2
Jama sɛniman
1 Wo rɔ, ai fara kojuu su bɛɛ la a ni janfateya ni filanfilanteya ni minlɛ ni kuma juu bɛɛ.
2 Nii balo bɛrɛ lɔɔ ye ai mira ikomin sin lɔɔ ye den ɲɛrɛn mirala ɲa mɛn ma, kosa ai fanan ye sabati ai kisi ko rɔ a fɛ,
3 baa ai ra a ragbɛ, ka a lɔn ko Maari ka ɲi.
4 Ai ye ai madon a la, mɛn kɛni siimaya kabakurun di, adamadenilu ka ii ban mɛn dɔ, kɔni Alla ka mɛn suwandi, mɛn dagbɛlɛyani a bolo fanan.
5 Aile fanan da kɛ Alla la bon lɔ fenilu ri ikomin siimaya kabakurunilu, ka kɛ sarakalasela jama sɛniman di, ka siimaya sarakailu bɔ Alla sɔnni mɛnilu rɔ ka fara Isa Ɲenematɔmɔnin na.
6 Ka a masɔrɔn Kitabu ka ɲin de fɔ ko,
«A ragbɛ! N da kaba do sii Siyon so kɔndɔ
ikomin bon tonkon kaba ɲuma kenɲi.
Mɛn wa lemɛniya a ma,
maloya ti se wo tii ma.»
7 Kaba ɲin dagbɛlɛyani aile lemɛniya mɔɔilu le yɛ, kɔni Kitabu yɔrɔ ɲin de bɛnni lemɛniyabaliilu ma ko,
«Bon lɔlailu ka ii ban kabakurun mɛn dɔ,
wo ra kɛ bon jusii kabakurun di.»
8 A sɛbɛni Kitabu kɔndɔ fanan ko,
«Jama ye ii sennatula kaba mɛn na,
ka kɛ ii labe kaba ri.»
Ii ri ii sennatu a la ka a masɔrɔn ii ma sɔn kuma mirala, baa wo le tɛrɛ natɛɛni ii ma.
9 Kɔni aile ra kɛ siya suwandini ri. Mansailu la sarakalaselailu le aile ri, siya sɛniman, Alla ta ye jama mɛn di, kosa ai ye a la baara ɲuma bailu la ko lase, ale mɛn ka ai kili, ka ai bɔ dibi rɔ, ka wa a la kabannako kɛnɛya rɔ.
10 Fɔlɔman, Alla la jama tɛrɛ tɛ ai ri kɔni sisen, ai ra kɛ a la jama ri. Aile mɛn tɛrɛ ma Alla la kininkinin sɔrɔn, kɔni sisen, ai ra a la kininkinin sɔrɔn.
Lemɛniya mɔɔilu ye kolo
11 Nba, n kanintenilu, ai le mɛnilu kɛni ikomin londanilu ni taamalailu dunuɲa rɔ, n ye ai madiyala, ai ye ai jɛrɛ mira faribanku kunfan koilu ma mɛnilu ye ai nii kɛlɛla.
12 Ai kɛwaliilu ye ɲumaya lemɛniyabaliilu tɛma, kosa, ii wa ai makuma kojuu kɛla, ii ye ai kɛwali ɲumailu yen, ka Alla gbiliya a na lon.
13 Ai ye kolo adamadenya mansayailu bɛɛ kɔrɔ Maari la ko kosɔn, a wa kɛ mansa ba ri
14 wala jamanatiilu, a ka mɛnilu lawa baara koronilu sara diya kojuu kɛlailu la, ka koɲuma kɛlailu tando ii la baara ɲumailu la.
15 Ka a masɔrɔn Alla sawo le wo ri, ko ai la koɲuma kɛ ye hankilidɔɔilu da mira ii la hankilidɔɔya rɔ.
16 Ai ye kɛ mɔɔ hɔrɔniilu ri, kɔni ai kana ai la hɔrɔya kɛ kojuu dokon fen di, ai ye kɛ Alla la jɔn ɲumailu ri.
17 Ai ye mɔɔ bɛɛ gbiliya, ka ai lemɛniyamɔɔ ɲɔɔilu kanin, ka silan Alla ɲɛrɔ, ka mansacɛ gbiliya.
Isa la tɔrɔyailu misali
18 Jɔnilu, ai ye kolo ai la tiilu ma gbiliya ko bɛɛ rɔ, ka tii juuilu kolo ikomin tii ɲuma ni sabariniilu.
19 Ka a masɔrɔn, wo kɛni koɲuma le ri, ni mɔɔ lemɛniya ra ɲakankatan kɔrɔ Alla lɔn na ko rɔ, ka a sɔrɔn wo ɲakankatan bɛnni tɛ a kɛwaliilu ma.
20 Kɔni wo ri kɛ gbiliya ri ai yɛ di, ni ai ɲakankatanra ai la hakɛ na ko rɔ, ka tunadiya? Adon, ni ai tɔrɔra ai kɛwali ɲumailu la ko rɔ, ka lemɛniya, koɲuma le wo ri Alla ɲakɔrɔ.
21 Alla ka ai kili wo le ma, baa Ɲenematɔmɔnin jɛrɛ tɔrɔra le ai yɛ, ka misali to ai bolo kosa ai ye bila a kɔfɛ.
22 «A ma julumun si kɛ, a ma janfa kuma si fɔ fanan.»
23 Ii ka a nani waati mɛn na, ale ma nanili kɛ. A tɔrɔra waati mɛn na, a ma yaman ii ma kɔni ka a jɛrɛ to kitilala telenni Alla le bolo.
24 Isa jɛrɛ ra an julumunilu donin ta a faribanku rɔ, a gbɔngbɔnni jiri kan, kosa an ye kɛ ikomin mɔɔ mɛn farani julumun dɔ, ka to an nii la telen dɔ. Ai ka kɛndɛya sɔrɔn a la madiminniilu le fɛ.
25 Ai tɛrɛ kɛni le ikomin saa mɛnilu tununni, kɔni sisen ai ra kɔsɛ fanan kolofen gbɛngbɛnna a ni nii kandanna tɔrɔfɛ.