29
Ikiavɨra Itir God, amɨnim ko mɨkɨmkɨzim ko avimɨn mɨn Jerusalemɨn izam
1 Ikiavɨra Itir God, kamaghɨn mɨgɨa ghaze,
“O Ariel, Ariel, nɨ nguibar ekiar Atrivim Devit fomɨra ikezim, Jerusalem, noka!
Nɨ bar ikuvigham.
Nɨ datɨrɨghɨn nan ofa gamir dakozimɨn mɨn iti.
Kɨ garima, azeniba zurara iza zuima,
nɨ uan isar ekiabar arazibar gɨn ghuavɨra iti.
Egh nɨ gɨn bar ikuvigham.
2 Kɨ osɨmtɨzim inigh izɨtɨ a nɨ bativam.
Eghtɨ nɨ bar osemegh tiarim akarɨva arangam.
Nɨ nan ofa gamir dakozimɨn mɨn iti,
eghtɨ ghuzim bar nɨ ruegh nɨ avaragham,
mati gumaziba ofa gamir dakozim gisɨn asɨzibav sozi,
dar ghuziba ofa gamir dakozim avarazɨ moghɨn nɨ avaragham.
3 Kɨ nɨn apaniba inigh izɨtɨ,
me nɨ ekɨarugham.
Egh me nɨ mɨsoghsɨ, nguaziba inigh nɨn dɨvazir gavgavimɨn mɨriamɨn uarigh isɨn darigh dɨvazim bar an okarigham,
egh nguazir kam gisɨn dakozibar ingarigh, mɨtivigh nɨ mɨsogham.
4 Eghtɨ nɨ bar moghɨra degeghirɨghtɨ, nguazim nɨ avaragham.
Eghtɨ nɨ bar nɨmɨra, nɨmɨra mɨkɨmam,
mati ariaghirezir gumazamizibar duaba nguazimɨn aven ikia mɨgei.
Egha mati, tiarir mam nguazimɨn mɨnemniabar tongɨn ikia, aghumra sighsirakabav geima,
tiarir bar muziarim an ikegha azenan izi.”
5 Ezɨ apanir iza nɨ mɨsozir kaba,
me nguazir mɨnemniamɨn mɨn bar avɨraseme.
Men gumazir ekiar kuraba bar avɨrasemegham,
mati me witɨn ovɨzibar amasa, dav sozima,
dar mɨseviba pura tintinibar mɨzi moghɨn, me bar avɨrasemegham.
Ezɨ bar zuamɨra,
6 Ikiavɨra Itir Godɨn Gavgaviba Bar Itim otoghɨva,
arariba ko mɨkɨmkɨzim, ko nɨgɨnir bar dafam, ko amɨnir bar gavgavim, amozir bar dafam ko,
avir mɨzariar bar kurar biziba bar da tueghamim sara izam.
7 Eghtɨ kantrin igharazibar mɨdorozir gumazir avɨrir Ariel ko mɨsogha paza a gamiziba,
da uam ikian kogham.
Ezɨ me nguibar ekiam iniasa ingarizir dakoziba, da pura gɨvagham,
mati Jerusalemia irebar kuramɨn men ganizɨ mokɨn.
Egh mati irebamɨn mɨn garir bizim dɨmangan otogha zuamɨra pura zui moghɨn,
an apaniba zuamɨra bar gɨvagham.
8 Ezɨ kantrin avɨribar mɨdorozir gumazir avɨrir kaba, Saionɨn Mɨghsɨam ko mɨsoghasa ize,
egh me bar a dɨkabɨraghan kogham.
Bar puvatɨgham.
Mati mɨtiriam azir gumazim irebamɨn garava, an aven api,
egha an osezir dughiamɨn, a uabɨ barazi, mɨtiriam an aghavɨra iti.
Egha mati gumazim dɨpam amasa kuarim bar a mɨsɨngi,
egha a irebamɨn aven gari, a dɨpam api.
Egha, a dɨkavizir dughiamɨn, a uabɨ barazi,
kuarim an pɨravɨra iti.
God gumazamizibagh amizɨ me ongani
9 Ia Juda ko Jerusalemɨn gumazamiziba, ia okam nɨghnɨgh onganighvɨra ikɨ
damazir okavɨrɨzibar mɨn daru.
Ia gumazim wainɨn dɨpam ko dɨpar onganim apava deragha aruir puvatɨzɨ moghɨn arui.
Egha guizbangɨra, ia wain ko dɨpar onganiba apa onganim gamir puvatɨ.
10 Ikiavɨra Itir God ian damazibagh amizɨ pariam puv ian azi.
Ia mati gumazim akuav aremezɨ moghɨn akui.
Ezɨ God uaghan uan akam inigha izir gumazibar damaziba okafi,
ezɨ me ganamin bizibar garir puvatɨ.
Egha God uaghan an akam inigha izir gumazibar damaziba avara,
ezɨ me God amir bizibar garir puvatɨ.
11 Kamaghɨn amizɨ, God irebamɨn mɨn garir bizimɨn aven nɨn akakaghamin biziba, nɨ dar mɨngaribagh foghan kogham. Mati me akaba aven itir akɨnafarim righa, kendelɨn gris a gatɨgha, pamtemɨn a dukuazɨ a gavgavizɨ, me a dɨponasa nɨ ganɨngi. Egh nɨ ti gumazir akɨnafariba dɨbora fozitam, akar akɨnafarimɨn itir kaba dɨponsɨ a mɨkɨmtɨ, a suam, “Akɨnafarir bar dukuagha gavgavizir kam, kɨ a dɨponan iburaghburaki.”
12 Eghtɨ nɨ ti gumazir akɨnafariba dɨbora fozir puvatɨzitam, akɨnafarimɨn itir akar osiziriba dɨponsɨ a mɨkɨmtɨ, a kamaghɨn mɨkɨmam, “Kɨ akɨnafariba dɨbora fozir puvatɨ.”
13 Ezɨ Ekiam kamaghɨn mɨgɨa ghaze:
“Gumazamizir kaba uan akatoribara nan ziam fe,
ezɨ men naviba ko nɨghnɨziba bar nan saghon iti.
Me guizbangɨra nan ziam fer puvatɨ.
Me gumaziba pura uari amizir otivizir arazibar gɨntɨsi.
Me arazir kabar men sure gamizɨ, me pura uan akatoribara dar bori,
ezɨ da men navir averiabar aven zuir puvatɨ.
14 Kamaghɨn amizɨ, kɨ uamategh bizir bar igharagha garitabar amutɨ,
da gumazamizir kaba bativam.
Eghtɨ me bar dɨgavir kuram damigham.
Eghtɨ kɨ gumazamizir nɨghnɨzir aghuiba me ganɨdibar fofoziba adegham,
egh kɨ men fofozir gumazamizibar fofoziba bar da agɨvagham.”
Ikiavɨra Itir God bizibar amutɨ da igharagh otogham
15 Gumazamizir uan nɨghnɨzir kuraba ko uan arazir kuraba Ikiavɨra Itir Godɨn da mongasava amiba, mevzika!
Me bar ikuvigham!
Me arazir kurar kaba, mogomer danganiba ko dɨmagaribar dagh amua kamaghɨn mɨgɨa ghaze,
“Tinara en ganigh e gɨfogham?”
16 Me biziba otavkɨra bar da adafi.
Egha me kamaghɨn mɨgei,
“Gumazir nguazir mɨnemɨn ingarim, a nguazimɨn mɨn gari.”
Manmaghɨn ami?
Pura bizir kɨnitam ti gumazir an ingarizim kamaghɨn a mɨkɨm suam,
“Nɨ nan ingarizir puvatɨ,” mɨgɨrɨgɨar kam ti deraz, o?
Egh pura bizir kɨnitam ti gumazir an ingarizim kamaghɨn a mɨkɨm suam,
“Nɨ bizitam gɨfozir puvatɨ,” mɨgɨrɨgɨar kam ti deraz, o?
Bar puvatɨ.
17 Kɨran oveghangɨn biziba bar igharagh otivigham.
Lebanonɨn kantrin ruarir pɨzim, bar nguazir aghuir azenibar ingaramim gavagham.
Eghtɨ azenir bar aghuiba ruarir pɨzim gavagham.
18 Eghtɨ dughiar kamɨn kuarir orazir puvatɨziba,
akɨnafarir me osirizimɨn akaba baragham.
Eghtɨ damazir kurar bar mɨtarmemɨn aven itiba,
ua ganam.
19 Eghtɨ gumazamizir uari abɨriba,
me Ikiavɨra Itir God bagh bar akuegham.
Eghtɨ gumazamizir biziba puvatɨziba,
me uaghan Israelian Godɨn Bar Zuezim bagh bar akuegham.
20 Eghtɨ gumazir ekiar kuraba, men gavgaviba gɨvagham.
Eghtɨ gumazir Godɨn akam batogha a dɨpoviba, me puvarigham.
Eghtɨ gumazir arazir kurabar amuasa bar ifongeziba,
me bar moghɨra bar ikuvigham.
21 Egh arazir kamra uaghan, gumazir pura ifara igharaz darazi isa kot garɨziba,
ko gumazir osɨmtɨzibagh amibar akurvagha akar ifavaribagh amiba,
ko gumazir kotiam adavadavightɨ, eghtɨ gumazir Godɨn damazimɨn deraziba kotiamɨn me gafiraghan kogham,
gumazir kaba, me bar moghɨra bar ikuvigham.
22 Kamaghɨn amizɨ, Ikiavɨra Itir God, kar Godɨn fomɨra Abrahamɨn akurazim, a datɨrɨghɨn kamaghɨn Israelian gumazamizibav gei:
“Ia Jekopɨn ovavir boriba ia uam aghumsɨghan kogh,
egh ian guaba uam pɨghatomegh ganan kogham.
23 Ia ingangarir kɨ ian tongɨn amizibar gan,
egh guizbangɨra kamaghɨn fogh suam, kɨ Israelian God,
kɨ Jekopɨn ovavir boribar Godɨn Bar Zuezim.
Eghtɨ ia nan ziam fɨva nan apengan ikiam.
24 Eghtɨ gumazamizir nɨghnɨzir aghuiba itir puvatɨziba,
datɨrɨghɨn nɨghnɨzir aghuiba iniam.
Ezɨ gumazamizir imoba puv akaba batoziba,
me nan akaba baraghsɨ
bar ifuegham.”