26
God ghaze, Tair ikuvigham
1 E kalabusɨn itima, namba 11ɨn azenim, an iakɨnir mamɨn aruer faragha zuim otozɨ, Ikiavɨra Itir God kamaghɨn na mɨgei,
2 “O nguazir kamɨn gumazim, Tairɨn nguibar ekiamɨn gumazamiziba bar akuegha tiariba akara kamaghɨn mɨgei:
“Bar dera, Jerusalemɨn nguibar ekiam, a ikuvigha gɨfa,
ezɨ Kantrin Igharazibar Gumazamiziba ua an mangɨ
dagɨar ingangaribar amuan kogham.
Me datɨrɨghɨn e baghvɨra izɨ dagɨar ingangarim damutɨ
e bizir bar avɨriba ikiam.
3 “Kamaghɨn amizɨ, datɨrɨghɨn, kɨ Ikiavɨra Itir Godɨn Ekiam ghaze:
“O Tairia, ia oragh, kɨ ian apanim.
Kɨ kantrin avɨribar gumazibar aku ia mɨsoghsɨ izam,
eghtɨ me ongarim dɨkava izi moghɨn izam.
4 Me ian nguibar ekiam avɨnizir dɨvaziba akararigham.
Eghtɨ kɨ bar dar tauaba avigh da makunigham.
Egh kɨ nguibar kamɨn nguaziba bar dar anɨng da adeghtɨ,
dagɨar kɨnimra ikɨvɨra ikiam.
5 Egh dagɨar kam ongarimɨn tongɨn ikɨtɨ,
osiriba isir gumaziba, uan iveba a gisɨn da onegh aruemɨn dar arɨgham.
Kɨ Ikiavɨra Itir Godɨn Ekiam, kɨ kamaghɨn mɨkeme,
Kantrin Igharazibar Gumazamiziba izɨ
ia inigh pazavɨra ia damuam.
6 Me uan mɨdorozir sababar ian kantrin aven itir nguibar dozibar gumazamizibav soghɨrarɨgham.
Eghtɨ Tairia kamaghɨn fogh suam,
kɨ Ikiavɨra Itir God.
7 “Kɨ Ikiavɨra Itir Godɨn Ekiam kɨ kamaghɨn mɨgei: Babilonɨn kantri gativir atrivir bar gavgavim Nebukatnesar, kɨ an aku izɨtɨ, a Tairia ia ko mɨsogham. A notɨn amadaghan ikegh izɨ, uan hoziaba ko, karisba ko, hoziabagh isɨn dapiamin gumaziba ko, mɨdorozir gumazir bar avɨrim sara izam.
8 “A izɨ, nɨn kantrin aven itir nguibar dozibar gumazamiziba,
mɨdorozimɨn aven me mɨsoghtɨ me arɨghiregham.
Apaniba izɨ nguibar ekiam ekɨarugh
nguazim gɨku dɨvazim boroghɨn da pozibav kɨnigham.
Egh me nguazir pozir kabagh isɨn tuivigh ikɨ mɨdorozim damuam,
egh uari mongsɨ bɨrir gavgavibar amuam.
9 Egh me temer bar ekiaba inigh mangɨ
nguibar ekiamɨn dɨvaziba akararɨgh,
egh uan sobiar bar gavgavibar dɨvazimɨn tauaba akurarɨgham.
10 An hoziaba bar avɨrasemegh ivemar izɨ nguazim dɨkɨtɨ,
nguazir mɨneziba dɨkav bar ia avaragham.
Eghtɨ men mɨdorozir gumazir hoziabagh apiaziba ko, dar wilba, ko dar karisba, pamtem ivemar izɨ,
nguibar ekiamɨn tiar akabar mangɨgh zegh damuam.
Eghtɨ hoziar kaba nɨgɨnir bar ekiam damutɨ ian dɨvaziba vazvagham.
11 Men mɨdorozir gumazibar hoziaba, ian tuavir dozibar akɨzɨrɨgh izɨ ia dɨkabɨragham.
Eghtɨ apaniba mɨdorozir sababar ian gumazamizibav soghɨrarɨgham.
Eghtɨ ian dagɨar dɨpenir akɨnir gavgavir ekiaba magɨrɨ nguazim giregham.
12 Ian apaniba ian dagɨaba okɨmɨva,
ia dagɨaba bagha amadir biziba tintinimɨn da iniam.
Me ian dɨvaziba akurarightɨ da irɨtɨ,
me ian dɨpenir bar aghuiba akararigh bar adagh asɨghasigham.
Egh me ian dagɨaba ko temeba ko nguaziba isɨ
ongarimɨn da makunigham.
13 Eghtɨ kɨ ian onger akaba ko,
gitabav sozir arazim bar ada agɨvagham.
14 Kɨ ian nguibam damightɨ, dagɨar kɨnimra an ikɨvɨra ikiam.
Eghtɨ dagɨar kamɨn, osiriba isir gumaziba,
uan iveba a gisɨn da onegh da aruem darɨgham.
Kɨ Ikiavɨra Itir Godɨn Ekiam, kɨ kamaghɨn mɨkeme,
gumazitam ua ian nguibar ekiamɨn ingarighan kogham.
15 “Kɨ Ikiavɨra Itir Godɨn Ekiam, kɨ Tairɨn nguibar ekiamɨn gumazamiziba kamaghɨn me mɨgei: Ian nguibar ekiam akarɨghiregh irɨghtɨ, gumazamizir ongarir mɨriamɨn itiba, me nguibam akaraghirezir nɨgɨnim baragh, egh gumazamiziba mɨzazir ekiam isir nɨgɨnim baragh, uarir tongɨn gumazamizibav sozi me ariaghirir nɨgɨnim baragh, dɨgavir kuram damigh akongam.
16 Kantrin ongarir mɨriamɨn itibar atriviba, uan atrivir dabirabiba ategh, uan atrivir korotiaba ko tretɨn diribar isamizir korotiar azenan azuiba suegh, pura nguazim dapiagh atiatingɨva inɨghɨva akong mamaghɨra ikiam, eghtɨ men nɨrɨzir agorogem gɨvaghan koghan.
17 Me nɨ bagh azirakar ighiar kam damuam:
“Ziar ekiam itir nguibar ekiam, nɨ bar ikufi!
Gumazamizir nguibar ekiar kamɨn itiba, fomɨra ongarimɨn ize,
Egha kurir avɨriba ikia ongarim bar a gativagha,
ongarimɨn ingangarir kaba me faragha dagh ami.
Egha ongarir dadaribar boroghɨn nguibabar itir darazigh amizɨ,
me atiatia okam nɨghnɨgha dɨgavir kuram gami.
Ezɨ datɨrɨghɨn nɨ ua ongarimɨn itir puvatɨ.
Noki!
18 Datɨrɨghɨn dughiar kamra,
nɨ irɨgha gɨfa.
Ezɨ ongarimɨn boroghɨn itir darasi, inighava agoi,
ezɨ arighatɨzibar gumazamiziba atiatia,
pazava otozir arazir kamɨn aguaghfa.
19 “Kɨ Ikiavɨra Itir Godɨn Ekiam, kɨ kamaghɨn mɨgei: O Tair, kɨ nɨ damightɨ nɨ pura ikiam, mati nguibar ekiar akaraghirezimɨn mɨn, nɨn gumazamiziba puvatɨgham. Kɨ ongarir konir gavgavimɨn nɨ avaragham.
20 Kɨ nɨn amadaghtɨ, nɨ Oveaghuezibar Nguibamɨn magɨrɨ gumazamizir bar fomɨra ikeziba ko ikiam. Kɨ nɨ damightɨ, nɨ nguazimɨn apengan magɨrɨ nguibar ekiar kɨ asɨghasɨghiziba ko zurara ikiam. Bizir kam bangɨn, gumazitam ua nɨn danganimɨn ikian kogham. Eghtɨ nɨ ua nguazir kamɨn nguibar aghuitamɨn mɨn otogham kogham.
21 Kɨ nɨ gasɨghasigh nɨ damightɨ, nɨ mati bizir kuramɨn mɨn otogh gumazamizibar amutɨ me atiatingam. Gumazamiziba nɨ buriva, nɨn apighan kogham. Kɨ Ikiavɨra Itir Godɨn Ekiam, kɨ kamaghɨn mɨkemegha gɨfa.”