Ikiavɨra Itir God Saionɨn Mɨghsɨam gisɨn ikɨ, gumazamiziba bar me gativagh men ganam
24
(Sapta 24--27)
Ikiavɨra Itir God nguazir kam gasɨghasɨgh, egh a uabɨ gumazamizibagh ativagham
1 Ia deravɨram oragh! Ikiavɨra Itir God nguazim bar a gasɨghasɨghtɨ,
a bar nguazir kɨnimɨn otoghtɨ gumazamiziba puvatɨgham.
A nguazim dɨkaragh a rɨghɨrigham.
Egh a gumazamizibar amightɨ, me arɨ tintinibar mangegham.
2 Gumazamizir dabirabir igharagha garibar itiba, me bar moghɨram osɨmtɨzir vamɨra bativam.
Godɨn ofa gamir gumaziba ko, gumazamizir kɨniba,
gumazir dapaniba ko, ingarir gumaziba,
amizir dapaniba ko, amizir kɨniba,
biziba amadir gumaziba ko, bizibagh ivezir gumaziba ko,
gumazir munam ko, akam akɨrigh dagɨaba a danightɨ a gɨn uam ada ikarvaghamin arazim gamir gumaziba ko,
gumazir munamɨn dagɨaba iniasa a ko akam akɨrir arazim gamir gumaziba,
gumazir dagɨaba itiba ko, gumazir biziba puvatɨziba,
me bar moghɨra dughiar kuram bativam.
3 Nguazim bar moghɨra ikuvigh pura ikiam.
Bizir kaba otivasa Ikiavɨra Itir God mɨkemegha gɨfa.
4 Nguazir bar mɨsɨngigha, an gavgavim gɨfa, ezɨ an azirakar amɨrizibagh ami.
Ezɨ gumazamizir ziaba itiba,
men gavgaviba uaghan gɨfa.
5 Gumazamizibar arazir kuraba bangɨn, nguazim Godɨn damazimɨn bar ikufi.
Me akɨrim ragha Godɨn Arazibagh asara.
Me arazir God ifongeziba munasa amuavɨra iti.
Me God ko Akar Dɨkɨrɨzir Gavgavir ikɨ mamaghɨra ikiamim abɨki.
6 God men arazir kurabar osɨmtɨzim bangɨn mɨkemezɨ,
dughiar bar kuram nguazimɨn otozɨ,
gumazamizir bar avɨrim, avir ekiam men isigha gɨfa,
ezɨ bar varazira iti.
A kamaghɨn damightɨ,
gumazamiziba uan arazir kurabar osɨmtɨziba ateram.
7 Egha me garima, wainɨn ovɨzir igiaba mɨdɨima,
wainɨn ikarɨziba uaghan mɨdɨi.
Ezɨ gumazamizir wainɨn dɨpaba apa bar akongeziba,
me datɨrɨghɨn naviba bar osemegha iti.
8 Me ua bar akuegha, dia uan tambarinbav mɨsozir puvatɨ.
Ezɨ me bar akongezir arazir isam gamim a uam otozir puvatɨ.
Ezɨ ighiar me gitan guar avɨribav soghava amim,
a bar gɨfa.
9 Me wainɨn dɨpaba apir dughiamɨn, me ua ighiabagh amir puvatɨ.
Men osɨmtɨziba me gamima,
dɨpar onganim ua men akatoribar isɨngizir puvatɨ.
10 Nguibar ekiamɨn itir biziba bar moghɨra ikufi.
Ezɨ dɨpenibar tiar akaba bar pɨrigha itima,
gumazitam dar aven mangan iburagham.
11 Ezɨ gumazamiziba damamin wainɨn dɨpaba puvatɨ,
kamaghɨn amizɨ, me nguibar ekiabar tuavibar mɨtivighav ikia
wainɨn dɨpaba bagha dei.
Gumazamiziba bar akongezir arazim gɨfa,
ezɨ navir kuram ko navir osɨmtɨzimra nguazimɨn ruaghateviba bar, dar ghu.
12 Nguibar ekiam bar ikufi,
ezɨ an dɨvazir gavgavimɨn itir tiar akar ekiam irɨgha bar akaraghire.
13 Arazir kamra, nguazir kamɨn itir gumazamiziba bar me bativam,
eghtɨ gumazamizir varazira ikiam,
mati gumaziba olivɨn ovɨziba kuarigha da inigha gɨvazɨ,
ovɨzir vabara olivɨn tememɨn guighav iti.
Egha mati me wainɨn ovɨziba inigha gɨvazɨ,
vaghvazibara wainɨn azenimɨn iti.
14 Ezɨ ikiavɨra iti varazira, me bar akuegh ighiabar amuam.
Gumazamizir aruem uaghiri naghɨn itiba,
me Ikiavɨra Itir Godɨn ziar ekiam ko, gavgavim bagh bar akuegham.
15 Kamaghɨn amizɨ, ia aruem anadi naghɨn itir gumazamiziba,
Ikiavɨra Itir Godɨn ziam fɨ.
Ia ongarimɨn arighatɨzibar itir gumazamiziba,
ia bar moghɨra ziar ekiam a danɨng,
a Israelian God, Ikiavɨra Itir God.
16 Ia oragh!
Nguazir kamɨn ruaghatevir bar saghon itibar gumazamiziba,
me bar akongezir ighiabagh ami.
Ezɨ men ighiam kamakɨn,
“Ikiavɨra Itir God, arazir aghuibagh ami.
Kamaghɨn amizɨ, e bar ziar ekiam a ganɨdi.”
Ezɨ kɨ kamaghɨn mɨgei,
“Iavzika! Kɨ bar akueghan kogham.
Nan navim bar osɨmtɨzir dafam iti,
ezɨ nan ikɨrɨmɨrim pura gɨvasava ami.
Kɨ garima, gumazir arazir kurabagh amiba ko akar ifavaribagh amiba,
igharaz darazigh ifara paza me gami.
17 Ia nguazir kamɨn itir gumazamiziba, iavzika!
Dughiar kuram ko, torir ekiam ko, iver ia avaragh ian suighamba,
me ia mɨzua iti.
18 Eghtɨ gumazitam dughiar kurar kamɨn mɨgɨrɨgɨam bareghɨva arɨmangam,
a torir ekiamɨn magɨrɨgham.
Egh a uamategh anabogh arɨ mangɨsɨ,
ivem gasagham.
Guizbangɨra, overiam kuighirɨghtɨ, amozir ekiam nguazim giram.
Eghtɨ nguazimɨn mɨngarim nɨgham.
19 Nguazim bar puvɨra nɨgh bɨghirɨ,
akaba akarɨghiregh ikiam.
20 Nguazim ivazvagh,
mati gumazim wainɨn dɨpam apava onganigha mangɨn izegh gami.
Egh mati averpenir muziarimɨn mɨn,
amɨnir gavgavim a givaima, a mangɨn izegh damuam.
Gumazamizibar arazir kuramɨn osɨmtɨzim, bar osemezɨ nguazim an ateran ibura.
Kamaghɨn amizɨ, nguazim irɨgh, ua dɨkavighan iburagham.”
21 Eghtɨ Ikiavɨra Itir God uabɨ mɨsevezir dughiamɨn,
a Godɨn Nguibamɨn itir mɨdorozir gumaziba ko,
nguazir kam gativir atriviba, ivezir kuram isɨ me danɨngam.
22 God me akuvagh me isɨ kalabus datɨgham,
mati me kalabuziar gumazamiziba inigha torir mam gatɨ.
Egh a me dukuaghtɨ, me dughiar ruarimɨn kalabuziamɨn ikiam,
egh a gɨn ivezir kuram me danɨngam.
23 Dughiar kamɨn, Ikiavɨra Itir Godɨn Gavgaviba Bar itim, uan angazangarir ekiam ko, uan gavgavim sara izɨ,
Jerusalemɨn itir Saionɨn Mɨghsɨamɨn ikɨ, gumazamizibagh ativagh men ganam.
Eghtɨ an gumazamizibar gumazir faragha zuiba an ganam.
Eghtɨ an angazangarim pamtem me gisiraghtɨ,
aruem ko iakɨnimɨn angazangarim pura bizir kɨnimɨn mɨn otogham.