ka ai mira koɲuma, wo tii ra n mira koɲuma. Ni mɔɔ mɛn ka n mira koɲuma, wo tii ra n kelayaba mira koɲuma.
41 Ni mɔɔ mɛn ka nabi do ramira koɲuma ka a masɔrɔn nabi le, nabi ye barayi mɛn sɔrɔnna, wo tii fanan di wo ɲɔɔn sɔrɔn. Ni mɔɔ mɛn ka mɔɔ telenni do ramira koɲuma ka a masɔrɔn mɔɔ telenni le, mɔɔ telenni ye barayi mɛn sɔrɔnna, wo tii fanan di wo ɲɔɔn sɔrɔn.
42 N di tuɲa fɔ ai yɛ: ni mɔɔ mɛn ka hali ji suma jilafɛ ɲa kelen di n na mɔɔ dɔɔmani do ma ka a masɔrɔn n na karanden de, wo tii tɛ bɔnɔ barayi wo rɔ. Sika tɛ wo rɔ.»