7
God Israelia agɨvam
1 Ikiavɨra Itir God kamagh na mɨgei:
2 O nguazir kamɨn gumazim, kɨ Ikiavɨra Itir Godɨn Ekiam, kɨ kamaghɨn Israelɨn nguazibar itir gumazamizibav gɨa ghaze:
Kar dughiar abuananam!
Dughiar abuananam a nguazir oteviba bar dar otivasava ami.
3 Ia Israelia, ian dughiar abuananam otogha gɨfa.
Eghtɨ kɨ datɨrɨghɨn uan anɨngagharim ia bagh anemadagh,
ia amizir araziba tuisɨgham.
Egh arazir kurar kɨ ifongezir puvatɨzir avɨriba ikarvagh
ivezir kuram ia danɨngam.
4 Kɨ ian gan egh ian kuarkuvighan kogham.
Ia arazir kurar kɨ ifongezir puvatɨzir avɨribagh ami.
Arazir kaba bangɨn, kɨ ivezir kuram isɨ ia danɨngam.
Eghtɨ ia bizir kamɨn ganigh fogh suam,
kɨ Ikiavɨra Itir God.
5 Ikiavɨra Itir Godɨn Ekiam kamaghɨn mɨgɨa ghaze:
Ia gan! Bizir kurar ia gasɨghasɨghamin kaba,
uari tɨvaghtɨvagh izɨvɨra ikɨ bar moghɨra ia agɨvagham.
6 Ia gan! Ian dughiar abuananam datɨrɨghɨn roghɨra izegha gɨfa,
egha ia agɨvasava ami.
7 O Israelɨn nguazimɨn itir gumazamiziba, ia bar moghɨra,
ian dughiam roghɨra izegha gɨfa.
Eghtɨ ia ua mɨghsɨabar uari akuv bar akueghan kogham.
Ia datɨrɨghɨn atiatim sara uari akuv akong ikiam.
8 Kɨ ian arazir kurar ia amizir kaba bagh ia tuisɨgh,
zuamɨra ian arazir kurar avɨrir kɨ ifongezir puvatɨzir kaba ikarvagh
ivezir kuram ia danɨng,
egh uan anɨngagharim ia gingeghtɨ,
ia osɨmtɨzir ekiaba iniam.
9 Kɨ ian gan egh ian kuarkuvighan kogham.
Ia arazir kurar kɨ ifongezir puvatɨzir avɨribagh ami.
Arazir kaba bangɨn, kɨ ivezir kuram isɨ ia danɨngam.
Eghtɨ ia bizir kamɨn ganigh, fogh suam,
kɨ Ikiavɨra Itir God, kɨ bizir kurar kaba amada.
10 Egha Ikiavɨra Itir God ua kamaghɨn na mɨgei:
Ia gan! Dughiam otogha gɨfa!
Ezɨ asɨghasɨzir ekiam otivasa.
Israelia zurara uan namakabar ikuvava, arazir aghuibar me gamir puvatɨ.
Me zurara uari pɨrafir arazim gami.
11 Men arazir kurar kaba ghuavɨra ikia datɨrɨghɨn ekevegha gɨfa.
Kamaghɨn amizɨ, kɨ men bizir aghuir avɨriba bar dagh asɨghasigham.
Egh men ziam abɨraghtɨ,
me uam arazir kurabar amuan kogham.
12 Osɨmtɨzim otivamin dughiam a roghɨra izegha gɨfa.
Eghtɨ dughiar kamɨn gumazamiziba bizibagh ivesɨ akongan markɨ.
Eghtɨ gumazamizir biziba amangasa amiba naviba osɨman markɨ.
Dughiar kamɨn kɨ gumazamiziba bar me gasɨghasigham.
13 Eghtɨ gumazitam uan biziba amangɨtɨ tav adagh ivesɨ ifuegh,
aning dughiar kamɨn angamɨra ikɨvɨra ikɨ,
ua uan biziba amang dagh ivezamin arazim damuan kogham.
Gumazamiziba bar moghɨra arazir kuram gami, kamaghɨn men tav ikian kogham,
me bar moghɨra gɨvagham.
Nan akam a gavgafi, egh a guizbangɨram otivam.
14 Nan anɨngagharim gumazamizir kaba bar men iti.
Kamaghɨn amizɨ, me mɨdorozim damusɨ sɨgham givi biziba akɨrɨva,
men gumazitam mɨdorozim bagh mangan kogham.
God ivezir kuram Israelia ganɨdi
15 Ikiavɨra Itir God ua kamaghɨn mɨgei:
Apaniba Jerusalem anekɨarugha gɨfa.
Eghtɨ gumazamizir nguibar ekiamɨn azenan itiba,
apaniba me mɨsoghtɨ me arɨmɨghiram.
Eghtɨ gumazamizir nguibar ekiamɨn aven itiba,
dagheba men oteveghtɨ,
arɨmariar igharagha garir avɨriba me damutɨ,
me arɨmɨghiram.
16 Eghtɨ mɨdorozimɨn ariaghirezir puvatɨzir darasi, me arɨ mɨghsɨabar mangam.
Egh uan arazir kurar me amizibagh nɨghnɨgh
naviba bar osemegh puvɨrama aziam.
Eghtɨ men azirakam,
mati danganir zaribar itir kuarazibar ararebar mɨn mangam.
17 Eghtɨ men aghariba men amɨragh gavgaviba puvatɨghtɨ,
men teviba me gɨnuighnuigham.
18 Eghtɨ me azirakar korotiabar aghuigh,
puvɨrama atiating akongɨva,
bar aghumsigh,
uan dapanir arɨziba bar dagh isegh dapanir tuziba ikiam.
19 Me faragha silva ko gol mɨghɨgha aning gagoima,
aning me gamizɨ, me arazir kurar avɨribagh ami.
Egha me fo, Ikiavɨra Itir God, uan anɨngagharim men akaghamin dughiamɨn,
men gol ko silva men akuraghan kogham.
Guizbangɨra, men gol ko silva, men mɨtiriar aghazir ekiar kam agɨvaghan kogham.
Kamaghɨn amizɨ, me pura uan gol ko silva isɨ bizir kurabar mɨn, tintinibar tuavir toribar da akuntɨ,
da Godɨn damazimɨn bizir mɨzɨrɨzibar mɨn otogham.
20 Me gol ko silva itir dughiamɨn, me kurukazir bar aghuibar ingara uarir kuruka,
egha da bagha bar akongegha
da isa aser avɨribar marvir guabar ingari.
Marvir guar kaba kɨ dagh ifongezir puvatɨgha, bar a dar aghua.
Kamaghɨn amizɨ, kɨ bizir kabar amightɨ
da men damazibar bar bizir mɨzɨrɨzibar otivigham.
21 Egha Ikiavɨra Itir God ua kamaghɨn mɨgɨa ghaze:
Kɨ gumazir kurar azenan itibar amamangatɨghtɨ me uan kantri ategh izɨ,
Israelian bizir kaba bar ada okemegh mangɨ,
egh dar arazir kurar bar avɨribar amuam.
22 Egh kɨ men amamangatɨghtɨ me nan Dɨpenir aghuimɨn aven mangɨ
a damightɨ, a nan damazimɨn mɨzegham.
Eghtɨ kɨ men anogoreghan kogham.
Bar puvatɨ.
23 Israelɨn nguazimɨn itir danganiba bar, gumazamiziba arazir kurar avɨribar uari gamua,
egha men nguibar ekiamɨn aven me uan avɨrim mɨsozi me ariaghira ghuavɨra iti.
Kamaghɨn amizɨ, datɨrɨghɨn senbar ingarigh me ikɨrarɨghamin dughiam oto.
24 Kɨ kantrin bar kurar igharazibar gumazibar amamangatɨghtɨ
me izɨ Israelian dɨpenibar me batoghtɨ,
me arɨ mangɨtɨ, me men dɨpeniba iniam.
Egh Israelia asebar ziaba fer danganiba me bar ada akararigham.
Eghtɨ men gumazir gavgavir uan ziaba feba, atiatigh,
ua uari pɨrafan kogham.
25 Eghtɨ dughiar bar kuram Israelia bagh izɨtɨ,
me dabirabir aghuim ko navir amɨrizimɨn ikɨsɨ bar damuva avegham.
Bar puvatɨgham.
26 Eghtɨ osɨmtɨzir ekiaba uari tɨvaghtɨvagh me bagh izam,
eghtɨ bizir kurar otivir avɨribar akaba uari tɨvaghtɨvagh me bagh izɨtɨ,
me da baragham.
Egh bar atiatingɨva nan nɨghnɨzibagh fofoghsɨ,
akam inigha izir gumazibar azangsɨghtɨ,
kɨ akaba me danɨngan kogham.
Eghtɨ ofa gamir gumaziba men sure damuamin akaba puvatɨghtɨ,
men gumazir dapaniba me danɨngamin nɨghnɨzir aghuiba puvatɨgham.
27 Eghtɨ men atrivimɨn navim bar a basemeghtɨ,
an nɨghnɨziba bar an ikuvigham.
Eghtɨ nguazir kamɨn gumazamiziba
atiatingɨva akongam.
Kɨ men arazir kurar me amiziba bar da bagh ivezir kuram me danɨngam.
Me faragha gumazir igharaziba isa kot gatɨgha me tuisɨzi moghɨn,
kɨ datɨrɨghɨn arazir kurar me amiziba bagh me tuisɨgham.
Eghtɨ me kamaghɨn fogh suam,
kɨ Ikiavɨra Itir God.