☰ 1 Tesalonika 1
Akɨnafarir Faragha Zuim,
Pol Tesalonikan Nguibamɨn Itir Sios Baghava an Osiri
O
1 Tesalonika
Akar faragha zuim
Tesalonikan nguibar ekiam, a Masedonian Provinsɨn nguibar ekiar mam. Dughiar Pol Filipai ataghizim, a Tesalonikan ghugha nguibar kamɨn siosɨn mam okore (Aposel 17:1-9). Egha Judabar garima, gumazamizir avɨrim Polɨn akamɨn gɨn ghua egha Kraisɨn adarazir otifi, ezɨ Judaba navir kuram Polɨn ikiava a gamizɨ, a Tesalonikan nguibam ataki. Egha gɨn Pol ghua Korinɨn nguibar ekiamɨn itima, a ko ingarir gumazim Timoti iza bizir Tesalonikan Kraisɨn adarazi bativizibar gun Pol mɨgei.
Ezɨ Pol Timotin akam baregha, Tesalonikan sios nɨghnɨzir gavgaviba gavgavim me danɨngasa, a ko Sailas ko Timoti akɨnafarir kam osirigha me bagha anemada. Fofozir gumazir avɨrim ghaze, akɨnafarir kam ti Pol osirizir akɨnafarir Godɨn Akɨnafarimɨn aven itibar faragha zuim. Ezɨ akɨnafarir kamɨn, Pol Tesalonikabar nɨghnɨzir gavgaviba ko arazir aghuiba bagha bar akonge.
Tesalonikan gumazamizir kaba, Krais manmaghɨn ua izamin bizim, me ti deravɨra fozir puvatɨ. Me kamaghɨn foghasa, gumazamizir Krais tɨghar ua izamin dughiamɨn ovengeziba, me uaghan zurara itir ikɨrɨmɨrir aghuim iniam, o puvatɨgham? Eghtɨ Krais dughiar manamra izam? Pol men azangsɨziba ikarvagha kamaghɨn mɨgei, me arazir aghuibar gɨn mangɨva, Ekiam izamin dughiam bagh uari akɨr ikɨ.
Pol ko ingarir darasi, me Tesalonikan itir sios gɨnɨghnɨsi
1
(Sapta 1--3)
1 ++Kɨ Pol, ko Sailas ko Timoti, e Tesalonikan itir sios bagha akɨnafarir kam osiri, me God Afeziam ko Ekiam Krais Iesusɨn poroghav itir gumazamiziba: Godɨn apangkuvim ko navir amɨrizim ia ko ikɨ.
Pol Tesalonikan itir siosɨn nɨghnɨzir gavgavim bagha bar akonge
2 ++E zurazurara God mɨnabava ia bagha God ko mɨgei. 3 ++E ian arazibagh nɨghnɨgha e fo, ia nɨghnɨzir gavgavim Godɨn itima, bizir kam ia gamima ia ingangarir aghuibagh ami. Egha ia igharazibagh ifuegha, bizir kam ia gamima, ia pamtem ingari. Egha ia en Ekiam Krais Iesusɨn mɨzua ikia, uan naviba gavgavim dagh anɨgavɨra iti. E ian arazir kaba Godɨn damazimɨn dagh nɨghnɨsi. Kamaghɨn, e bizir kaba bagha God mɨnabavɨra iti.
4 ++En adarasi, e kamaghɨn fo, God bar moghɨra ia gifongegha, ua baghavɨra ia amɨsevegha gɨfa. 5 ++Akar aghuir e inigha ia bagha izezim, an akar kɨnimɨn mɨn ia bagha izezir puvatɨ. A Godɨn Duam ko gavgavim sara ize. Kamaghɨn amizɨ, ia guizbangɨra fo, akar kam a bar guizɨn akam. E ian tongɨn ikiava ian akuraghasava amizir arazim, ia uari a gɨfo. 6 ++Egha ia Godɨn akam inizɨ, osɨmtɨzir avɨriba ia batifi, ezɨ ia Ekiamɨn araziba ko en arazibar gɨn zuima, Godɨn Duam ian navibagh amima ia bar akonge. 7 ++Kamaghɨn ia arazir aghuim Masedonia ko Akaian Provinsɨn itir Kraisɨn adarasi, bar men aka. Eghtɨ me ian arazimɨn ganɨva an gɨn mangam. 8 ++Ezɨ Ekiamɨn akar ia kunizim, a dɨbɨarimɨn araremɨn mɨn bar ghu. Egha a Masedonia ko Akaiara aningɨn ghuzir puvatɨ, ian nɨghnɨzir gavgavir Godɨn itir kamɨn eghaghanim, nguibaba bar a baraki. Kamaghɨn amizɨ, markɨ e ua me mɨkɨman kogham. 9 ++Ezɨ dughiar e ia bagha iziba, me uari bizir otivizibar gun e geghari. Egha ia marvir guaba ategha navibagh iragha guizbangɨra Godɨn gɨn zuir arazibar me geghari. A guizbangɨra ko zurara itir God. 10 ++Ezɨ ia an Otarim mɨzuai, a Godɨn Nguibam ategh uamategham. Otarir kam aremezɨma God a gamizɨ, a ua dɨkafi. A Iesus, an en akurvasi, egh dughiar Godɨn anɨngagharim izamim, an en akuragham.
+ 1:1 Ap 17:1-13, 2 Te 1:1 + 1:1 Aposel 17:1-13; 2 Tesalonika 1:1 + 1:2 Ef 1:16, Fl 1:3-4, Kl 1:3, 2 Te 1:11 + 1:2 Efesus 1:16; Filipai 1:3-4; Kolosi 1:3; 2 Tesalonika 1:11 + 1:3 1 Ko 13:13, Ga 5:6, Kl 1:4-6, Hi 6:10 + 1:3 1 Korin 13:13; Galesia 5:6; Kolosi 1:4-6; Hibru 6:10 + 1:4 Kl 3:12, 2 Te 2:13 + 1:4 Kolosi 3:12; 2 Tesalonika 2:13 + 1:5 1 Ko 2:4-5, 4:20, Kl 2:2, Hi 2:3 + 1:5 1 Korin 2:4-5; 4:20; Kolosi 2:2; Hibru 2:3 + 1:6 Ap 17:1-9, 1 Ko 4:16, 11:1, Fl 3:17, 2 Te 3:9 + 1:6 Aposel 17:1-9; 1 Korin 4:16; 11:1; Filipai 3:17; 2 Tesalonika 3:9 + 1:7 1 Pi 5:3 + 1:7 1 Pita 5:3 + 1:8 Ro 1:8 + 1:8 Rom 1:8 + 1:9 Ap 14:15, 1 Ko 12:2, Ga 4:8, 1 Te 2:1 + 1:9 Aposel 14:15; 1 Korin 12:2; Galesia 4:8; 1 Tesalonika 2:1 + 1:10 Ap 17:31, 1 Te 4:16, 5:9, Ta 2:13, 2 Pi 3:12 + 1:10 Aposel 17:31; 1 Tesalonika 4:16; 5:9; Taitus 2:13; 2 Pita 3:12
☰