19
Esekiel azirakar ighiam bange
Ikiavɨra Itir God Israelian atrivir pumuning bagha azirakar ighiar kam bangasa na mɨkeme:
 
Nɨn amebam bar laionɨn amebar aghuim.
A laionɨn apurir ekiabar tongɨn ikia uan nguzibar akuaghapi.
A uan nguzibar gara dagh eghuvima, da aghuava ekefe.
A uan nguzir mam deragha a geghuva an garima,
an aghuigha bar dera.
An asɨziba burir arazimɨn an akakasi,
ezɨ gɨn a gumazamizibav sogha me api.
Kantrin Igharazibar Gumazamiziba, bar laionɨn kamɨn eghaghanim baregha,
a bagha azuazimɨn mɨn mozim gɨkuizɨ
laion iza mozir kam giraghu.
Ezɨ me akezim an koviamɨn guragha anemɨkɨrɨgha
Isipɨn kantrin ghu.
Amebam a bagha dughiar ruarimɨn a mɨzua itima,
a izezir puvatɨ.
Ezɨ a tagha ua nguzir igharazir mam inizɨ an an danganim ini,
ezɨ an an gara a geghuvima,
a bar mɨkarzim saram aghungigha, laionɨn igiar aghuimɨn oto.
A bar ekevegha gɨvagha laionɨn igharaziba koma arui.
A uaghan asɨziba buri dav sogh, egh dar amamin arazimɨn fofoziba ini.
Egha uaghan gumazamizibav sogha me api.
A men dɨpenir gavgaviba akaragharigha,
men nguibar ekiabagh asɨghasɨsi.
A tiarim akara dazerima,
nguazir kamɨn gumazamiziba bar puvɨrama atiati.
Kantriba ko provinsɨn an boroghɨn itiba bar dar gumaziba,
a mɨsoghasa tintinibar uan nguibabar iza uari akufa.
Egha me mozimɨn aven laionbar suizir iveba onegha an suira.
Me akezimɨn an guragha a inigha boksiar mam garugha
a inigha Babilonɨn atrivim bagha ghu.
Egha a isa kalabus gatɨ.
A uam arɨ mangɨ Israelɨn mɨghsɨabar mangan kogham.
Eghtɨ gumazamiziba uam an dazezerir tiarim baraghan kogham.
 
10 Nɨn amebam mati wainɨn ikarɨzir me dɨpar mɨriamɨn dɨkarazim.
Egha a dɨpar avɨriba iti,
kamaghɨn amizɨ, an agharir avɨriba ikia puvɨra be.*
11 Wainɨn ikarɨzir kamɨn aghariba bar gavgafi,
ezɨ me da isa dar atrivibar asadivibar ingari.
Wainɨn ikarazir kam aghua agharir avɨriba ko dafarir bar avɨriba ikia,
bar ruaragha overiamɨn suighasava ami.
Ezɨ gumazamiziba bar saghon mar ikia an gari,
a bar ruaragha aghariba ko dafarir avɨriba iti.
12 Ezɨ gumazir an anɨngagheziba biba saram
anesigha a isa nguazim mɨkɨni.
Ezɨ amɨnir bar puvɨra ivaim aruem anadi naghɨn ikegha iza an ovɨzibagh ivarazi,
da kuaraghɨregha mɨsɨngi.
Ezɨ an agharir gavgavim mɨsɨngizɨ, me a gaborozɨ a isi.
13 Me datɨrɨghɨn a inigha dɨpaba puvatɨzir danganimɨn ghua,
nguazir dakɨghtɨzimɨn anekara.
14 Ezɨ avim ikarɨzir kamɨn agharir gavgavimɨn otogha
vaghvagha an aghariba ko ovɨzibar isizɨ,
a ua agharir gavgaviba puvatɨ.
Egh da ua atrivimɨn asadivimɨn mɨn otoghan kogham.
Kar azirakar ighiar dughiar avɨribar ongezim.
* 19:10 Hibrun akam deragha mɨgɨrɨgɨar kamɨn mɨngarim abɨghizir puvatɨ.