4
Satan Iesus gifarasa a gakaghori
(Matyu 4:1-11; Mak 1:12-13)
Godɨn Duam bar Iesus gizɨvazɨma, a Jordanɨn Fanem ategha uamategha Galilin Distrighɨn zui. Ezɨ Godɨn Duam a inigha gumazamiziba puvatɨzir danganimɨn ghu. + +Danganir kamɨn Iesus 40plan arueba ko dɨmagaribar itima, Satan bizibar a gifari. Iesus dughiar kabar daghetam amezir puvatɨ. Ezɨ dughiar kaba gɨvazɨma mɨtiriam an azi.
Ezɨ Satan kamaghɨn a mɨgei, “Nɨ guizbangɨra Godɨn Otarim, nɨ dagɨar kaba akar gavgavim dav kemeghtɨ, da bretɨn rubuzibar mɨn otogh.”
+ +Ezɨ Iesus Satan ikaragha ghaze, “Godɨn Akɨnafarim kamaghɨn mɨgei, ‘Gumazamiziba daghebara damɨva, dar gavgavimɨn ikian kogham.’ ”
Ezɨ Satan ua Iesus inigha danganir bar pɨn itimɨn ghuavanabogha, zuamɨra nguazir kamɨn kantriba bar an aka. + +Egha Satan kamaghɨn Iesus mɨgei, “Bizir kaba bar nan dafarimɨn iti, kamaghɨn amizɨ, kɨ tina danɨngɨsɨ fueghɨva, a danɨngam. Kɨ nguibar kabar ganamin gavgavim ko, dar bizir aghuiba nɨ danɨngam. Kamaghɨn amizɨ nɨ tevimning apɨrigh nan ziam feghtɨma, kɨ bizir kaba bar da nɨ danɨngam.”
+ +Ezɨ Iesus kamaghɨn an akam ikara ghaze, “Godɨn Akɨnafarim kamaghɨn mɨgei, ‘Nɨ uan Ekiam God, nɨ an apengara ikɨ an ziamra fam.’ ”
Ezɨ Satan Iesus inigha Jerusalemɨn ghugha a isa Godɨn Dɨpenim pɨn mar anefa. 10-11  +Egha kamaghɨn a mɨgei, “Godɨn Akɨnafarim kamaghɨn mɨgei, ‘A nɨ bagh uan enselba akar gavgavim me mɨkɨmtɨma me deraghvɨra nɨn ganam. Egh me uan dafaribar nɨ fueghtɨ, nɨ uan dagarim dagɨatam gaseghan kogham!’ Kamaghɨn amizɨ, nɨ guizbangɨra Godɨn Otarim, nɨ kagh ikɨ uabɨ ekunigh.”
12 + +Ezɨ Iesus an akam ikaragha ghaze, “Godɨn Akɨnafarim kamaghɨn mɨgei, ‘Nɨ uan Ekiam Godɨn Araziba tuisɨgh a gɨfoghsɨ an gavgavim bagh azangan markɨ.’ ”
13 + +Ezɨ Satan ifavarir kaba bar Iesus gamigha gɨvagha anetaki. A Iesus ategha ghua dughiar igharazim bagha mɨzuai.
Iesus Galilin Distrighɨn ghua Godɨn Duamɨn gavgavimɨn
ingangarim gami
(Sapta 4:14--9:50)
Iesus Galilin ghughava maghɨra uan ingangarim gami
(Matyu 4:12-17; Mak 1:14-15)
14 Iesus Godɨn Duamɨn gavgavimɨn a uamategha Galilin Distrighɨn ghu. Ezɨ an akam bar moghɨra nguibabar ghu. 15 Egha a God ko mɨgeir dɨpenibar men sure gamima, me bar an ziam fe.
Nasaretɨn itir gumazamiziba
Iesusɨn aghua
(Matyu 13:53-58; Mak 6:1-6)
16 + +Ezɨ Iesus ikiava aghungizɨ naghɨn Nasaretɨn ghu. Egha Sabatɨn dughiamɨn a God ko mɨgeir dɨpenimɨn aven ghu, kar arazir a zuraram amim. A tugha Godɨn Akɨnafarim dɨponasava ami. 17 +Ezɨ me Godɨn akam inigha izir gumazim Aisaian akɨnafarir rɨghizim a ganɨngi. Ezɨ Iesus akɨnafarir rɨghizir kam onegha, mɨgɨrɨgɨar kamɨn api:
 
18-19 + +“God Akar Aghuim onganarazibagh amir gumazamizibav kɨnasa na mɨsevegha,
borem nan dapanim ginge,
kamaghɨn amizɨ, Ekiamɨn Duam nan iti.
Egha uaghan akam akunasa na amada,
eghtɨ kɨ kamaghɨn me mɨkɨm suam,
gumazir damazir kuraba ua ganam.
Eghtɨ kalabusɨn itir gumazamiziba ko gumazir osɨmtɨzibar apengan itiba,
kɨ me bagh kalabusɨn tiar akam kuightɨ,
me kalabus ategh fɨrighɨregh mangam.
Kɨ kamaghɨn me mɨkɨmam,
Ekiam gumazamizibagh ifongezir dughiam,
an otogha gɨfa.”
 
20 Ezɨ Iesus akɨnafarim uam a righa, a isava ingangarir gumazim ganigha apera. Ezɨ me bar moghɨra God ko mɨgeir dɨpenimɨn aven pamtemɨn an gari. 21 Ezɨ a kamaghɨn me mɨgei, “Datɨrɨghɨn Godɨn mɨgɨrɨgɨar ia oraghizim, a guizbangɨram oto!”
22 + +Ezɨ me an akabagh ifongeghava nɨghnɨzir avɨribar akar aghuir a mɨkemezibagh ami, egha me kamaghɨn azara, “Kar ti Josepɨn otarimra o?”
23 + +Ezɨ Iesus kamaghɨn me mɨgei, “Ia ti akar isɨn zuir kam na mɨkɨmam, ‘Dokta, nɨ uabɨ uan mɨkarzim akɨrigh!’ Egh e oraghizir bizir nɨ Kaperneamɨn amiziba, nɨ kagh uaghan uan nguibamɨn dar amu.”*
24 + +Egha a mɨgɨa ghuavɨra ikiava kamaghɨn mɨgei, “Kɨ guizbangɨra ia mɨgei, Godɨn akam inigha izir gumaziba, men adarazi me baraghan aghua. 25 + +Kɨ guizbangɨra ia mɨgei, Elaijan dughiamɨn, amuir odiarir bar avɨrim Israelɨn iti. Ezɨ amozim izir puvatɨgha ghua azenir pumuning ko mɨkezim ko azenir akuamɨn oto. Ezɨ dagheba bar puvatɨzir dughiam bar nguibabar oto. 26 + +Ezɨ God Israelɨn amizitam bagha Elaija amadazir puvatɨ. A Saidonɨn danganir aven itir nguibar mam, Sarefetɨn itir amuir odiarim baghavɨra anemada. 27 + +Ezɨ Godɨn akam inigha izir gumazim Elisan dughiamɨn, lepan arɨmariam itir gumazir avɨrim Israelɨn ti. Ezɨ God men tav gamizɨma a zuegha derazir puvatɨ. Ezɨ Namanra, God a gamizɨma a zuegha dera, a Sirian gumazir mam.”
28 Ezɨ gumazamizir God ko mɨgeir dɨpenimɨn aven itiba bar bizir kam baregha men naviba Iesus bagha men isi. 29 Egha me dɨkavigha, Iesus batoghezɨma a nguibam ategha azenan ghuzɨma, me a inigha nguibar ekiam itir mɨghsɨar avarir konimɨn anekunasa zui. 30 + +Ezɨ a men tongɨn ghua munagh otogha ghu.
Iesus duar kuram gumazir mam
dam a batoke
(Mak 1:21-28)
31 + +Iesus Galilin Distrighɨn aven itir nguibam, Kaperneamɨn ghuaghiri. Egha Sabatɨn dughiamɨn, a gumazamizibar sure gami. 32 + +Ezɨ an akaba gavgavim dar itima, me an suren mɨgɨrɨgɨaba baragha dɨgavir kuram gami.
33 + +Ezɨ duar kuram apazazir gumazir mam, a God ko mɨgeir dɨpenimɨn aven ikia, pamtemɨn dɨa kamaghɨn mɨgei, 34 + +“Iesus, Nasaretɨn gumazim, nɨ manmaghɨra e damuasa ize? Nɨ e gasɨghasɨghasa izi? Kɨ nɨ gɨfo, nɨ Godɨn damazimɨn zuezir gumazim!”
35 Ezɨ Iesus an atara a mɨgɨa ghaze, “Nɨ nɨmɨra ikɨ! Egh gumazir kam ategh azenan izɨ!” Ezɨ duar kurar kam men damazibar gumazim akunigha azenimɨn iza gumazim gasɨghasɨghizir puvatɨ.
36 Ezɨ me bar aguaghfagha uarira uariv gei, “Eei, kar mɨgɨrɨgɨar manam? An akar gavgavimɨn duar kuraba batoghezɨma da azenan izi.” 37 Ezɨ an amizir bizir kaba, dar mɨgɨrɨgɨam bar nguibabar ghu.
Iesus Pitan asamim akɨrizɨma a ghuamaghe
(Matyu 8:14-15; Mak 1:29-31)
38 Egha Iesus God ko mɨgeir dɨpenim ategha Saimonɨn dɨpenimɨn ghu. Ezɨ Saimonɨn asamim arɨava mɨkarzim puvɨra feima, me an akurvaghasa Iesusɨn azai. 39 Ezɨ Iesus amizimɨn mɨn tugha aviragha akar gavgavimɨn an arɨmariam batoghezɨma, arɨmariam ghu. Ezɨ amizim zuamɨra dɨkavighava me bagha daghebagh amuava me ganɨdi.
Iesus gumazamizir avɨribagh amizɨ,
me ua dera
(Matyu 8:16-17; Mak 1:32-34)
40 Ezɨ aruem ghuaghirima, gumazamiziba me gumazir arɨmariar igharagha garir avɨriba inigha Iesus bagha ize. Ezɨ a vaghvagha uan dafariba me gisɨn arɨzima me ghuamazi. 41 + +Egha a uaghan duar kurabagh ami da gumazamiziba ataghɨragha azenan iza kamaghɨn dei, “Nɨ Godɨn Otarim!” Duar kuraba fo, kar God Gumazamiziba Ua Me Iniasa Mɨsevezir Gumazim. Kamaghɨn amizɨ Iesus mɨkɨman dar anogoroke.
Iesus nguibar igharazibagh arui
(Mak 1:35-39)
42 Amɨnim tirazɨma, Iesus gumazamiziba puvatɨzir danganimɨn ghu. Ezɨ gumazamiziba a buria ghua a batogha, an anogorogha ghaze, a me ategh mangan kogham. 43 + +Ezɨ a kamaghɨn me mɨgei, “God Akar Aghuim akunasa na amada. Kamaghɨn amizɨ kɨ nguibar igharaziba uaghan dar mangɨ God Bizibagh Ativamin Dughiamɨn Akar Aghuim akunam.” 44 + +Egha a Judian Distrighɨn God ko mɨgeir dɨpenibar akam akura ghuavɨra iti.
+ 4:2 Kis 34:28, 1 Kin 19:8 + 4:2 Ua Me Ini 34:28; 1 Atriviba 19:8 + 4:4 Lo 8:3 + 4:4 Godɨn Araziba 8:3 + 4:6 Mt 28:18, Jo 12:31, 14:30, MAA 13:2, 13:7 + 4:6 Matyu 28:18; Jon 12:31; 14:30; Akar Mogomem 13:2; 13:7 + 4:8 Lo 6:13-14, 10:20 + 4:8 Godɨn Araziba 6:13-14; 10:20 + 4:10-11 Onger Akaba 91:11-12 + 4:12 Lo 6:16, 1 Ko 10:9 + 4:12 Godɨn Araziba 6:16; 1 Korin 10:9 + 4:13 Hi 2:18, 4:15 + 4:13 Hibru 2:18; 4:15 + 4:16 Mt 2:23, Mk 6:1, Ap 13:14, 17:2 + 4:16 Matyu 2:23; Mak 6:1; Aposel 13:14; 17:2 + 4:17 Ais 61:1-2 + 4:18-19 Ais 61:1-2 + 4:18-19 Aisaia 61:1-2 + 4:22 Sng 45:2, Mt 13:54, Mk 6:2, Lu 3:23, Jo 6:42 + 4:22 Matyu 13:54; Mak 6:2; Luk 3:23; Jon 6:42 + 4:23 Mt 4:13, Jo 2:12 + 4:23 Matyu 4:13; Jon 2:12 * 4:23 Dokta uabɨ uan mɨkarzim akɨramin akar mɨngarim, a kamaghɨn ghu. Gumazim ingangaritam damusɨ, a deravɨra gumazamizibar damazimɨn a damightɨ, me nɨghnɨzir gavgavim an akamɨn ikiam. Luk 4:18-19ɨn aven, Iesus God a ganɨngizir ingangarir ekiabav gei. Kamaghɨn, Iesus ghaze, gumazamiziba kamaghɨn nɨghnɨgham, me an gantɨ a faragh mirakelbar amightɨ, me an akam nɨghnɨzir gavgavim an ikiam. + 4:24 Jo 4:44 + 4:24 Jon 4:44 + 4:25 1 Kin 17:1, 17:7, 1 Kin 18:1 + 4:25 1 Atriviba 17:1; 17:7; 18:1 + 4:26 1 Kin 17:8-16 + 4:26 1 Atriviba 17:8-16 + 4:27 2 Kin 5:1-14 + 4:27 2 Atriviba 5:1-14 + 4:30 Jo 8:59, 10:39 + 4:30 Jon 8:59; 10:39 + 4:31 Mt 4:13, Mk 1:21, Lu 4:23 + 4:31 Matyu 4:13; Mak 1:21; Luk 4:23 + 4:32 Mt 7:28-29, Jo 7:46, Ta 2:15 + 4:32 Matyu 7:28-29; Jon 7:46; Taitus 2:15 + 4:33 Mt 8:29, Mk 1:23, Lu 8:28 + 4:33 Matyu 8:29; Mak 1:23; Luk 8:28 + 4:34 Lu 1:35, 4:41, Jo 6:69 + 4:34 Luk 1:35; 4:41; Jon 6:69 + 4:41 Mt 8:29, Mk 1:25, 1:34, 3:11-12 + 4:41 Matyu 8:29; Mak 1:25; 1:34; 3:11-12 + 4:43 Lu 8:1 + 4:43 Luk 8:1 + 4:44 Mt 4:23 + 4:44 Matyu 4:23