9
Godɨn, gumazamiziba bar akueghsɨ, an atrivir aghuim me danɨngam
1 Eghtɨ gɨn, osɨmtɨziba aterir darasi, me uam osemeghan kogham. Ia fo, Ikiavɨra Itir God, fomɨra Naptali ko Sebulunɨn anababar nguibaba bar dagh asɨghasɨghizɨ, me bar aghumsɨki. Eghtɨ gɨn dughiatam izɨtɨ, tuavir ongarimɨn zuimɨn boroghɨra itir danganim, ko Jordanɨn Fanemɨn dadarir vongɨn itir danganim, a Galilin Distrighɨn nguazim, danganir kam Kantrin Igharazibar Gumazamizir avɨriba uaghan an aven iti, nguibar kaba uaghan bar moghɨra, men dughiar kuraba da gɨvaghtɨ, me ziar ekiam iniam.
2 Gumazamizir arazir kurabar mɨtatemɨn aven aruiba,
me datɨrɨghɨn angazangarir ekiamɨn gari.
Me danganir mɨtatemɨn apiaghav ikiava aremeghasava ami,
ezɨ datɨrɨghɨn amɨnim tirazɨ angazangarim me gisira.
3 Ikiavɨra Itir God, nɨ uan gumazamizibagh amizɨma, me bar avɨraseme,
Nɨ me gamizɨ, me bar akonge.
Me nɨn damazimɨn bar akongezir arazir kam,
mati me azenibar dagheba asia da bagha bar akonge.
Egha mati mɨdorozir gumaziba mɨdorozim gamigha gɨvagha,
bizir me iniziba da tuiragha uari ganɨga bar akonge.
4 Gumazamiziba bar akongezir bizim, a kamakɨn:
Nɨ fomɨra Midianɨn kantrin gavgaviba apɨragharɨghizɨ moghɨn,
datɨrɨghɨn men apanibar gavgaviba apɨragharigha gɨfa.
Guizbangɨra, apaniba faragha nɨn gumazamizibagh ativagha,
me gamima, me mati bulmakaun mam, gumazim ter ararim isa an tuem gatɨgha,
ingangarim zuamɨram a damuasa, a gaghora a mɨsosi.
Ezɨ nɨ apanibar aghoriba ko ter arariba apɨragharɨghizɨ,
me ua nɨn gumazamiziba paza me gamir puvatɨ.
5 Guizbangɨra, mɨdorozir gumaziba mɨdorozir korotiar aghua ghua mɨsoziba,
avim bar dar isigham.
Men dagarir asuaba ko men korotiar gumazibar ghuziba itiba,
avim bar adar isigham.
Eghtɨ osɨmtɨziba bar gɨvaghtɨma,
dughiar aghuim otogham.
6 Bar guizbangɨra, otarir mam amebam e bagha a bate,
a borir God e ganɨngizir mam.
Eghtɨ an e gativagh en ganamin arazir kam,
mati gumazim dɨpenir akɨnir dafam uan dɨpɨzim gatɨgha aneteri.
Kar an ziaba,
Gumazir Nɨghnɨzir Bar Aghuiba Anɨdim,
ko Godɨn Gavgaviba Bar Itim,
ko Afeziar Zurara Ikiavɨra Itim,
ko Atrivir Dabirabir Aghuim ko Navir Amɨrizim Anɨdim.
7 Eghtɨ atrivir kam, Atrivim Devitɨn danganim inigh,
Devitɨn atrivir dabirabim daperagh gumazamizibar ganam.
Eghtɨ a gumazamizibagh ativagh men ganamin gavgavir kam,
an ekɨv mangɨvɨra ikiam.
Kamaghɨn mɨdoroziba ua puvatɨghtɨ,
gumazamiziba navir amɨrizimɨn ikia, deraghvɨra dapiagh ikɨ mamaghɨra ikiam.
Atrivir kam, guizɨn arazimɨn gɨn ghua biziba deragha da tuisɨgha,
Godɨn arazir aghuibara amuasavɨra iti.
A kamaghɨn damutɨ,
an atrivir ingangarim datɨrɨghɨn ikegh gavgavigh mangɨvɨra ikiam.
Ikiavɨra Itir Godɨn Gavgaviba Bar Itim, uan gumazamiziba guizbangɨra bar me gifonge,
kamaghɨn amizɨ, a bizir kam damightɨ an otogham.
Ikiavɨra Itir God Israelia gasɨghasɨki
8 Ekiam mɨkemegha gɨvagha ghaze,
a kantri Israel gasɨghasɨgham, kar Jekopɨn ovavir boriba.
Eghtɨ dughiar kurar kam me batoghtɨ,
9 Samarian nguibar ekiamɨn itir gumazamiziba ko, Efraimɨn adarasi,
me bar kamaghɨn fogh suam, Ekiamra bizir kamɨn me gami.
Egha me datɨrɨghɨn ghaze, me bar pɨn mar iti,
egha uarira uan ziaba fe.
Me kamaghɨn mɨgei,
10 “Apaniba en brighɨn dɨpeniba akaragharigha, en temer fikba okagharɨki.
Ezɨ e da bagha naviba ikuvir pu, da pura biziba.
Puvatɨ. E dagɨaba aghoregh dɨpenir bar gavgavibar ingaram.
Egh temer fikbar danganibar, temer sidan bar aghuiba oparam.”
11-12 Ezɨ Ikiavɨra Itir God Israelian anɨngaghe,
kamaghɨn amizɨ, a men apanibar naviba fegha gɨfa, eghtɨ me izɨ me mɨsogham.
An aruem anadi naghɨn Siriabar naviba fe, me Atrivim Resinɨn adarasi.
Egha a uaghan aruem uaghiri naghɨn Filistiabar naviba fe.
Egha a uaghan Israelia mɨsogh, me dɨkabɨnasa Atrivim Resinɨn apanibar naviba fe.
Ekiam kamaghɨn amigha gɨfa,
ezɨ bizir kam an anɨngagharim agɨvaghan kogham.
Puvatɨ. A ivezir kuram isɨ me danɨngvɨra ikiam.
13 Ezɨ Israelian gumazamiziba navibagh irazir puvatɨ.
Ikiavɨra Itir Godɨn Gavgaviba Bar Itim, ivezir bar kuram me ganɨngi,
ezɨ me uamategha a baghavɨra izir puvatɨ.
14 Kamaghɨn amizɨ, Ikiavɨra Itir God, kantri Israel gasɨghasɨki.
Guizbangɨra, an aruer vamɨran Israelɨn dapanim ko puem atu.
A dughiar vamɨra, a iruer dafarim ko ighurunim gighɨzazɨ aning irɨ.
15 Dapanim, a gumazir aruaba ko gumazir ziar ekiaba itibar ababanim.
Ezɨ puem, a gumazir akam inigha iziba, me akar ifavaribar gumazamizibagh anɨdiba, men ababanim.
16 Gumazir dapaniba tuavir aghuim ko arazir aghuim men akazir puvatɨ.
Kamaghɨn amizɨ, gumazamiziba okam nɨghnɨgha pura tintinibar ghue.
17 Gumazamizir kaba bar moghɨra God ategha arazir kurabagh ami.
Me bar akar kurabav gei.
Kamaghɨn amizɨ, Ekiam bar moghɨra me gasɨghasigham.
A gumazir igiatam ateghtɨma a ikian kogham.
Egh an amizir paba oveaghueziba ko borir ameboghfeziaba oveaghuezibar apangkuvighan kogham.
Ekiam kamaghɨn damuam, eghtɨ bizir kam an anɨngagharim agɨvaghan kogham.
Puvatɨ. A ivezir kuram isɨ me danɨngvɨra ikiam.
18 Gumazamizibar arazir kurabara me gasɨghasɨsi.
Mati avim benir ataghatariba ko ogher kurabar isia ghua, temer dafaribagh irɨgha ghua, ruarir ekiam girɨzɨ a isi.
Ezɨ maburan mɨgharim dɨkavigha ghuavanadi.
19 Ikiavɨra Itir Godɨn Gavgaviba Bar Itim bar anɨngaghegha, nguazir kamɨn ruaghatevibar itir gumazamiziba bar me gasɨghasɨki.
A mati avim ruarir ekiamɨn isia bar a gasɨghasɨghizɨ moghɨn, bar me gasɨghasɨki.
Gumazamiziba uaghan vaghvagha men nɨghnɨzibar gɨn ghua,
igharaz darazi dɨkabɨnasava ami.
20 Me gumazamizir igharazibar biziba, tintinibar da okɨmasa.
Eghtɨ bizir kaba men ifongiaba agɨvan kogham.
Me mati gumazim dagher avɨriba apavɨra ikiava izɨvazir puvatɨ.
Egha me uaghan arazir kamra, uan ikɨzibagh amua me gasɨghasɨsi.
21 Manasen anabamɨn adarasi, Efraimɨn anabamɨn adarazi abɨnasa,
ezɨ Efraimia Manaseba abɨnasa.
Egha aning uaghan Judaba abɨnasa.
Kamaghɨn amizɨ, Ekiam me ateghtɨ me uarira uarigh asɨghasɨgham,
eghtɨ bizir kam an anɨngagharim agɨvaghan kogham.
Puvatɨ. A tɨghar ivezir kuram isɨ me danɨngvɨra ikiam.