43
God uan gumazamizibar akurvagha ua me ini
+Ia Israelia, ia Jekopɨn anabamɨn adarasi,
Ikiavɨra Itir God ian ingarigha ia gamizɨ,
ia gumazamizir ikɨzir vamɨran otozɨ, a kamaghɨn ia mɨgei:
“Kɨ ian akuragha gɨvagha, ian ziaba ia garɨki,
kɨ ua baghavɨra ia amɨsefe.
Kamaghɨn amizɨ, ia atiatingan markɨ.
+Ia dɨpar konibagh irɨ mangɨtɨ,
kɨ ia ko mangam.
Ia faneba abɨgh vongɨn mangɨtɨ,
da ia avan kogham.
Eghtɨ ia avir ekiar puvɨra isimɨn aven mangɨtɨ,
a ian isian kogham.
Kɨ Ikiavɨra Itir God, ian God, Israelian Godɨn Bar Zuezim, ian Akurvazir Gumazim.
Ia apanibar dafarimɨn itir dughiamɨn, kɨ Isipia ko, Itiopiaba ko, Sebaba, me isɨ
ian danganim inisɨ apanibar agharim datɨgh ia givezeghtɨ, ia fɨrighɨrɨgham.
Kɨ ia isa uabɨn dɨghorim gamigha,
bar moghɨra ia gifongegha,
ziar ekiam ia danɨngasa.
Kamaghɨn amizɨ, kɨ gumazamizir igharazitaba inigh ian danganimɨn inisɨ apaniba bagh me amadagham.
Guizbangɨra, kantrin igharaziba ian danganim iniam.
+Kɨ ia ko iti,
kamaghɨn ia atiatingan markɨ.
Ian adarazi me aruem anadi naghɨn ko aruem uaghiri naghɨn iti,
eghtɨ kɨ me akuvagh uamategh men aku izam.
Kɨ not ko sautɨn itir gumazamizibav kemeghtɨ, me ia ateghtɨ,
ia uamategh izam.
Kɨ kantrin bar saghuiamɨn itiba, me mɨkɨmtɨ,
me nan otariba amadaghtɨ, me uamategh uan nguibamɨn izam.
Kɨ gumazamizir nguazir kamɨn oteviba bar dar itiba, me mɨkɨmtɨ,
me nan guiviba amadaghtɨ,
me uamategh uan nguibamɨn izam.
Ia nan gumazamizibara,
kɨ vaghvagha ian ingari.
Kɨ uan ziar ekiam ko gavgavir ekiam bagha,
ian ikɨzimɨn ingarigha ghaze,
Kantrin Igharazibar Gumazamiziba ian ganɨva
nan ziam fam.”
Israelia kotɨn aven God bagh oteviba akakagham
Ikiavɨra Itir God ghaze,
“Ia gumazamizibar diaghtɨ me izɨ uari akufagh.
Guizbangɨra, me damazir okavɨrɨziba ko orazi puvatɨzibar mɨn ikia,
egha me ganamin damaziba ko akam baraghamin kuarir toriba iti!
Kantrin Igharazibar Gumazamiziba uari akuvagha iza kotɨn damazimɨn tuivigha gɨfa.
Men tinara gɨn otivamin bizibar gun mɨkɨmam?
Ezɨ men tongɨn gumazir manam faragha bizibar gun mɨkemezɨ, da datɨrɨghɨn otifi?
Tinara kotɨn aven tugh suam, an aser mam barazima, a bizir gɨn otivamibar gun mɨkeme, ezɨ da datɨrɨghɨn guizbangɨram otifi?
Bar puvatɨ.”
 
10  +Ikiavɨra Itir God ghaze,
“Israelia, ia na ko ikia uan damazibar nan gara na gɨfo,
egh ia kotɨn aven nan gun mɨkɨm.
Ia nan ingangarir gumazamizibar otivasa,
kɨ ua baghavɨra ia amɨsefe.
Kɨ ghaze, ia na gɨfogh nɨghnɨzir gavgavim nan ikɨ, deragh na gɨfogh suam,
kɨ bar uabɨra kɨ guizbangɨra God.
Fomɨra godɨn tam nan faragha ikezir puvatɨ,
egh godɨn tam uam otogh nan danganim inighan kogham.
11  +Kɨ uabɨra, kɨ Ikiavɨra Itir God,
egha ian Akurvazir Gumazim,
ezɨ ian akurvazir gumazitam ua itir puvatɨ.
12 Kɨ uabɨra, kɨ Ikiavɨra Itir God.
Kɨrara, kɨ bizir damuamimɨn gun mɨkeme.
Egha kɨ mɨkemezɨ moghɨn, ian akuragha gɨfa.
Egha kɨ ian akurvazir bizimɨn gun akam akuri.
Ezɨ ian akurvazir godɨn igharazitam ua itir puvatɨ. Kɨ uabɨra.
Ezɨ ia uan damazibar bizir kaba bar dar ganigha fo.
Egh kotɨn aven, ia nan gun mɨkɨm.
13 Datɨrɨghɨn ko dughiabar zurara,
kɨ guizɨn Godɨn ikiam.
Kɨ gumazamizitabar suiraghtɨ me nan agharimɨn ikɨtɨ,
tina nan gavgavim iriagh, nan agharimɨn me batuegham? Bar puvatɨgham.
Egh kɨ ingangaritam damutɨ,
gumazitam nan ingangarim tɨvaghan kogham.”
Israelian Babilonɨn kalabusɨn itiba, God ua me iniam
14 Ikiavɨra Itir God, a Israelian Godɨn Bar Zuezim, ian Akurvazir Gumazim, a ghaze,
“Kɨ ian akurvaghsɨ mɨdorozir gumaziba amadaghtɨ, me izɨ Babilonia ko mɨsogham.
Eghtɨ Babilonia arɨ mangɨ, uan kurir me bar akongezibar mavanegh,
uan nguibam ategh bar arɨ mangegham.*
15 Kɨ Ikiavɨra Itir God, Israelian Godɨn Bar Zuezim.
Kɨ ian ingarigha ia gamizɨ, ia gumazamizir ikɨzir vamɨran iti,
ezɨ kɨ ian atrivimɨn iti.”
 
16  +Ikiavɨra Itir God ghaze,
“Kɨ fomɨra ongarir bar ekiam tongɨram anebigha tuavim atɨ.
17 Egha kɨ mɨdorozir gumazir avɨribagh amizɨ, me uan karisba ko hoziaba sara tuavir kamɨn ghue,
egha me bar ikuvigha ua dɨkavizir puvatɨ.
Me mati gumazim lam giverazɨ
a zuamɨra munge.
18 Ezɨ datɨrɨghɨn kɨ ghaze,
Ia bizir kɨ fomɨram amizibara, nɨghnɨghan markɨ.
19 Ia gan! Kɨ bizir igiam damuasava ami.
Ezɨ bizir kam a datɨrɨghɨn otifi, ezɨ ia ti an ganiz, o puvatɨ?
Kɨ danganir mɨsɨngizibar tuavibar ingarɨva,
egh kɨ dɨpabar amutɨ, da gumazamiziba puvatɨzir danganir kamɨn ivemaram.
20 Nan gumazamizir kɨ ua bagha mɨseveziba, me dɨpabar amɨ,
kɨ dɨpam damightɨ, a danganir mɨsɨngizimɨn otoghtɨ,
bizir kam bangɨn asɨzir atiaba, ko afiar atiaba, ko poneba
ziar ekiam na danɨngam.
21 Gumazamizir kaba, bar akuegh nan ziar ekiamɨn gun mɨkɨmasa,
kɨ ua bagha men ingarigha me gamizɨ, me nan adarazir otifi.”
Israelian arazir kuraba, osɨmtɨzim God ganɨdi
22 Egha Ikiavɨra Itir God ua kamaghɨn mɨgɨa ghaze:
O Israelia, ia Jekopɨn adarasi, ia nan ziam dɨbora, a fer puvatɨ.
Manmaghɨn amizɨ ia amɨragha
nan aghua?
23 Egha ia asɨziba tue da bar isia mɨghɨrir ofaba bagha sipsipba na danɨngasa, da inigha izezir puvatɨ.
Egha ia uan navir averiabar aven, ia nan ziam fa na gɨnɨghnɨzir puvatɨgha ofabagh ami.
Guizbangɨra, kɨ ia na danɨngamin ofan guar bar avɨriba ko, pauran me temer balsamɨn eborimɨn ingarizimɨn ofabagh nɨghnigha,
osɨmtɨzir bar avɨriba ia gisɨn arɨzir puvatɨ.
24 Ezɨ ia ofa damuasa uan dagɨaba isa, na bagha ighurunir mughuriar aghuim zuibagh ivezezir puvatɨ.
Egha ia ofaba bagha sipsipba na danɨngasa, ia dar ovir aghuir avɨriba sara na ganɨngizir puvatɨ.
Kamaghɨn amizɨ, ian arazir kuraba na gamima, kɨ osɨmtɨzim ateri.
Ezɨ bizir kam na gamizɨ, kɨ ian arazir kurabar aghua.
 
25  +Kɨrara, kɨ God, kɨ uan ziar ekiam baghavɨra nɨghnɨsi,
kamaghɨn kɨ ian arazir kuraba bar da gɨn amada.
Egh kɨ ua ian arazir kurar kabagh nɨghnɨghan kogham.
 
26 Ia ti ghaze, ia arazir kurar tabagh amizir puvatɨ.
Egh ia kotɨn aven deraghvɨra mɨkɨm uan nɨghnɨziba azenim darigh oteviba akakagham,
eghtɨ e nɨghnɨzir vamɨra damu akam akɨr mɨkɨm suam,
ian nɨghnɨziba ti dera.
27 Ezɨ bar puvatɨ! Ian inazir afeziar bar faraghavɨra ikezim, arazir kuram gami,
ezɨ ian gumazir dapaniba uaghan nan akam batoke.
28 Kamaghɨn amizɨ, ian ofa gamir gumazibar dapaniba,
kɨ me gamizɨ, me nan damazimɨn mɨzegha bar aghumsɨki.
Ia Jekopɨn anabamɨn adarasi, ia bar moghɨra ikuvighasa kɨ ian amamangatɨs.
Gumazamizir igharaziba ia dɨpov ian ingarav akasa, kɨ men amamangatɨ.
+ 43:1 Aisaia 42:6; 44:6; 44:21; 45:4 + 43:2 Godɨn Araziba 31:6-8; Onger Akaba 91:3; Daniel 3:25-27 + 43:5 Aisaia 41:10; 41:14; Jeremaia 30:10-11; 46:27-28 + 43:10 Aisaia 41:4; 44:6-8 + 43:11 Aisaia 45:21; Hosea 13:4 * 43:14 Hibrun akam deragha vezɨn kamɨn mɨngarim abigha an gun mɨgeir puvatɨ. + 43:16 Ua Me Ini 14:21-29 + 43:25 Aisaia 1:18; 44:22; Esekiel 36:22; Aposel 3:19 43:27 Inazir afeziar bar faraghavɨra itir kam, a ti, Jekopra.