17
Ikiavɨra Itir God, kantri Siria ko Israelia gasɨghasɨgham
1 Ikiavɨra Itir God Damaskusɨn nguibar ekiam ikuvighasa akar kam anɨngi. A kamaghɨn mɨgei:
“Ia oragh! Apaniba Sirian kantrin nguibar ekiam Damaskus gasɨghasɨgham,
eghtɨ a bizir kuraba akurir danganir pozimɨn otogham.
2 Gumazamizitaba uam Aroerɨn Distrighɨn nguibabar ikian kogham.
Eghtɨ an nguibaba, pura sipsipbar danganibagh avagham.
Eghtɨ a ua dar amutɨ, da atiatingamin gumaziba puvatɨgham,
kamaghɨn amizɨ, sipsipɨn kaba deravɨra ikiam.
3 Apaniba, kantri Israelɨn nguibar gavgavibagh asɨghasigh,
egh uaghan Damaskusɨn gumazamizibagh gativagham.
Datɨrɨghɨn kantri Israel ko Siria, aning ziar ekiamning itima,
gumazamizir avɨrim aningɨn iti.
Eghtɨ kantrin kamning bar ikuvightɨ, gumazamizir varazira ikiam.
Kɨ Ikiavɨra Itir Godɨn Gavgaviba Bar Itim,
kɨ mɨkemegha gɨfa.”
4 Ikiavɨra Itir God ua kamaghɨn mɨgei,
“Dughiar kamɨn, Jekopɨn ovavir boribar ziar ekiam gɨvagham.
Men bizir aghuir bar avɨriba ko, gumazamizir bar avɨrim gɨvagham,
eghtɨ men kantri biziba bar puvatɨgh pura ikiam.
Egha mati arɨmariam gumazir gavgavir dafam batozɨ,
a bar agharim gura.
5 Israelia datɨrɨghɨn bar avɨrasemegha,
mati witba Refaimɨn danganir zarimɨn bar puvɨram otifi.
Eghtɨ apaniba me gasɨghasɨgh gɨvaghamin dughiamɨn,
me bar avɨrasemeghan kogham,
mati me azenimɨn witba akoregha gɨvazɨ, witɨn vaghvaziba mɨtivighav iti.
6 Egha me mati, temer oliv, gumazim aghorim inigha a mɨsogha olivɨn ovɨzir avɨriba ini,
ezɨ datɨrɨghɨn olivɨn ovɨzir puningra an ghuamɨn itima,
ovɨzir vaghvaziba an aguabar iti.
Kɨ Ikiavɨra Itir God, Israelian God,
kɨ mɨkemegha gɨfa.”
7 Dughiar kamɨn, gumazamiziba navibagh iragh,
Israelɨn Godɨn ziam fɨ nɨghnɨzir gavgavim an ikiam,
a Godɨn men ingarizim,
a Israelian Godɨn Bar Zuezim.
8 Egh me uamategh uari ingarizir ofa gamir dakoziba bagh mangan kogh,
egh ua aser amizim Aseran ziam fan kogh,
egh temer guarir aser amizim Aseran nedazim itiba, dar ziaba fan kogham.
Egh pauran mughuriar aghuim zuim isɨ
aser amizim Asera bagh me ofa gamir dakozibar uam a tuan kogham.
Me uari uan dafaribar ingarigha asebar ziaba fer bizir kaba,
me bar da agɨvagham.
9 God Israel gasɨghasɨghamin dughiar kamɨn, men nguibar ekiar gavgaviba, bar ikuvigh pura ikiam, da mati nguazir kamɨn fomɨra ikezir darazir nguibabar mɨn ganam. Israelia fomɨra mɨsoghasa izima, me uan nguibaba ategha are, ezɨ nguibar ekiar kaba pura mɨghsɨabagh isɨn itima, ruarim ada avara.
10-11 O Israelia, God ian akurvazir bizir kam, ia a gɨnɨghnɨzir puvatɨ.
Dughiar kurabar, a mati dagɨar bar ekiam,
ia ghua an aven uari moga deravɨra iti.
Ezɨ bar guizbangɨra, ia a gɨn amadagha bar a gɨnɨghnɨzir puvatɨ.
Ia igharaz darazir asebar ziaba fava,
ia ghaze, aser kaba ian akuraghtɨ, ia deravɨra ikiam.
Egh ia mɨzaziba ko arɨmariaba ikɨ bar ikuvigh deragh ikian kogh,
egh uamategh deraghamin tuaviba puvatɨgham.
Mati ia wainɨn azenim oparigha, wainɨn ikarɨzibar dafaribar gari,
da zuamɨram akɨmariba otivima, ia bar akonge.
Ezɨ ia dar dagheba inighan kogham. Puvatɨ.
Wainɨn ikarɨzir kaba mɨsightɨ, azenim bar ikuvigham.
God kantrin gavgaviba dɨkabɨra
12 Ia nɨgɨnir ekiar kam baragh!
Kar kantrin avɨribar mɨdorozir gumaziba uari akuvir nɨgɨnim.
Men nɨgɨnim mati, ongarim pamtem iza
dadarimɨn dɨpɨraghira tɨngazi.
13 Apaniba mati, aperiar dafam aforegha izi.
Eghtɨ God men atarɨva pamtem me mɨkemeghtɨ,
me uamategh arɨ uan nguibabar mangam.
God men agɨraghtɨ, me pura mangam,
mati amɨnim mɨghsɨabar dɨkavigha,
raizɨn mɨsevibagh varazɨ, da pura tintinibar zui,
egha mati amɨnir dafam pamtem iza,
nguazir mɨneziba avizɨ da tintinibar ghuavanadi.
14 Guaratɨzibar, apaniba iza nguibam korima,
gumazamiziba bar atiatingi.
Egha mɨzarazibar me itir puvatɨ.
God, arazir kamɨn, en apanibar tuaviba apɨrima,
me iza pazav e gamua,
en biziba okeir puvatɨ.