58
Ia dagheba ataghɨragh, egh uaghan arazir kurabar amuan markɨ
1 Ikiavɨra Itir God kamaghɨn Aisaia mɨgei,
“Nɨ bar pamtemɨn dɨm!
Egh aghumra dɨman markɨ!
Nɨ tiarir arozim akar, mati sɨgham arang kamaghɨn nan gumazamiziba mɨkɨm,
me nan Akar Gavgavibar gɨntɨzir puvatɨ.
Nɨ Jekopɨn ovavir boribar arazir kurabar gun me mɨkɨm.
2 Guizbangɨra, me nan ifongiam gɨfoghasa ifuegha, bizir kɨ damuasa mɨkemezibar aghuazir puvatɨgha,
dughiabar zurara nan ziam fer arazibagh ami.
Me ifara ghaze, me nan boroghɨra ikiasa bar akonge.
Me ifara, arazir aghuibar deragh uari damuasa nan azangsɨsi.
Bar puvatɨ, gumazamizir kaba bar moghɨra ifari.
Me guizbangɨra akɨrim ragha nan akabagh asaragha arazir kurabagh ami.
3 Me kamaghɨn na mɨgei,
‘Ikiavɨra Itir God, nɨ en gari, e dagheba ataghɨragha uari abɨri,
ezɨ nɨ tizim bagha en akurvaghamin bizitam gamir puvatɨ?’
“Ezɨ kɨ Ikiavɨra Itir God, kɨ kamaghɨn men akam ikaragha ghaze,
Ia oragh!
Ia dagheba ataghɨraghamim dughiar ia inabazimɨn, ia uarira uan bizibagh nɨghnɨgha,
paza uan ingangarir gumazamizibagh ami.
4 Ia oragh! Ia ti ghaze, ia dagheba tagh na ko mɨkɨmam.
Ezɨ ian araziba guizbangɨra bar igharagha ghu.
Ia atara mɨsogha, dafariba apɨra gumazir igharaziba me mɨsoghavɨra iti.
Egh ia dagheba ataghɨraghamin dughiamɨn arazir kurar kabar amutɨ,
kɨ bar ian dɨmdɨatam bareghan kogham.
5 Ia ti ghaze, ia dagheba ataghɨrazir araziba,
kɨ da mɨsevegha dagh ifonge, a?
Ia azirakar korotiaba aghuigha uan dapaniba avigha uaghira,
mati ighurunim amɨnim a givarazɨ, a nguazim girɨghav iti,
egha ia avernim gisɨn akua uaghan uari abɨnasa arazir maba saram ami.
Egha ia ti ghaze, arazir kaba ti na damutɨ,
kɨ navir aghuim ian ikiam, a?
Bar puvatɨ.
6 “Ia dagheba ataghɨrazir arazir kamaghɨn garim, kɨ an aghua.
Ezɨ nan ifongiam kamakɨn, ia arazir kuraba ko gumazamizir igharaziba dɨkabɨra paza me gamir araziba, bar ada atakigh.
Gumazamizir kaba, mevzigh mati ia kalabuziabar mɨn beniba ko senbar me ike,
Egha mati ia bulmakauba ter ararim men fɨribagh ike,
egh me damutɨ me ian ingangarim damuam.
Ian arazir kam bar ikufi.
Kɨ ghaze, Ia arazir aghuimɨn me damuva men senba aghoregh,
me ateghtɨ me mangɨ.”
7 God kamaghɨn mɨgei,
“Arazir kɨ ifongezim a kamakɨn:
Ia dagheba isɨ mɨtiriaba azir gumazamizibar anɨng.
Ia gumazir onganarazibar gantɨ, me dakuamin dɨpeniba puvatɨghtɨ,
ia me inigh uan dɨpenibar mangɨ.
Ia gumazimɨn gantɨ, a uan mɨkarzim avamin iniba puvatɨghtɨ,
ia iniba a danɨng.
Ia uan adarazir gantɨ me osɨmtɨziba initɨ,
ia men akurvagh.
8 “Eghtɨ ia arazir kɨ ifongezir kabar amutɨ,
kɨ zuamɨra ian osɨmtɨziba agɨvagham,
mati aruemɨn angazangarim isiragha mɨtatem agɨfa.
Egh kɨ ian mɨkarzibar amutɨ, ia zuamɨra ua deragham.
Kɨ arazir aghuim gamir Ikiavɨra Itir God,
kɨ ian faragh mangam.
Egh kɨ angazangarim ko gavgavim sara ian gɨn izɨva,
egh deravɨram ian ganam.
9 Egh ia na ko mɨgɨa nan deir dughiam,
kɨ Ikiavɨra Itir God, kɨ ian dɨmdiam baragham.
Eghtɨ dughiar ia uarir akurvaghsɨ na bagh arangamimɨn,
ia fogh suam, kɨ ia ko iti.
“Eghtɨ ia guizbangɨra igharaz darazi dɨkabɨrir arazim ko paza me gamir arazim ategh,
dafariba me gasa, akar kuraba mɨgeir arazim atakigh.
10 Egh ia gumazamizibar gantɨ me bizibar otevegh dagheba puvatɨghtɨ, ia uari baghvɨra nɨghnɨghan markɨ,
ia men apangkuvigh bizir me oteveziba isɨ me danɨng.
Egh gumazamizir osɨmtɨziba ateribar gan,
men akurvagh.
Ia kamaghɨn damutɨ,
kɨ bar deravɨra ia damuam.
Nan dughiar aghuim ia batogham,
mati aruer angazangarir bar gavgavim isiragha mɨtarmem agɨfa.
11 “Ezɨ kɨ Ikiavɨra Itir God, kɨ zurara deravɨra ian gara
ia mangamin tuavim ian akakagh,
bizir ian ifongiaba agɨvamba ia danɨngam.
Ia datɨrɨghɨn mati nguazir dɨpaba puvatɨzim, a bar ikuvighav iti,
eghtɨ kɨ ia damightɨ ia bar deragh gumazamizir bar gavgavibar otivigham.
Egh ia bar deravɨra ikiam, mati azenir dɨpar avɨrim itim,
egha mati mozir dɨpam datir puvatɨ.
12 Egh ia nguibar ikuviziba ua dar ingaram.
Ia dɨpenir ghurir fomɨra ikezir danganiba, ua dar dɨpenibar ingaram.
Eghtɨ me kamaghɨn ziar kamning ia darɨgham,
‘Nguibar Ekiamɨn Dɨvazir Gavgavir akuaghireziba ua Dar Ingarir Gumazamiziba’ ko,
‘Nguibamɨn Aven Itir Tuaviba ua Deravɨram da Akɨri Darasi.’ ”
Ia Sabatɨn dughiamɨn araziba deravɨram dar gɨntɨgh, egh bar deravɨra ikiam
13 Ikiavɨra Itir God kamaghɨn mɨgei,
“Ia Sabatɨn dughiamɨn araziba abɨghan markɨ, kar dughiar kɨ ua bagha mɨsevezim.
Egh ia dughiar kamɨn uari uan bizibar amusɨ nɨghnɨghan markɨ.
Kɨ Ikiavɨra Itir God, ia nan dughiar kam bar a gifongegh kamaghɨn a gɨnɨghnɨgh,
kar nan dughiar bar ekiam.
Egh ia pura tintinibar mangɨ uan ingangaribar amuava,
uan mɨgɨrɨgɨar guar avɨribar amuan markɨ.
14 Egh ia Sabatɨn dughiamɨn arazibar gɨntɨgh, kɨ Ikiavɨra Itir God,
ia na bagh bar akuegham.
Egh kɨ ia damutɨ, ia uan apaniba dɨkabɨraghtɨ,
kɨ ian aku mangɨ mɨghsɨar bar pɨn itibar mavanangvɨra ikiam.
Egh kɨ fomɨra ian inazir afeziam Jekop ko an adarazi ganɨngizir nguazim ia danɨngtɨ,
ia dagher bar avɨriba ikɨ, egh bizir bar avɨriba ikɨ bizitamɨn oteveghan kogham.”
Akar kam Ikiavɨra Itir Godɨn akatorimɨn ize.