10
Gumazim uabɨn akurvaghasa God ko mɨgei
1 O Ikiavɨra Itir God, nɨ manmaghsuavɨra nan saghuiamɨn tughav iti?
Kɨ osɨmtɨziba itir dughiabar, nɨ manmaghsuavɨra nan modi?
2 Gumazir kuraba uari fa,
egha gumazir onganarazibagh amibagh asɨghasɨghasa men agɨntɨsi.
Nɨ me damightɨ, me nguazir torir gumazir igharaziba magɨrasa kuiziba,
me uari dar magɨrɨ.
3 Gumazir kuram uabɨ fa,
uan navir averiamɨn aven itir arazir kurabagh ifonge.
Gumazir bizir avɨribagh ifongezim,
an akar kurabar Ikiavɨra Itir God mɨgɨava, akɨrim ragha a gasi.
4 Gumazir kuram ifaghata ghaze, kɨ bar bizibagh fo.
A ghaze, kɨ nɨghnɨzir aghuir avɨriba iti.
Egha God gɨnɨghnɨzir puvatɨ.
A ghaze, “God, arazir kurar kɨ amibar gari puvatɨ.
A nan arazir kaba ikaraghan kogham.”
5 Gumazir kam amir biziba, da bar deraghavɨrama otifi.
Egha a ifaghata, bar tong nɨn nɨghnɨzibagh fozir puvatɨ,
egha uan apaniba men apanim gami.
6 A uabɨra uabɨ gɨnɨghnɨgha ghaze, kɨ tugha gavgafi.
Bizitam bar na munamadaghan koghtɨ,
kɨ osɨmtɨzitam batoghan kogham.
7 An atamra paza bizibav gɨava, gumazamizir igharazibagh asɨghasɨghasa mɨgei.
A gumazamizibar amutɨ me atiatingasa, bizibar me gifara atamra mɨgei.
An arazir kuraba ko osɨmtɨzibar amutɨ da otivasa atamra bizibav gei.
8 Gumazir kamaghɨn amim, nguibamɨn aven modoghav iti.
A ikɨ ganam, gumazir aghuim izɨtɨ an a mɨsueghtɨ an aremegham.
A gumazir gavgaviba itir puvatɨziba bagha modoghav ikia gari.
9 A laionɨn mɨn uan torimɨn modogha gara iti.
A modogh ikɨ egh gumazir onganarazibagh amibar suighasa.
A uan iver ekiamɨn men pɨgha men suigha me amɨkɨrvagha zui.
10 Gumazir kurar kam nɨmɨram apiav ikia gara,
gumazir gavgaviba puvatɨziba,
a uan gavgavir ekiar kamɨn me abɨri.
11 Gumazir kuram kamagh nɨghnɨgha ghaze,
“God ti arazir kurar kɨ amir kaba, mɨghɨgha dagh nɨghnɨzir puvatɨ.
A uan damazimning dukuagha, nan garir puvatɨ.”
12 O Ikiavɨra Itir God, nɨ dɨkavigh izɨ!
Egh gumazir kurar kaba ivezir kuram isɨ me danɨngigh!
Nɨ osɨmtɨziba aterir gumazamiziba, me bakɨnɨghnɨghan markɨ!
13 Gumazir kuram akɨrim ragha nɨ gasaragha uan navir averiamɨn ghaze,
“God ti, kɨ amizir arazir kurar kaba uam ada ikaraghan kogham.”
14 Gumazamizir kurabar arazir kuraba, nɨ dar ganigha gɨfa.
Egha mɨzaziba ko, osɨmtɨzir me gumazamizir igharazibagh anɨdiba, nɨ dagh fogha gɨfa.
Nɨ osɨmtɨziba aterir gumazamizir kabar akurvaghasa mɨzua iti.
Nɨ zurara, borir afeziaba ariaghireziba, ko gumazir gavgaviba puvatɨgha uari isa nɨ ganɨdiba, nɨ men akurvasi.
15 Nɨ gumazir kurar kabar gavgavim bar anegɨfagh.
Egh me amir arazir kurar kam uam an ganan kogham.
16 Ikiavɨra Itir God atrivimɨn ikɨ mamaghɨra ikiam.
Egh a uan nguazimɨn, Kantrin Igharazibar Gumazamizir kuraba batueghtɨ,
me bar moghɨra gɨvagham.
17 O Ikiavɨra Itir God, gumazamizir osɨmtɨziba atera nɨn apengan itiba,
nɨ men dɨmdiam baragh gavgavim isɨ
men navir averiabar anɨngigh.
18 Nɨ, borir afeziaba ariaghireziba ko, gumazir osɨmtɨziba itiba, nɨ men arareba baragh men akuragh.
Nɨ uan guizɨn arazimɨn men araziba tuisɨghtɨ me ikɨ.
Eghtɨ nguazimɨn gumazamiziba uam osɨmtɨzim me darɨghan kogham.