28
God ghaze, Tairɨn atrivim ikuvigham
1 Ikiavɨra Itir Godɨn Ekiam kamaghɨn na mɨgei,
2 “O nguazir kamɨn gumazim, nɨ Tairɨn atrivim mɨkɨm suam:
“Kɨ Ikiavɨra Itir Godɨn Ekiam kamaghɨn a mɨgei:
Nɨ puvɨra uabɨ fa, uabɨ mɨgɨa ghaze,
nɨ godɨn mam.
Nɨ ghaze, nɨ godɨn mamɨn mɨn atrivir dabirabim gaperaghav iti,
ezɨ ongarim nɨ ekɨaru.
Nɨ ghaze, nɨn nɨghnɨzim godɨn mamɨn nɨghnɨzim ko magh ghu.
Ezɨ puvatɨ! Nɨ pura nguazir kamɨn gumazir kɨnim!
Nɨ god puvatɨ.
3 Nɨ ghaze, nɨn fofozim bar ekevegha, Danielɨn fofozim gafira,
eghtɨ bizitam nɨn modoghan kogham.
4 Nɨn fofozim ko ingangaribar amuamin fofozim nɨ gamima,
nɨn gol ko silva bar avɨraseme.
5 Nɨ fofozir bar aghuir dagɨar ingangaribagh amiba ikia,
egha dagɨar avɨriba uam ada isi.
Egha uan dagɨar avɨrir kaba bagha uabɨ fa,
uan navir averiamɨn aven puvɨra ifaghati.
6 “Ezɨ datɨrɨghɨn, kɨ Ikiavɨra Itir Godɨn Ekiam, kɨ kamaghɨn nɨ mɨgei:
Nɨ ghaze, nɨ godɨn mamɨn mɨn fofozim iti.
7 Kamaghɨn amizɨma, kɨ apanir bar kurabar aku nɨ gasɨghasɨghsɨ izam.
Eghtɨ nɨ fofozir ekiamɨn amodoghɨn amua inizir bizir aghuiba ko ziar ekiam nɨ ganɨdir bizir diriba,
me bar adagh asɨghasigham.
8 Me bar nɨ gasɨghasigh ongarir torimra nɨ mɨsueghtɨ nɨ aremegh,
Gumazamizir Oveaghuezibar Nguibamɨn magɨram.
9 Me izɨ nɨ mɨsoghamin dughiamɨn, nɨ ti kamaghɨn me mɨkɨm suam, kɨ godɨn mam.
Nɨ mɨsoghamin adarazi izɨtɨ, nɨ men guamɨn gumazir kɨnimɨn otogh aremegh uam angamɨra ikian kogham.
Dughiar kamɨn nɨ fogh suam, nɨ pura nguazir kamɨn gumazir kɨnim! Nɨ god puvatɨ.
10 Apanir azenan izezir kaba nɨ mɨsueghtɨ, nɨn ovevem bar ikuvigh,
egh mati gumazir mɨzɨrɨzir kɨnimɨn mɨn otogham.
Kɨ Ikiavɨra Itir Godɨn Ekiam, Akar Gavgavir kam anigha gɨfa.”
11 Ikiavɨra Itir God ua kamaghɨn na mɨgei:
12 “O nguazir kamɨn gumazim, nɨ mangɨ Tairɨn atrivim bagh azirakam damu, a mɨkɨm suam:
“Kɨ Ikiavɨra Itir Godɨn Ekiam kamaghɨn nɨ mɨgei:
Nɨ faragha gumazamiziba bar me gafiragha gumazir aghuimɨn oto.
Ezɨ nɨn fofozim bar ekevegha nɨ gamizɨ nɨn ganganiba bar dera.
13 Nɨ mati Idenɨn azenimɨn iti, kar Godɨn azenir aghuim.
Egha nɨ dagɨar guar avɨrir igharagha garir bar pɨn koziba uabɨn kurti.
Me golɨn diriba inigha dagɨabar suizir golɨn kurkazibar ingari.
Dagɨar kabar kara, rubi, topas, daimon, beril, kanilian, jaspa, sapaia, emeral koma ganet.
Nɨ nguazimɨn otozir dughiamɨn, kɨ nɨ bagha dagɨar kaba bar dar ingari.
14 Kɨ kagh enselɨn bar gavgavim, isa nɨ geghuvasav anetɨ.
Nɨ nan mɨghsɨamɨn ikia dagɨar aghuir taghtazir kabagh isɨn arui.
15 Kɨ nɨn ingarizɨ, nɨ otozir dughiamɨn, nɨn araziba bar dera.
Egha iza datɨrɨkɨn, nɨ arazir kurabagh amua nan damazimɨn osɨmtɨzim iti.
16 Nɨ zurara bizibagh iveza da amadi.
Ezɨ bizir kam nɨ gamima, nɨ akamadariba ko arazir kurabagh ami.
Ezɨ kɨ uan Mɨghsɨamɨn, bizir mɨzɨrɨzir kɨnimɨn mɨn nɨ batosi.
Ezɨ enselɨn bar gavgavir kɨ nɨ geghuvasava atɨzim dɨkavigha,
dagɨar aghuir taghtazir kabar tongɨn nɨ inigha da ategha mar ghu.
17 Nɨ ganganir bar aghuim gamua, uabɨ uabɨ fe.
Egha fofozir aghuim ikia ghaze,
fofozir kam ziar ekiam ko gavgavim nɨ danɨngam.
Kamaghɨn amizɨ, kɨ nɨ kavkɨnizɨ nɨ nguazim girɨ.
Kɨ nɨ isɨ azenara atrivir igharazibar damazim datɨghtɨ, me nɨn irɨrim deragh an ganam.
18 “Nɨ bizibagh iveza da amaga, arazir kurar avɨribagh amua,
nan ziam fer danganibagh amizɨ, da bar mɨze.
Kamaghɨn amizɨ, kɨ nɨn nguibar ekiam avim a gatɨzɨ,
a isia ghua nguazir kɨnim oto.
Ezɨ gumazamizir nɨn gariba, nɨ men damazimɨn averenimɨn oto.
19 Ezɨ nɨ bar ikuvigha gɨfa.
Egh ua nguazir kamɨn ikian kogham.
Gumazamiziba bar moghɨra, nɨ batozir arazir kamɨn biarim baregha,
puvɨra aguava atiatia dɨgavir kuram gami.”
God ghaze, Saidonɨn
nguibar ekiam ikuvigham
20 Ikiavɨra Itir God kamaghɨn na mɨgei:
21 “O nguazir kamɨn gumazim, nɨ Saidonɨn nguibar ekiamɨn ganɨva, a ikuvighsɨ a mɨkɨm:
22 “Kɨ Ikiavɨra Itir Godɨn Ekiam, kɨ kamaghɨn ia mɨgei.
O Saidonia, kɨ ian apanim gami.
Kɨ ian tongɨn uan gavgavim ian akagham,
eghtɨ gumazamiziba nan ziar ekiam fam.
Kɨ ian arazir kuraba tuisɨgh ivezir kuram ia danɨngam.
Egh uan ziar bar zuezim ian akagham.
Eghtɨ ia kamaghɨn fogh suam, kɨ Ikiavɨra Itir God.
23 Kɨ arɨmariar kuraba ia bagh da amangam.
Egh apanibar amangightɨ me bar tintinimɨn izɨ ia ekɨarugh,
egh ian gumazamizibav soghɨrarɨgham.
Egh ghuzim damightɨ, a ian tuavibar emɨram.
Eghtɨ ia kamaghɨn fogh suam,
kɨ Ikiavɨra Itir God.”
God deraghvɨra Israelia damuam
24 “Kɨ Ikiavɨra Itir God, kɨ kamaghɨn mɨgei: Israelɨn ikɨzimɨn boroghɨn itir kantrin igharaziba, men apanim gamua dɨbovir akar kurabar me mɨgei, mati benir atariba ko dɨkoniba gumazimɨn mɨkarzim mɨtifi. Egh me gɨn uam arazir kam damuan kogham. Eghtɨ dughiar kamɨn, Israelia deragh na gɨfogh suam, kɨ Ikiavɨra Itir Godɨn Ekiam.
25 “Kɨ Ikiavɨra Itir Godɨn Ekiam, kɨ kamaghɨn mɨgei, kɨ Israelɨn ikɨzir kɨ aghamsɨgha tintinibar kantrin igharazibar amangizibar tongɨn ua me inigh, me akuvagh me inigh izam. Eghtɨ kantriba bar Israelian gantɨ, kɨ uan zuezir arazim isɨ men akagham. Eghtɨ Israelɨn gumazamiziba ua uan nguazimra ikiam. Kar nguazir kɨ uan ingangarir gumazim Jekop ganɨngizim.
26 Me nguazir kamɨn deravɨra ikɨ, egh dɨpenibar ingarɨva wainɨn azeniba oparam. Men boroghɨn itir gumazamizir men apanim gamua dɨbovir akar kurabar me mɨgeiba, kɨ ivezir kuram me danɨngam. Eghtɨ Israelia, deravɨra ikiam. Eghtɨ me kamaghɨn fogh suam, kɨ Ikiavɨra Itir God, men God.”