6
Kar arazir maba,
nɨ dar gɨn mangan markɨ
1 Nan borim, gumazitam gumazir igharazitam da puram an bizim ini, egh tɨghar uam a ikarvagham, ezɨ nɨ a ko akam akɨrigha gɨvagha ghaze,
“Nɨ a ikarvaghan iburaghtɨ, kɨ nɨ bagh a ikarvagham.” Nɨn arazir kam bar derazir puvatɨ.
2 Nɨn akar dɨkɨrɨzir kam nɨrara ikiagharɨki,
mati nɨ uabɨ ivem agurazɨ a nɨn suira.
3 Nan borim, nɨ gumazir kamɨn apengan itima, a nɨ ikiagharɨki. Kamaghɨn nɨ iver kam zuamɨram an azenim girɨgh.
Nɨ ua mangɨ a mɨkemegh, gua akar dɨkɨrɨzir kam ua anekɨrigh nɨ fɨrighɨrɨgham. Arazir kam nɨn ziam abɨrazɨ nɨ aghumsɨsi. Pura bizim. Nɨ mangɨva anekɨrigh.
4 Nɨ avughsɨ dakusɨ nɨghnɨghan markɨ,
nɨ zuamɨra mangɨ.
5 Nɨ iver kam fɨrigh,
mati asɨzim o kuarazim ivemɨn uabɨ fɨrigha arav ghu.
6 Ia gumazir amɨraziba, kɨ kamaghɨn ia mɨkɨmasa.
Ia mangɨva sibabar araziba deraghvɨra dar ganigh, egh nɨghnɨzir aghuim inigh.
7 Sibaba, da gumazir dapaniba ko
gumazir men faragha zuiba ko gumazir me gativagh men ganamiba, bar puvatɨ.
8 Ezɨ dagher avɨriba itir dughiamɨn, sibaba dagheba akufi,
egha dagheba otevir dughiam bagha da arɨsi.
9 Nɨ gumazir amɨrazim, nɨ dughiar ruarimɨn akui.
Nɨ manadɨzoghɨn uan mɨsiam ategh dɨkavam?
10 Ezɨ nɨ ghaze, “A dera, kɨ tong dakuigham.
Kɨ dughiar ovezimɨn tong avughsegh ikɨ mangɨ egh gɨn ua dɨkavigham.”
11 Nɨ kamaghɨn damutɨ, nɨn biziba ko dagheba zuamɨra gɨvaghtɨ, nɨ gumazir onganarazibagh amim mɨn otogham.
Mati okɨmakɨar gumazim nɨn biziba bar da okeme.
12 Gumazir kuraba puram arua
ifavaribagh ami.
13 Egha me deraghavɨra uan akabar bighavɨra mɨgeir puvatɨ.
Me uan namakabagh ifarasa arazir igharagha garibagh amua, uan damaziba ko dafariba, ko suebar araziba akakasi.
14 Egha me zurara navimɨn aven ifavarir nɨghnɨzibagh amua arazir kurabar amuasa nɨghnɨsi,
egha gumazibagh amima me gumazir igharazibar anɨngazi.
15 Eghtɨ osɨmtɨzir ekiam zuamɨra me batogham, egh me gasɨghasigham.
Eghtɨ me ua deraghamin tuaviba puvatɨgham.
16 Ikiavɨra Itir God 7plan arazir kurar kabar amuan anogoregha
bar dar aghua:
17 Gumazir uabɨ uabɨ fem, gumazir igharazibar gara ghaze,
me pura biziba.
Gumazir akar ifavaribav geim.
Gumazir pura gumazir igharazibav sozi me ariaghirim.
18 Gumazir arazir kuram damuasa nɨghnɨzim.
Gumazir zuraram arazir kuram damuasa ivemarim.
19 Gumazir kotiamɨn aven ifavarir akabav geim.
Gumazir aveghbuabagh ami me uarir anɨngazim.
Nɨ gumazir igharazimɨn amuim ko dakuan markɨ
20 Nan borim, nɨ uan afeziam ko amebamɨn akar gavgaviba baragh,
egh da bakɨnɨghnɨghan markɨ.
21 Nɨ aningɨn akaba inigh uan navim datɨgh, egh zurara dar gɨn mangɨ,
eghtɨ da nɨn fɨrimɨn kurukazir aghuimɨn mɨn ikɨvɨra ikiam.
22 Nɨ daruamin dughiamɨn, akar kam tuavim nɨn akakagham.
Egh nɨ dakuamin dughiamɨn, akar kam nɨn ganam.
Egh nɨ dɨkavamin dughiam, akar kam nɨghnɨzir aghuim nɨ danɨngam.
23 Akar Gavgavir kaba, mati lamɨn angazangarim, tuavim nɨn akakagham.
Aningɨn akaba nɨn dabirabir aghuim bagha nɨ mɨgei, egha nɨ akɨri.
24 Aningɨn akaba nɨn akurvaghtɨ,
nɨ gumazir igharazimɨn amuimɨn apezeperir akam baraghan kogham.
25 Nɨ amizir munamɨn mɨkarzir ganganir aghuimɨn ganɨva a gakongan markɨ.
A nɨn ganɨva nɨ gekuightɨ nɨ a bagh mangan markɨ.
26 Gumazitam tuavimɨn amizim koma akua arazir kuram gami, a ivezir ekiam damuan kogham, mati dagher muziarimɨn ivezim.
Ezɨ gumazitam, gumazir igharazimɨn amuim koma akui, a bar ivezir ekiam damuam. Egh a uaghan aremegham.
27 Nɨ avim uan evarim boroghɨn an suiraghtɨ,
nɨn korotiam ti isigham, o?
28 Nɨ avim gisɨn darutɨ,
avim ti nɨn suemɨn isigham, o?
29 Kamaghɨra, nɨ gumazir igharazimɨn amuim ko dakuightɨ,
me bar pazavɨra nɨ damightɨ nɨ bar ikuvigh ivezir kuram gitavɨraghan iburagham.
30 Gumazitam mɨtiriam an aghɨtɨ a daghetam okemeghtɨ,
me mɨghɨgh an ataran kogham.
31 Me bizir an amizir kamɨn apighɨva a isɨ kotiam datɨghtɨ,
a bizir kaba bar da ikarvagh, an dɨpenimɨn itir biziba bar ada da inigham.
32 Ezɨ gumazim, gumazir igharazimɨn amuim koma akui, a bar derazir puvatɨgha egha bar ongani.
Gumazir kam, a uabɨ uabɨ gasɨghasɨsi.
33 Gumazamiziba a mɨsoghɨva akar kurabar a mɨkɨmɨva an ziam gasɨghasɨgham,
eghtɨ aghumsɨzim an ikɨ mamaghɨra ikiam.
34 E fo, gumazim, gumazir igharazimɨn amuim koma akui, an osɨmtɨzir ekiam gami.
Kamaghɨra, amizir kamɨn pam bar puvɨra anɨngaghegh bar pazavɨra gumazir kam damigh ivezir kuram a danɨngɨva, egh an apangkuvighan kogham. Bar puvatɨgham.
35 An arazir kurar kam ikarvaghamin dagɨatam inian aghuagham.
An anɨngagharir ekiar kam gɨvaghan kogh kamaghɨra ikiam.