34
God kantri Idom gasɨghasɨgham
1 Ia nguazir kamɨn itir kantriba bar dar gumazamiziba, ia izɨ.
Ia ikɨziba bar izɨ uari akuvagh akar kam baragh.
Nguazim ko an itir biziba bar moghɨra,
ia uaghan kuariba arigh deraghvɨram oragh.
2 Ikiavɨra Itir God, kantriba bar me ko mɨdorozir gumaziba, bar men anɨngaghegha me bagha navim isi,
egha me aremeghasa, a mɨkemegha gɨfa.
3 Eghtɨ men kuaba, gumaziba mozibar da afeghan kogham.
Puvatɨ. Da pura ikɨ kur mughuriam mangam.
Eghtɨ men ghuziba mɨghsɨaba avaragh
daghuribar emɨr magɨram.
4 Aruem ko, iakɨnim ko mɨkoveziba bar moghɨra kuarigh iregh gɨvagham.
Eghtɨ overiam mati akɨnafarim me a irigha a nomke.
Mɨkoveziba ko bizir overiamɨn ikia isiba,
mati wainɨn ikarɨzibar dafarir mɨdiariba ko fighɨn temebar ovɨzir mɨdiariba,
mɨsigha ira nguazim girezɨ moghɨn nguazim giram.
5 Ikiavɨra Itir God kamaghɨn mɨgei:
“Nan anɨngagharim, a mɨdorozir sabamɨn mɨn iti,
egh mɨdorozir sabar kam pɨn ikegh, ivezir kuram anɨngamin ingangarim agɨvagh,
egh overiam ategh magɨrɨ,
Idomia bagh izɨ ivezir kuram me danɨngɨva
me mɨsoghtɨ me arɨmɨghiram.
Kar kɨ asɨghasɨghasa mɨkemegha gɨvazir darasi.”
6 Eghtɨ Idomian ghuzim ko ovim, Ikiavɨra Itir Godɨn mɨdorozir sabam bar anegɨragɨrigham,
mati sipsip ko memen ghuzim ko ovim, gumaziba ofa damuasa dav sozi
men ghuziba ko ovim men dafariba agɨragɨri.
Ikiavɨra Itir God kantri Idomɨn aven Bosran nguibar ekiamɨn,
gumazamizir bar avɨrim mɨsueghtɨ me arɨmɨghiregham.
Mati a uabɨ Bosran ikɨ ofan bar dafam damuam.
7 Egh Ikiavɨra Itir God, uaghan bulmakaun atiaba ko bulmakaun igiaba ko bulmakaun apurir bar gavgaviba, dav soghtɨ da arɨmɨghirɨtɨ,
dar ghuziba ko oviba Idomɨn kantrin nguazim giregh anevaragham.
8 Ikiavɨra Itir Godɨn nguibar ekiam Saion, apaniba a dɨkabɨravɨra iti.
Kamaghɨn amizɨ, a me ikarvaghamin azenir mam amɨsevegha gɨfa.
Eghtɨ dughiar kam otoghtɨ,
a ivezir kuram isɨ me danɨngam.
9 Idomɨn kantrin faneba, koltan mɨn isia amera zui moghɨn otogham.
Eghtɨ nguazimɨn mɨneziba dagɨar avir isibar mɨn otivam.
Eghtɨ Idomɨn nguazim kolta isi moghɨn isiam.
10 Avir kam mungeghan kogham. Puvatɨ.
An arueba ko dɨmagaribar isi gavgavigh mamaghɨra ikɨtɨ, an mɨgharim zuraram otivam.
Eghtɨ Idomɨn nguazim pura ikɨ
mangɨtɨ men ovavir borir gɨn otivamiba, men danganiba inigh mangɨ dughiabar ikɨ mamaghɨra ikiam.
Eghtɨ gumazitam ua danganir kamɨn mangan kogham.
11 Eghtɨ a, isaba ko, taragiaba ko, anebaba ko, mɨghɨaba dar danganim gavagham.
Ikiavɨra Itir God Idomian biziba bar da agɨvagham,
egh Idomɨn nguazim damightɨ a pura ikiam,
mati nguazim fomɨrama otogha pura ikezɨ moghɨn ikiam.
12 Men gumazir aruaba ko gumazir dapaniba ua ikian kogham.
Eghtɨ atrivitam ua kantrin kamɨn ganan kogham.
13 Beniba ko oghevsevir dɨkoniba itiba atrivimɨn dɨpenim ko dɨpenir igharazibar avɨ da avegham.
Eghtɨ afiar atiaba izɨ ikɨ arangtɨ, poneba izɨ dɨpenir kabar dakuam.
14 Eghtɨ asɨzir atiar guar avɨriba izɨ danganir kamɨn uari akuvagh ikiam.
Eghtɨ memen atiaba uaghan izɨ ikɨ dɨmtɨ,
amizir aser dɨmagaribar aruim uaghan izɨ dakusɨ,
danganir kamɨn daguir danganiba buriam.
15 Eghtɨ mɨghɨaba izɨ uan aroriabar arɨghsɨ, danganir kamɨn izɨ mɨkonibar ingarsɨ danganiba buriam,
egh da aroriaba arightɨ, da afueghtɨ
da uan avɨziba kuigh uan nguzibar gan ikiam.
Eghtɨ isar apuriba ko isar amebaba,
me uaghan izɨ ikiam.
16 Ia Ikiavɨra Itir Godɨn akɨnafarir rɨghizimɨn aven ganɨva,
ia bizir kabar mɨgɨrɨgɨabar gantɨ, da ikiam.
Asɨziba, o kuaraziba, o bizir tiziba, akɨnafarim dar gun mɨgei,
da bar izɨ kantri Idomɨn nguazimɨn ikiam.
Egh da vaghvagh asɨzir amebaba ko apuriba ikiam.
Guizbangɨra, Ikiavɨra Itir God uabɨ da izasa dav keme.
An Duam da akuvagh, da inigh izam.
17 Ikiavɨra Itir God uabɨ Idomɨn nguazim abɨgha,
asɨzir kaba bagha da tuiragha dagh anɨngi,
eghtɨ da zurara danganir kamɨn ikɨ mangɨtɨ dar ovavir borir gɨn otivamiba, dar danganiba inigh
mangɨ dughiabar ikɨ mamaghɨra ikiam.
Nguazir kam, Ikiavɨra Itir God da bagha anetɨ.